လါအ့ဖြ့ၣ်(၂၉)သီ, ၂၀၂၅နံၣ်
ကီၢ်ပယီၤလၢဘၣ်ကွၢ်ဆၢၣ်မဲၥ်ဘၣ်ဒီးဟီၣ်ခိၣ်ဟူး၀းတၢ်တတဲၥ်တနါအံၤ ထံကီၢ်ဒီတဘ့ၣ်အပူၤ ခိၣ်ဃၢၤန့ဆၢၣ်တၢ်လီၤဘၣ်ယိၣ်ဒီးတၢ်သဘံၣ်သဘုၣ်တဖၣ်အဃိ ပှၤလၢဘၣ်ဒိဘၣ်ထံးတဖၣ်အဂီၢ် ပှၤဟီၣ်ခိၣ်ဖိတၢ်ဒိသူၣ်ဒိသးဂ့ၢ်၀ီတၢ်အိၣ်သးတဖၣ် ဟဲနးဒိၣ်ထီၣ်အဂ့ၢ် ဟီၣ်ခိၣ်ဒီဘ့ၣ်တၢ်မၤပူၤဖျဲးကမံးတံၥ် IRC ဟ့ၣ်ပလီၢ်ဃၥ်၀ဲန့ၣ်လီၤ.
တၢ်ဘၣ်ဒိဘၣ်ထံးတၢ်ဟးဂုၤဟးဂီၤအိၣ်ထီၣ်အအါကတၢၢ်လၢအမ့ၢ် မါတလ့, စကဲ, န့ၣ်ပၠံၣ်တီၣ်ဒီး ယိၤဒိၣ်ကီၢ်စဲၣ်ဟီၣ်က၀ီၤတနီၤအပူၤ ဘၣ်ကွၢ်ဆၢၣ်မဲၥ်ဘၣ်ဒီးတၢ်ဟးဂုၤဟးဂီၤတၢ်ဃံးတၢ်စ့ၢ်တဖၣ်အဂ့ၢ် စံး၀ဲန့ၣ်လီၤ.
“ခီဖျိလၢဟီၣ်ခိၣ်ဟူး၀းအဃိ ပှၤအကလီၢ်တဖၣ်ဘၣ်ပၥ်တ့ၢ်ဟံၣ်ဃီ၀ံၤ အါတက့ၢ်န့ၣ် တၢ်အဒူၣ်တဖၣ်(မ့တမ့ၢ်) ပှၤအါအါဂီၢ်ဂီၢ်ဘၣ်အိၣ်ပှဲၤကတံၥ်လၢတစိၤတလီၢ်ဒဲတဖၣ်အပူၤအဂ့ၢ်,ခိၣ်ဃၢၤန့ဆၢတၢ်တတဲၥ်တနါကဲထီၣ်၀ံၤအလီၢ်ခံ တၢ်အီၣ်တၢ်အီအပှ့ၤကလံၤတဖၣ်ဟဲဒိၣ်ထီၣ်အဃိ ဟံၣ်ဖီဃီဖိအါအါဂီၢ်ဂီၢ် ဘၣ်အိၣ်စှၤလီၤတၢ်အီၣ်တၢ်အီအဂ့ၢ်, တၢ်ပဲၥ်ထံနီၤဖးအဖီခိၣ် ဂ့ၢ်ဂီၤအူတၢ်အီၣ်တၢ်အီဒီးကျိၥ်စ့တၢ်မၤစၢၤတဖၣ်လိၣ်၀ဲအဂ့ၢ်” ကီၢ်ပယီၤ IRCအပှၤနဲၣ်တၢ် Mohammed Riyas စံး၀ဲန့ၣ်လီၤ.
“တၢ်ဟးဂုၤဟးဂီၤတၢ်အိၣ်သးန့ၣ် ဆူၣ်ဒိၣ်မးလီၤ. လိၣ်ဘၣ်၀ဲတၢ်မၤစၢၤတဖၣ်အါမးလီၤ. လီၤဆီဒၣ်တၢ် ပှၤပိၥ်မုၣ်တဖၣ်, ပှၤလၢပၥ်တ့ၢ်ဟံၣ်ဃီဒီး တၢ်မၤပျီၢ်မၤဂီၤတၢ်လီၤဘၣ်ယိၣ်ဒိၣ်ထီၣ်အဃိ ပိၥ်မုၣ်တဖၣ်အဂီၢ် တၢ်ဘၣ်ယိၣ်အိၣ်အဂ့ၢ်န့ၣ်” ၀့ၢ်တကူၣ်အိၣ်သူၣ်လီၤ IRCပတီၢ်ထီပှၤမၤတၢ်ဖိတဂၤ စံး၀ဲန့ၣ်လီၤ.
တၢ်ဟ့ၣ်တၢ်မၤပူၤဖျဲးသးသမူတၢ်မၤစၢၤတဖၣ်, တၢ်က့ၤသူၣ်ထီၣ်ဆီလီၤတၢ်ဂ့ၢ်လၢအရ့ဒိၣ်အဂီၢ်ဒီး တၢ်ကတြီတံၥ် သးသမူတၢ်ဟးဂုၤဟးဂီၤတဖၣ်ကန့ၢ်အဂီၢ် လိၣ်ဘၣ်အါထီၣ်သပှၢ်ကတၢၢ်လၢ ဟီၣ်ခိၣ်ဒီဘ့ၣ်ကျိၥ်စ့တၢ်ဆီၣ်ထွဲမၤစၢၤတဖၣ်အဂ့ၢ် စံး၀ဲန့ၣ်လီၤ.
ကီၢ်ပယီၤပူၤ ဖဲအပူၤကွံၥ် လါမးရှး(၂၈)သီအနံၤ အသဟီၣ်ဆူၣ်(၇.၇)ဟီၣ်ခိၣ်ဟူး၀းကဲထီၣ်၀ံၤအလီၢ်ခံ တလါအတီၢ်ပူၤပှၤ(၃၈၀၀)ဘျဲၣ်ဘၣ်သံ၀ဲ၀ံၤ ဆူၣ်ချ့တၢ်ဆီၣ်ထွဲမၤစၢၤ, ထံဒီးတၢ်ကဆှဲကဆှီတၢ်ရဲၣ်တၢ်ကျဲၤတဖၣ်, တၢ်ဒီသဒၢတၢ်ကဟုးကယၥ်တဖၣ်ဒီး ကျိၥ်စ့တၢ်ဆီၣ်ထွဲမၤစၢၤတဖၣ် တၢ်ဟ့ၣ်လီၤဆူ ကမျၢၢ်လၢဘၣ်ကွၢ်ဆၢၣ်မဲၥ်ဒီးဟီၣ်ခိၣ်ဟူး၀းတၢ်ကီတၢ်ခဲ(၁၀,၁၃၃)အအိၣ်အဂ့ၢ် စံး၀ဲန့ၣ်လီၤ.
Photo: IRC
