လါအ့ဖြ့ၣ်(၂၅)သီ,၂၀၂၅နံၣ်
ကီၢ်ကရ့ၣ်နံၣ်, မိၤခံ၀့ၢ်, နီၣ်ဂံၢ်(၂)တၢ်သမံသမိးတြဲၤအကပၤ ဖဲလါအ့ဖြ့ၣ်(၂၄)သီအနံၤ, မုၢ်ဃ့ၢ်လီၤ(၃)နၣ်ရံၣ်ဃၣ်ဃၣ်အဆၢကတီၢ် သုးမီၤစိရိၤအသုးကဘီယူၤ ဟဲတ့ၢ်လီၤမ့ၣ်ပိၢ်လၢကလံၤကျါအဃိ လီၢ်က၀ီၤဖိတၢ်သံတၢ်ပှၢ်ဒီးတၢ်ဘၣ်ဒိဘၣ်ထံးအိၣ်ထီၣ်၀ဲအဂ့ၢ် လီၢ်က၀ီၤဖိတဖၣ်စံး၀ဲန့ၣ်လီၤ.
“ကဘီယူၤဟဲ၀့ၤ၀ီၤအကလုၢ်တဖၣ် တၢ်နၢ်ဟူဘၣ်၀ဲလီၤ. ဒ်န့ၣ်အသိး ဟဲတ့ၢ်လီၤမ့ၣ်ပိၢ်အကလုၢ်စ့ၢ်ကီး တၢ်နၢ်ဟူဘၣ်၀ဲန့ၣ်လီၤ. ဟဲတ့ၢ်လီၤ၀ဲ(၂)ဖျၢၣ်န့ၣ်လီၤ. ယအိၣ်လၢဟံၣ်ဒီးယကွၢ်စိဃီၤန့ၣ် ဟဲတ့ၢ်လီၤကဒီးလၢအပူၤကွံၥ်ဟဲတ့ၢ်လီၤအလီၢ် နီၣ်ဂံၢ်(၂)တၢ်သမံသမိးတြဲၤအကပၤ”အဂ့ၢ် လီၢ်က၀ီၤဖိတဂၤ စံး၀ဲန့ၣ်လီၤ.
သုးမီၤစိရိၤအသုး ဟဲတ့ၢ်လီၤမ့ၣ်ပိၢ်အပူၤ လီၢ်က၀ီၤကမျၢၢ်တၢ်ဘၣ်ဒိဘၣ်ထံးအိၣ်ထီၣ်၀ဲအါအါဂီၢ်ဂီၢ်၀ံၤ မ့မ့ၢ်လၢတၢ်ဂ့ၢ်တၢ်ကျိၤလီၤတံၢ်လီၤဆဲးတခီ တၢ်မၤလီၤတံၢ်အီၤတန့ၢ်ဒံးဘၣ်န့ၣ်လီၤ.
တကးဘၣ် ဖဲလါအ့ဖြ့ၣ်(၂၄)သီအနံၤ, ဂီၤ(၂)နၣ်ရံၣ်ဃၣ်ဃၣ်အဆၢကတီၢ်စ့ၢ်ကီး သုးမီၤစိရိၤအသုး ဟဲဒုးတၢ်လၢကလံၤကျါဆူ ကၠီၣ်တဲၣ်-ကရ့ၣ်နံၣ်ကီၢ်အဆၢ, မဲၢ်စဲးကီၢ်ဆၣ်, ဟိၣ်စဲးသ၀ီပူၤအဃိ လီၢ်က၀ီၤကမျၢၢ်အိၣ်ဟံၣ်ဃီတနီၤ ဘၣ်ဟးဂီၤကွံၥ်၀ဲဒီးတၢ်ဘၣ်ဒိဘၣ်ထံးတခီတအိၣ်ဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ဖဲအပူၤကွံၥ် လါမးရှး(၇)သီအနံၤစ့ၢ်ကီး သုးမိၤစိရိၤအသုး ဟဲဒုးတၢ်လၢကလံၤကျါ ဖဲမိၤခံနီၣ်ဂံၢ်(၂)တၢ်သမံသမိးတြဲၤအကပၤအဃိ လီၢ်က၀ီၤကမျၢၢ်ဖိ(၂)ဂၤသံ၀ဲဒီး တစှၤန့ၣ်(၁၀)ဂၤဘၣ်ဒိ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ကီၢ်ကရ့ၣ်နံၣ်, မိၤခံဟီၣ်က၀ီၤအပူၤ ခီဖျိသုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးမီၤစိရိၤသုးကီၣ်ကးအသုး ဟဲဒုးတၢ်လၢကလံၤကျါအဃိ တၢ်ကဒီသဒၢကလံၤကျါတၢ်လီၤဘၣ်ယိၣ်အဂီၢ် ဒ်သိးကခူၣ်ပၥ်၀ဲတၢ်ပူၤအဂီၢ် Karenni National Solidarity Organization(ဆၣ်၀ါ)ကရၢ ထုးထီၣ်ဒုးသ့ၣ်ညါဃၥ်၀ဲဖဲ လါမးရှး(၁၀)သီအနံၤန့ၣ်လီၤ.
Ref: KPV
