လါအ့ဖြ့ၣ်(၂၈)သီ,၂၀၂၅နံၣ်
သုးကီၣ်ကးအသုးအံၤ ခီဖျိဟီၣ်ခိၣ်ဟူး၀းအဃိ ဘိးဘၣ်ရၤလီၤ၀ဲလၢ ကမၤတၢ်ပတုၥ်တၢ်ခးလၢလါအ့ဖြ့ၣ်(၂)သီတုၤ(၂၂)သီအတီၢ်ပူၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဟီၣ်က၀ီၤအပူၤ သုးကီၣ်ကးအသုး ဟဲဒုးတၢ်လၢကလံၤကျါဒီးခးလီၤကျိဖးဒိၣ်တဖၣ်အဃိ လီၢ်က၀ီၤကမျၢၢ်ဘၣ်သံ၀ဲ(၂၀)ဂၤအဂ့ၢ် ခ့ၣ်အဲၣ်ယူၣ်-လီၢ်ခၢၣ်သး ပၥ်ဖျါဃၥ်၀ဲ ဖဲလါအ့ဖြ့ၣ်(၂၆)သီအနံၤန့ၣ်လီၤ.
သုးကီၣ်ကးအတၢ်ဟဲဒုးတၢ်အပူၤ သီခါ(၂)ဂၤ, တကွဲ(၁)ဂၤပၣ်ဃုၥ် လီၢ်က၀ီၤကမျၢၢ်(၅၇)ဂၤ ဘၣ်ဒိ၀ဲအသိး သီခါဖၠၣ်(၅)ဖျၢၣ်, တၢ်ဘါယွၤသရိၥ်(၁)ဖျၢၣ်ဒီး ဟံၣ်ဃီ(၂၇)ဖျၢၣ် ဘၣ်ဟးဂီၤကွံၥ်၀ဲအဂ့ၢ် စံး၀ဲန့ၣ်လီၤ.
သုးကီၣ်ကး တၢ်ပတုၥ်တၢ်ခးတၢ်ဘိးဘၣ်ရၤလီၤအံၤ မ့ၢ်ဒၣ်ဒ်သိး ကဒိးန့ၢ်တၢ်ဆီၣ်ထွဲမၤစၢၤတဖၣ်လၢ ဟီၣ်ခိၣ်ထံကီၢ်တဖၣ်အအိၣ်အဂီၢ် ဘိးဘၣ်ရၤလီၤ၀ဲဒီး မ့မ့ၢ်လၢ တၢ်ပၢၢ်ဆၢသုးပၢဆှၢဃၥ်၀့ၢ်တဖၣ်အပူၤတခီ ပညိၣ်ဒုး၀ဲတပယူၥ်ဃီလီၤအဂ့ၢ် KNUအလံၥ်ဘိးဘၣ်ရၤလီၤအပူၤ ပၥ်ဖျါဃၥ်၀ဲန့ၣ်လီၤ.
တၢ်ပတုၥ်တၢ်ခးအဆၢကတီၢ် ခီဖျိ KNUတပၤ မၤတၢ်ထီၣ်ဒုးသုးကီၣ်ကးသုးကလၢၤတဖၣ်အဂ့ၢ်န့ၣ် ဖဲ လါအ့ဖြ့ၣ်(၂၀)သီအနံၤန့ၣ် သုးကီၣ်ကးပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၣ်မ့ထိ တဲလီၤ၀ဲလၢ MRTVတဆီန့ၣ်လီၤ.
“KNUတပၤစ့ၢ်ကီး ဖဲလါအ့ဖြ့ၣ်(၁၉)သီအနံၤ, ဂီၤ(၈)နၣ်ရံၣ်အဆၢကတီၢ် ဟဲထီၣ်ဒုး ကီးတရံး, ငါတဲၣ်သ၀ီ, ပတမၠါကွ့တၢ်လီၢ်တဖၣ်အသိး တကးဘၣ် ဖဲဂီၤ(၁၀း၅၀)နၣ်ရံၣ်အဆၢကတီၢ်စ့ၢ်ကီး ထီၣ်ဒုး၀ဲမီဖါသူတၢ်ဘံၣ်တၢ်ဘၢသုးကလၢၤအဂ့ၢ်” သုးကီၣ်ကးအပှၤကတိၤတၢ်ပၢ စီၣ်မ့ထိ စံး၀ဲန့ၣ်လီၤ.
သုးကီၣ်ကးစံး၀ဲလၢ ဟီၣ်ခိၣ်ဟူး၀းတၢ်မၤပူၤဖျဲးအဂီၢ်၀ံၤ မၤထီထီၣ်တၢ်ပတုၥ်တၢ်ခးအဆၢကတီၢ် တုၤလါအ့ဖြ့ၣ်(၃၀)သီအနံၤန့ၣ်လီၤ.
သုးကီၣ်ကးအသုး ဘိးဘၣ်ရၤလီၤ၀ဲလၢ ကမၤတၢ်ပတုၥ်တၢ်ခးအဂ့ၢ် စးထီၣ်လၢလါအ့ဖြ့ၣ်(၂)သီတုၤ(၂၄)သီအတီၢ်ပူၤ မၤ၀ဲကလံၤကျါတၢ်ဒုးဒီးခးလီၤကျိဖးဒိၣ်အိၣ်ထီၣ်၀ဲ(၁၇၂)ဘျီဒီး ဖဲန့ၣ်အကျါ(၇၃)ဘျီ လဲၤဒုးတၢ်လၢ ဟီၣ်ခိၣ်ဟူး၀းကဲထီၣ်သးလီၢ်က၀ီၤတဖၣ်အပူၤအဂ့ၢ် ဘီမုၢ်စၢဖှိၣ်ကရၢပှၤဂ့ၢ်၀ီခွဲးယၥ်၀ဲၤဒၢး ထုးထီၣ်ပၥ်ဖျါဃၥ်၀ဲလၢ အပူၤကွံၥ်စှၤသီအတီၢ်ပူၤန့ၣ်လီၤ.
စးထီၣ်လၢ လါအ့ဖြ့ၣ်(၂)သီတုၤ(၁၈)သီအနံၤအတီၢ်ပူၤ သုးကီၣ်ကးအသုးအံၤ တၢ်တယၣ်အဖီခိၣ် တသီအတီၢ်ပူၤန့ၣ် ဟဲဒုးတၢ်လၢကလံၤကျါ(မ့တမ့ၢ်)ဒြိတၢ်ဒုးအိၣ်ထီၣ်၀ဲ အစှၤကတၢၢ်အဘျီ(၁၀)အဂ့ၢ်၀ံၤ ကိးမုၢ်နံၤန့ၣ် ပှၤဘၣ်သံ၀ဲတစှၤန့ၣ် (၆)ဂၤအဂ့ၢ်, တၢ်ဆၢကတီၢ်အံၤအပူၤ ခီဖျိကလံၤကျါတၢ်ဒုးအဃိ ပှၤဘၣ်သံအိၣ်ထီၣ်(၁၀၅)ဂၤအဂ့ၢ် အလံၥ်ဘိးဘၣ်ရၤလီၤအပူၤ ပၥ်ဖျါဃၥ်၀ဲန့ၣ်လီၤ.
Ref: RFA
