လါအ့ဖြ့ၣ်(၂၅)သီ,၂၀၂၅နံၣ်
ကီၫ်ကၠီၣ်တဲၣ်အပူၤ ခီဖျိကၠိဖိဘံၣ်စၣ် ပှၤထံဂုၤကီၫ်ဂၤဖိ နုာ်လီၤမၤတၫ်လၢတဖိးသဲစး တၫ်ကတြီဆၢအဂီၫ် တၫ်ဟ့ၣ်ဃာ်ကၠိဖျိဘံၣ်စၣ်တၫ်ပျဲတဖၣ် တၫ်ကပာ်ကနီၣ်က့ၤအဂီၫ် ကၠီၣ်တဲၣ်ပဒိၣ်ရဲၣ်ကျဲၤ၀ဲအဂ့ၫ် ကၠီၣ်တဲၣ်တၫ်ကစီၣ် Thai Enquirer ပာ်ဖျါဃာ်၀ဲလီၤ.
ကၠိဖိဘံၣ်စၣ်အသးသမူတဖၣ် ဒိးသန့ၤထီၣ်အသးလၢတၫ်မၤလိဖီခိၣ်၀ံၤ တၫ်ကက့ၤသမံသမိးအဂီၫ် ကီၫ်ကၠီၣ်တဲၣ် ပတီၫ်ထီပီညါ,စဲအ့ၣ်,တၫ်ဃုထံၣ်သ့ၣ်ညါဒီးတၫ်ဒုးအိၣ်ထီၣ်တၫ်အသီကိတိာ်၀ဲၤကျိၤ(MHESI)တၫ်ပၢဆှၢပှၤကညီတၫ်နုာ်လီၤဟးထီၣ်၀ဲၤကျိၤတဖၣ် ပာ်ဖှိၣ်ထီၣ်အသး၀ံၤ ရဲၣ်ကျဲၤ၀ဲအဂ့ၫ် တၫ်ကစီၣ်ပူၤ ပာ်ဖျါ၀ဲလီၤ.
ဖၠၣ်စိမိၤတဖၣ် အတၫ်ရဲၣ်တၫ်ကျဲၤလၢတမ့ၫ် ဒံၣ်ကရံၣ်တၫ်ဆၢကတီၫ်ဖုၣ်တၫ်မၤလိတဖၣ်အဖီခိၣ် ပဒိၣ်အတၫ်ပၢဆှၢရဲၣ်ကျဲၤတဖၣ် အဂံၫ်စၫ်အဂ့ၫ် ကၠီၣ်တဲၣ်ပဒိၣ်ဘၣ်မူဘၣ်ဒါတဖၣ် တဲ၀ဲအဂ့ၫ်,ကၠိဖိမၤလိလၢအိၣ်လဲဒီးကၠိတၫ်ဆၢကတီၫ် တၫ်မၤဃံး၀ဲအိၣ်/တအိၣ်ဒီး ဘၣ်ထွဲဒီးကအိၣ်ဆိးလၢထံကီၫ်အပူၤ ယံာ်ထဲလဲၣ်န့ၣ် တအိၣ်လီၤတံၫ်လီၤဆဲးဘၣ်အဂ့ၫ် ပာ်ဖျါ၀ဲလီၤ.
ကီၫ်ကၠီၣ်တဲၣ်တၫ်ပၢဆှၢရဲၣ်ကျဲၤပှၤကညီတၫ်နုာ်လီၤဟးထီၣ် တၫ်ဘျၢသဲစးအဖီခိၣ် ထံဂုၤကီၫ်ဂၤကၠိဖိတဖၣ်န့ၣ် ဘံၣ်စၣ်တဘျီဂီၫ် ဒိးန့ၫ်၀ဲအသီ(၉၀)၀ံၤ ဒိးသန့ၤထီၣ်အသးလၢထီၣ်တၫ်မၤလိအဖီခိၣ် ခဲလၢာ်ပာ်ဖှိၣ်အိၣ်ဆိးသ့လၢတယံာ်န့ၫ်(၁)နံၣ်သ့၀ဲလီၤ.
ဘၣ်ထွဲဒီးတၫ်ဂ့ၫ်တဖၣ်အံၤ MHESIကိတိာ်၀ဲၤကျိၤန့ၣ် တၫ်မၤလိလၢထံဂုၤကီၫ်ဂၤကၠိဖိတဖၣ်ထီၣ်၀ဲ လၢတမ့ၫ်ဒံၣ်ကရံၣ်တဖၣ်အဂီၫ် တၫ်ဘျၢလၢတၫ်ပာ်ပနီၣ်ဃာ်၀ဲတဖၣ် တၫ်ကက့ၤပဲာ်ထံနီၤဖး၀ဲ၀ံၤ တၫ်ကပာ်ဂၢၫ်ပာ်ကျၢၤ၀ဲန့ၣ် ဆၢတဲာ်လီၤ၀ဲအဂ့ၫ် တၫ်သ့ၣ်ညါဘၣ်လီၤ.
တၫ်ပာ်ပနီၣ်ဃာ်တၫ်ဘျၢအဖီခိၣ် ဖၠၣ်စိမိၤကၠိတဖၣ်န့ၣ် တချူးဆှၢဟ့ၣ်ထီၣ်တၫ်ဂ့ၫ်တၫ်ကျိၤဆူ တၫ်ပၢဆှၢရဲၣ်ကျဲၤပှၤကညီတၫ်နုာ်လီၤဟးထီၣ်ဒံးဘၣ်န့ၣ် အဆိကတၢၫ်MHESIန့ၣ်ကဘၣ်ရဲၣ်ကျဲၤဆၢတဲာ်၀ဲအဂီၫ်ဒီး ကၠိတဖၣ်အိးထီၣ်ဃာ်၀ဲ တၫ်မၤလိတၫ်ဆၢကတီၫ်ဒီးတၫ်မၤလိအဂ့ၫ်အက့ၫ်အဂီၤပာ်ဃုာ် တၫ်မၤလိတၫ်ဂ့ၫ်တၫ်ကျိၤလီၤတံၫ်လီၤဆဲးတဖၣ် တၫ်ကဘၣ်တီၣ်ဖျါထီၣ်အဂ့ၫ် ပာ်ဖျါ၀ဲလီၤ.
ကီၫ်ကၠီၣ်တဲၣ်အပူၤ တၫ်ကခိးကွၫ် တၫ်မၤတၫ်လၢတဖိးသဲစးတဖၣ်အဂီၫ် ကၠိဖိဘံၣ်စၣ်တၫ်ဂ့ၫ်တၫ်ကျိၤတဖၣ် တၫ်ကဟ့ၣ်ခီဟ့ၣ်နီၤလိာ်သးလၢချူးဆၢချူးကတီၫ်အဂီၫ် ဃ့ထီၣ်ဃာ်၀ဲ၀ံၤ ကၠီၣ်တဲၣ်တၫ်ပၢဆှၢရဲၣ်ကျဲၤပှၤကညီ တၫ်နုာ်လီၤဟးထီၣ်၀ဲၤကျိၤန့ၣ် တၫ်ဘျၢအဖီခိၣ်အၢၣ်လီၤတူၫ်လိာ်ဃာ်၀ဲအဂ့ၫ် တၫ်ကစီၣ်ပာ်ဖျါ၀ဲအဖီခိၣ် တၫ်သ့ၣ်ညါဘၣ်လီၤ.
ကီၫ်ကၠီၣ်တဲၣ်ပူၤ ခီဖျိကၠိဖိဘံၣ်စၣ်အဖီခိၣ် ထံဂုၤကီၫ်ဂၤပှၤကၠိဖိတဖၣ် မၤတၫ်လၢတဖိးသဲစးတၫ်ကတြီဆၢအဂီၫ် လံာ်တၫ်နၫ်ပၢၫ်(MOU)တဘ့ၣ် MHESIဒီးတၫ်ပၢဆှၢပှၤကညီတၫ်နုာ်လီၤဟးထီၣ်ဂ့ၫ်၀ီဘြူၣ်ရိၣ်တဖၣ် လၢတယံာ်ဘၣ်န့ၣ် ကဆဲးလီၤစုမုၫ်ကျၢၫ်အဂ့ၫ် တၫ်ကစီၣ်ပူၤ ပာ်ဖျါ၀ဲလီၤ.
Ref: Thai Enquirer
