လါအ့ဖြ့ၣ်(၃၀)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ဘၣ်ကွၢ်ဆၢၣ်မဲၥ်ဘၣ်ဒီးဟီၣ်ခိၣ်ဟူး၀းအဆၢကတီၢ် သုးကီၣ်ကးမၤ၀ဲကလံၤကျါတၢ်ဒုးအဃိ ပှၤ(၂၄၂)ဂၤဘၣ်သံ၀ဲအဂ့ၢ် ဒီကလုၥ်ဃူဖိးပဒိၣ် (NUG) ထုးထီၣ်ပၥ်ဖျါဃၥ်၀ဲဖဲလါအ့ဖြ့ၣ်(၂၈)သီအနံၤန့ၣ်လီၤ.
ဟီၣ်ခိၣ်ဟူး၀းတ့ၢ်၀ဲလၢလါမးရှး(၂၈)သီတုၤလါအ့ဖြ့ၣ်(၂၅)သီအနံၤအတီၢ်ပူၤ သုးကီၣ်ကးမၤ၀ဲကလံၤကျါတၢ်ဒုး(၂၂၅)ဘျီ၀ံၤ ပှၤသံတ့ၢ်အကျါ ပှၤသးနံၣ်အိၣ်(၁၈)နံၣ်ဆူအဖီလၥ် ပှၤဖိသၣ်(၂၉)ဂၤပၣ်ဃုၥ်၀ဲအဂ့ၢ် စံး၀ဲန့ၣ်လီၤ.
တကးဘၣ် ပှၤဖိသၣ်(၃၃)ဂၤပၣ်ဃုၥ် ပှၤ(၃၉၁)ဂၤဘၣ်ဒိ၀ဲအဂ့ၢ် အလံၥ်ဘိးဘၣ်ရၤလီၤအပူၤ ပၥ်ဖျါဃၥ်၀ဲန့ၣ်လီၤ. သံဘၣ်ဒိအအါကတၢၢ်န့ၣ် အိၣ်ထီၣ်၀ဲဒၣ်လၢ စကဲဒီးမါတလ့ကီၢ်ခီပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
စကဲကီၢ်ခီအပူၤ သုးကီၣ်ကးမၤ၀ဲကလံၤကျါအိၣ်ထီၣ်၀ဲ(၅၂)ဘျီ၀ံၤ ပှၤသံ၀ဲ(၈၀)ဂၤဒီး ပှၤ(၁၂၁)ဂၤဘၣ်ဒိ၀ဲန့ၣ်လီၤ. မ့မ့ၢ်လၢမါတလ့ကီၢ်ခီအပူၤတခီ ကလံၤကျါတၢ်ဒုးအိၣ်ထီၣ်၀ဲ(၄၈)ဘျီ၀ံၤ ပှၤ(၅၇)ဂၤသံ၀ဲဒီး (၉၇)ဂၤဘၣ်ဒိ၀ဲန့ၣ်လီၤ.
သုးကီၣ်ကးအသုးန့ၣ် မၤထီထီၣ်တၢ်ပတုၥ်တၢ်ခးအဆၢကတီၢ်လၢ လံၥ်အဖီခိၣ်လီဒီး မ့မ့ၢ်လၢဟီၣ်ခိၣ်မဲၥ်ဖံးခိၣ်တခီ မၤ၀ဲဒုးယၤရဲၣ်ကျဲၤတဖၣ်တပယူၥ်ဃီအဂ့ၢ် NUGကိတိၥ်ခိၣ်ကျၢၢ်၀ဲၤဒၢး ပှၤကတိၤတၢ်ပၢ အူန့ၣ်ဘိလး တဲ၀ဲန့ၣ်လီၤ.
“လၢဟီၣ်ခိၣ်မဲၥ်ဖံးခိၣ်န့ၣ် ဟဲတ့ၢ်လီၤမ့ၣ်ပိၢ်မၤသံ လီၢ်က၀ီၤကမျၢၢ်တဖၣ်, နုၥ်လီၤသုးကျိၤတဖၣ် မၤ၀ဲတပယူၥ်ဃီအဂ့ၢ်” စံး၀ဲန့ၣ်လီၤ.
သုးမီၤစိရိၤသုးကီၣ်ကးအသုးအံၤ မၤ၀ဲကလံၤကျါတၢ်ဒုးတဖၣ် လၢကခၠ့ၣ်, ကရ့ၣ်နံၣ်, ကညီ, ခၠ့,တလၢၤ,ရၢၢ်ခၢၣ်, ယိၤဒိၣ်ကီၢ်စဲၣ်တဖၣ်အပူၤ တကးဘၣ်မၤစ့ၢ်ကီး၀ဲလၢ စကဲ,မါတလ့, မကွ့, ပကိ,တနီသရံၣ်ဒီးအ့ၣ်ယၣ်၀တံၣ်ကီၢ်ခီတဖၣ်အပူၤအဂ့ၢ် NUGပၥ်ဖျါဃၥ်၀ဲန့ၣ်လီၤ.
မ့မ့ၢ်လၢသုးကီၣ်ကးတခီ ဟီၣ်ခိၣ်ဟူး၀းတၢ်က့ၤသူၣ်ထီၣ်ဆီလီၤအဂီၢ် ကမၤ၀ဲတၢ်ပတုၥ်တၢ်ခးတုၤ လါအ့ဖြ့ၣ်လါလၢၥ်အဂ့ၢ် ဘိးဘၣ်ရၤလီၤဃၥ်၀ဲန့ၣ်လီၤ.
Ref: RFA
