လါအ့ဖြ့ၣ်(၂၉)သီ,၂၀၂၅နံၣ်
တၢ်ကဒုးယူၣ်ကရ့အဂီၢ် ဆှၢလီၤန့ၢ်၀ဲဒၣ်အပှၤသုးဖိတဖၣ် ဆူရၢးရှါအဂ့ၢ်ကလံၤစိးခိၣ်ရံယါတဲပၥ်ဂၢၢ်ပၥ်ကျၢၤ၀ဲအဆိကတၢၢ်တဘျီန့ၣ်လီၤ.
ကလံၤစိးခိၣ်ရံယါသုးဖိတဖၣ်ဒ်သိးဒီးရၢးရှါအထံဆၢကီၢ်ဆၢလီၢ်က၀ီၤလၢအမ့ၢ်(ကၥ့စ်)အံၤကဒိးန့ၢ်ဘၣ်တၢ်သဘျ့ခဲလၢၥ်အဂီၢ်မၤစၢၤတ့ၢ်၀ဲအဂ့ၢ်ကလံၤစိးခိၣ်ရံယါကီၢ်ခိၣ်(ကင်ဂျုံအန်း)အတၢ်တဲအဖီခိၣ်အနီၢ်ကစၢ်ထံကီၢ်တၢ်ကစီၣ်သန့လၢအမ့ၢ်(KCNA) တၢ်ကစီၣ်သန့တဲဖျါထီၣ်၀ဲန့ၣ်လီၤ.
လၢတၢ်ဒုးအပူၤကလံၤစိးခိၣ်ရံယါအသုးဖိတဖၣ် အတၢ်ဟ့ၣ်လီၤအသးဒီးအတၢ်သူၣ်ဒူသးဒူတဖၣ် မ့ၢ်တၢ်လၢအဘၣ်သူၣ်ဘၣ်၀ဲအဂ့ၢ်ရၢးရှါသုးခိၣ်ကျၢၢ်(ဗယ်လရီဂါရာဆင်မော့ဗ်)တဲစံးဘျုး၀ဲ၀ံၤအလီၢ်ခံ စှၤသီအတီၢ်ပူၤကလံၤစိးခိၣ်ရံယါအတၢ်တဲဖျါဟးထီၣ်၀ဲဒၣ်၀ံၤ တၢ်အံၤန့ၣ်ကလံၤစိးခိၣ်ရံယါအတၢ်ပၣ်ဃုၥ်ဘၣ်ထွဲလၢရၢးရှါအတၢ်ဒုးပူၤအဂ့ၢ်မ့ၢ်ကလံၤစိးခိၣ်ရံယါအတၢ်ပၥ်ပနီၣ်တဲဖျါဒုးသ့ၣ်ညါပှၤအါဂၤအဆိကတၢၢ်တဘျီန့ၣ်လီၤ.
ကလံၤစိးခိၣ်ရံယါဆှၢလီၤန့ၢ်ရၢးရှါအပှၤသုးဖိအဂၤ(၁၁၀၀၀)အကျါ(၃)လါအတီၢ်ပူၤ အပှၤသုးဖိသံ၀ဲအဂၤ(၁၀၀၀)ဘျဲၣ်အဂ့ၢ် ကီၢ်မုၢ်နုၥ်ပ့ၢ်ဆှါတဖၣ်တဲ၀ဲန့ၣ်လီၤ. ဒီးရၢးရှါန့ၣ်တဲထီၣ်၀ဲဒၣ်လီၤတံၢ်လီၤဆဲးလၢပၢဘၣ်၀ဲဒၣ်ထံကီၢ်မုၢ်နုၥ်တကပၤ(ကၥ့စ်)လီၢ်က၀ီၤခဲလၢၥ်လၢလၢပှဲၤပှဲၤလံန့ၣ်လီၤ.
အမဲရကၤတခီ ကလံၤစိးခိၣ်ရံယါအတၢ်မၤစၢၤဆီၣ်ထွဲတဖၣ်အံၤ မ့ၢ်ဒၣ်ဒ်သိးဒီးယူၣ်ကရ့အတၢ်ဒုးကအိၣ်ယံၥ်ထၢအဂီၢ်အဃိ ဘၣ်ထွဲဒီးတၢ်ဂ့ၢ်အံၤအဖီခိၣ်ကလံၤစိးခိၣ်ရံယါအမူဒါအိၣ်၀ဲအဂ့ၢ်တဲဖျါ၀ဲန့ၣ်လီၤ.ကလံၤစိးခိၣ်ရံယါဆှၢလီၤသုးဖိတဖၣ်အံၤ မ့ၢ်ဒၣ်လၢရၢးရှါဒီးကလံၤစိးခိၣ်ရံယါအဘၢၣ်စၢၤ မ့ၢ်လၢအိၣ်ဒီးအတၢ်အၢၣ်လီၤတူၢ်လိၥ်သးလၢကဒီသဒၢလိၥ်သးကဒဲကဒဲန့ၣ်လီၤအဂ့ၢ် ကလံၤစိးခိၣ်ရံယါအနီၢ်ကစၢ်ထံကီၢ်တၢ်ကစီၣ်သန့(KCNA)တဲဖျါထီၣ်၀ဲန့ၣ်လီၤ.
လၢခံစ့ၢ်ကီးကမၤစၢၤကဒီးရၢးရှါသုးအိၣ်ဒံးအဂ့ၢ်တဲ၀ဲန့ၣ်လီၤ.ဘၣ်ဆၣ်(ကၥ့စ်)လီၢ်က၀ီၤတၢ်ဒုးတဖၣ်၀ံၤအလီၢ်ခံကလံၤခိၣ်ရံယါသုးတဖၣ်ကမၤစၢၤရၢးရှါဒ်လဲၣ်အဂ့ၢ်ကလံၤစိးခိၣ်ရံယါအနီၢ်ကစၢ်ထံကီၢ်တၢ်ကစီၣ်သန့အတၢ်ပၥ်ဖျါလီၤတံၢ်လီၤဆဲးတအိၣ်ဒံးဘၣ်.
