လါအ့ဖြ့ၣ်(၂၄)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၃),ကီၢ်ရ့ၣ်ချၢၣ်လွံၢ်ထူၣ်, ဆီထံးကီၢ်ဆၣ်ဟီၣ်က၀ီၤ, ကွါဆ့းသ၀ီခိၣ်ထီးအိၣ် သုးကီၣ်ကးသုးကလၢၤအံၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်တဖၣ် ထီၣ်ဒုးမၤန့ၢ်၀ဲအဂ့ၢ် တၢ်သ့ၣ်ညါဘၣ်လၢ ဂံၢ်ခီၣ်ထံးတၢ်ကစီၣ်တဖၣ်အအိၣ်န့ၣ်လီၤ.
ပရဲလိၥ်ကျိကၢၢ်နံၤအိၣ် သုးကီၣ်ကးသုးကလၢၤအံၤ တၢ်ထီၣ်ဒုးမၤန့ၢ်အီၤ ဖဲမဟါအနံၤလါအ့ဖြ့ၣ်(၂၃)သီအနံၤ, ဂီၤအဆၢကတီၢ်အဂ့ၢ် ဂံၢ်ခီၣ်ထံးသုးဂ့ၢ်၀ီတၢ်ကစီၣ်စံး၀ဲန့ၣ်လီၤ.
တၢ်ထီၣ်ဒုးသုးကီၣ်ကးကွါဆ့းသုးကလၢၤအပူၤ သုးကီၣ်ကးတပၤ ဟဲတ့ၢ်လီၤမ့ၣ်ပိၢ်လၢကဘီယူၤဒုးသုးဒီး မ့မ့ၢ်လၢတၢ်ထီၣ်ဒုးမၤန့ၢ်သုးကလၢၤအပူၤ တၢ်ဂ့ၢ်တၢ်ကျိၤလီၤတံၢ်တခိ တၢ်တသ့ၣ်ညါဘၣ်ဒံးဘၣ်.
“ဟဲတ့ၢ်လီၤမ့ၣ်ပိၢ်န့ၣ် အိၣ်ခံသီလံ, တနံၤအံၤမုၢ်ထူၣ်အဆၢကတီၢ်စ့ၢ်ကီး ဟဲဆှၣ်တရံးတၢ်အဂ့ၢ်” ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
ကတီၢ်ခဲအံၤန့ၣ် လၢၢ်ကတံၥ်-ဆီထံးကျဲမုၢ်လၢအဘျးစဲဃၥ် ဆီထံးကီၢ်ဆၣ်ဒီးကၠဲးထိၣ်ကီၢ်ဆၣ်ကျဲဒီတကျိၤအဖီခိၣ် သုးကီၣ်ကးအသုးဒီးတၢ်ပၢၢ်ဆၢဂံၢ်ဘါကရူၢ်အဘၢၣ်စၢၤ သုးဂ့ၢ်၀ီတၢ်ဖ့ၣ်ဆၢအိၣ်ထီၣ်၀ံၤ သုးကီၣ်ကးတပၤ မၤပှဲၤထီၣ်သုးဂံၢ်ဘါဖဲတိၣ်စရ့းအိၣ်ခီၣ်ချ့သုးရ့ၣ်(ခမရ၅၈၉),ကၠိၣ်ခၠီၣ်ဒီးသုးကီၣ်ကးသုးကလၢၤဆီလီၤဃၥ်တၢ်လီၢ်တဖၣ်အပူၤအသိး ခးလီၤစ့ၢ်ကီး၀ဲကျိဖးဒီၣ်တဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး သုးကီၣ်ကးအံၤ မၤပှဲၤအါထီၣ်ဃၥ်အသုးအဂံၢ်အဘါ ဖဲစးစူး, သရဲသမ့ၣ်, အလိးစူးသ၀ီတဖၣ်အပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
ခီဖျိလၢသုးကီၣ်ကးဒီးတၢ်ပၢၢ်ဆၢဂံၢ်ဘါကရူၢ်တဖၣ်အဘၢၣ်စၢၤ တၢ်ဒုးတၢ်ဖ့ၣ်လိၥ်သးအိၣ်ထီၣ်၀ဲအဃိ ဒူသ၀ီလၢအိၣ်ဖဲ လၢၢ်ကတံၥ်-ဆီထံးကျဲမုၢ်အကပၤတဖၣ်ဒ်အမ့ၢ် စလူၣ်ခၠီ, ဒိၣ်စရ့း, ကွါဆ့း, ဃိၣ်တုၥ်ကီၥ်ဒီးတကးဘၣ် ပရဲလိၥ်ကျိအဘးခီ ၀ီကီၢ်ဆၣ်တၢ်ပၢ သယဲသမ့ၣ်, စးစူးသ၀ီတဖၣ်အပူၤအိၣ် လီၢ်က၀ီၤကမျၢၢ်တဖၣ်စ့ၢ်ကီး ဘၣ်ဃ့ၢ်ပူၤဖျဲးသးအဂ့ၢ် တၢ်သ့ၣ်ညါဘၣ်န့ၣ်လီၤ.
