လါအ့ဖြ့ၣ်(၂၅)သီ,၂၀၂၅နံၣ်
အ့ၣ်ယၣ်၀တံၣ်ကီၫ်ခီ,ယ့ၣ်ကၠံၣ်ကီၫ်ဆၣ်,မၠီးစါ ကျိဖးဒိၣ်သုးကလၢၤ(၃၄၄)လၢအိၣ်ဖဲ၀့ၫ်ငသဲခၠီအံၤအပူၤ သုးကီၣ်ကးပာ်ဖှိၣ်ထီၣ်အဂံၫ်အဘါ ကတီၤဃာ်သုးတၫ်ခီၣ်ဆၢအဂီၫ်အဂ့ၫ် တၫ်သ့ၣ်ညါဘၣ်လီၤ.
သုးကီၣ်ကးန့ၣ် တၫ်ပတုာ်တၫ်ခးတၫ်ဆၢကတီၫ်အတီၫ်ပူၤ လၢကျိဖးဒိၣ်သုးကလၢၤ(၃၄၄)အပူၤ ဆှၢအါထီၣ်အသုးဖိ(၃၀၀)ဂၤလၢအိၣ်ဖဲ၀့ၫ်တကူၣ်ဒီးအ့ၣ်ယၣ်၀တံၣ်ကီၫ်ခီတဖၣ်၀ံၤ အိၣ်ကတီၤသုးတၫ်ခီၣ်ဆၢအဂီၫ်အဂ့ၫ် တၫ်သ့ၣ်ညါဘၣ်လၢသုးဂ့ၫ်၀ီဂ့ၫ်ခီၣ်ထံးတၫ်ကစီၣ်အိၣ်န့ၣ်လီၤ.
“၃၄၄ သုးကလၢၤပူၤ အိၣ်ကတီၤဃာ်ဂံၫ်ဘါအသီတဖၣ်ဘၣ်ဆၣ် လၢတၫ်မဲာ်ညါတၫ်ဒုးပျီတခီ ကတီၤဃာ်အသးဒၣ် လၢအပူၤကွံာ်ပှၤသးပှၫ်ဒီးပှၤလီၫ်လံၤတဖၣ်လီၤအဂ့ၫ်”သုးဂ့ၫ်၀ီဂ့ၫ်ခီၣ်ထံးတၫ်ကစီၣ်တဲ၀ဲလီၤ.
ဂံၫ်ဘါလၢဘၣ်တၫ်ဆှၢ၀ဲတဖၣ်စ့ၫ်ကီး မ့ၫ်ဒၣ်ပှၤထီၣ်သုးတၫ်မၤလိနီၫ်ဂံၫ်(၉)ဒီးနီၫ်ဂံၫ်(၁၀ )လၢစံၣ်လီၤသုးတၫ်မၤလိတဖၣ်၀ံၤ သုးဖိလၢဟံးန့ၫ်တၫ်ဘံၣ်တၫ်ဘၢလၢတၫ်မဲာ်ညါသုးရ့ၣ်တဖၣ်လၢဘၣ်ဒိဘၣ်ထံးတဖၣ် တၫ်ကိးက့ၤအီၤ၀ံၤသူဃာ်၀ဲအဂ့ၫ် တၫ်သ့ၣ်ညါဘၣ်လီၤ.
သုးဖိလၢဘၣ်ဒိဖဲပသံၣ် မဆရ-၄ တၫ်မဲာ်ညါတၫ်ဒုးပျီတဖၣ် သုးကီၣ်ကးကူစါညါဘျါ၀ဲတရီကဒး၀ံၤဆှၢ၀ဲဆူ မၠီးစါကျိဖးဒိၣ်သုးကလၢၤအဃိ သုးဖိလၢစံၣ်လီၤဃ့ၫ်လၢတၫ်ဆါဟံၣ်တဖၣ်စ့ၫ်ကီး အိၣ်၀ဲအဂ့ၫ် တၫ်သ့ၣ်ညါ ဘၣ်လၢဂ့ၫ်ခီၣ်ထံးလီၫ်က၀ီၤတၫ်ကစီၣ်အိၣ်န့ၣ်လီၤ.
အပူၤကွံာ် လါအ့ဖြ့ၣ်(၂၀)သီနံၤစ့ၫ်ကီး ပနံာ်ကျးကစၫ်(၂)ဂၤလၢအိၣ်ဖဲသံၣ်တၣ်ကိပၠ့ၣ်ဒီးစ့အိကွဲသ၀ီတဖၣ် ဟဲက့ၤစိာ်ဟုသးတဖၣ်ဒီးသုးကီၣ်ကးတဲ၀ဲလၢဆီၣ်ထွဲမၤစၢၤ ပှၤမၤတၢထီၣ်ထၢလီၤတၫ်တဖၣ်အဃိ ဖီၣ်ဃာ်၀ဲဖဲယ့ၣ်နးသၣ် တၫ်သမံသမိးတြဲၤအဂ့ၫ်တၫ်သ့ၣ်ညါဘၣ်လီၤ.
လၢ၀့ၫ်ငသဲခၠီအပူၤ ကျိဖးဒိၣ်သုးကလၢၤ(၃၄၄)အကပၤ သုးဂ့ၫ်၀ီတၫ်ဖ့ၣ်ဆၢတၫ်အိၣ်သးအိၣ်အဃိ သုးကီၣ်ကးတဲ၀ဲလၢ ကီၫ်ခီသုး၀ဲၤလီၫ်ခိၣ်သ့ၣ်တၫ်ကလုၫ်၀ံၤ ဖီၣ်သမံသမိးဃာ်၀ဲ ပှၤကူၫ်လဲၫ်မၤကၤပနံာ်အိၣ်လံ(၁၁)ဂၤအဂ့ၫ် တၫ်သ့ၣ်ညါဘၣ်လၢလီၫ်က၀ီၤဖိတဖၣ်အိၣ်န့ၣ်လီၤ.
ဒ်န့ၣ်အသိး ထူတၫ်မၤကစၫ်လၢအိၣ်ဖဲ၀့ၫ်ယ့ၣ်ကၠံၣ်အပူၤတဖၣ်စ့ၫ်ကီး ကိးဃီၤ၀ဲလၢန့ၣ်ပၠံၣ်တီၣ်သမံသမိး၀ဲအိၣ်အဂ့ၫ် လီၫ်က၀ီၤဂ့ၫ်ခီၣ်ထံးတၫ်ကစီၣ်တဲ၀ဲန့ၣ်လီၤ.
လၢကတီၫ်အံၤ ငသဲခၠီဒီးလ့မၠဲးနၣ်ကီၫ်ဆၣ်တဖၣ်အပူၤ သုးကီၣ်ကးဒုး၀ဲလၢကလံၤကျါဒီးခးလီၤကျိဖးဒိၣ်တဖၣ်အဃိ ဒူသ၀ီပှၤလီၫ်က၀ီၤဖိတဖၣ် ဘၣ်ဃ့ၫ်ထီၣ်ဆူ၀့ၫ်ပူၤအဂ့ၫ် တၫ်သ့ၣ်ညါဘၣ်လီၤ.
Ref: Ayeyarwaddy Times
