လါအ့ဖြ့ၣ်(၂၄)သီ,၂၀၂၅နံၣ်
ကီၫ်ပယီၤပူၤ တၫ်မၤအၢမၤသီတဖၣ်လၢကမျၢၫ်အဖီခိၣ် တၫ်ကပတုာ်ကွံာ်တဘျီဃီအဂီၫ်,ပှၤလၢတၫ်ဖီၣ်ဒုးဃာ်အီၤ လၢတဖိးသဲစးတဖၣ်တၫ်ကပျၫ်ကွံာ်အဂီၫ်ဒီးပှၤလၢလိၣ်ဘၣ်တၫ်မၤစၢၤခဲလၢာ်တဖၣ် တၫ်ကဟ့ၣ်ဘၣ်အီၤ ဟီၣ်ခိၣ်ဖိတၫ်ဒိသူၣ်ဒိသးတၫ်မၤစၢၤတဖၣ်လၢတၫ်တြီတအိၣ်ဘၣ်အပူၤအဂီၫ် အမဲရၤကၤမုၫ်ထီၣ်အ့ရှၢၣ်ဒီးပစံးဖ့းဂ့ၫ်၀ီ ပတီၫ်ထီပှၤဘၣ်မူဘၣ်ဒါ Sean O’Neill တဲဆီၣ်တခူထီၣ်၀ဲလီၤ.
လၢကီၫ်ခဲၣ်ဘီဒံယါ ၀့ၫ် Siam Reapအပူၤ ဖဲလါအ့ဖြ့ၣ်(၂၂)သီအနံၤ တၫ်မၤ၀ဲ(၃၇)၀ီတ၀ီ အမဲရၤကၤ-အၣ်စံၣ်ယၣ် တၫ်တၢၣ်ပီၣ်တဲသကိးအပူၤ တဲလီၤ၀ဲအဂ့ၫ် အမဲရၤကၤထံဂုၤကီၫ်ဂၤ၀ဲၤကျိၤထုးထီၣ်ဘိးဘၣ်ရၤလီၤ၀ဲလီၤ.
ဒ်အၣ်စံၣ်ယၣ်တၫ်အၢၣ်လီၤ(၅)ထံၣ်အသိး,ကီၫ်ပယီၤကတုၤဃီၤဆူဒံၣ်မိၣ်ကရ့ၣ်စံၣ်ကျဲဖီခိၣ်လၢအနီၫ်ကီၫ်ဘျ့ဘျ့သပှၫ်ကတၢၫ်အဂီၫ် ကပာ်ဖှိၣ်မၤသကိးတၫ်လၢအၣ်စံၣ်ယၣ်ဘူးဘူးတံၫ်တံၫ်အဂီၫ် အမဲရကၤဟ့ၣ်တၫ်အုၣ်ကီၤအဂ့ၫ် တဲ၀ဲလီၤ.
ဖဲလါမးရှး(၂၈)သီနံၤ ဟီၣ်ခိၣ်ဟူး၀ံၤအလီၫ်ခံ ကီၫ်ပယီၤဒီးကီၫ်ကၠီၣ်တဲၣ်ပူၤ ပှၤလၢဘၣ်သံတဖၣ်အဂီၫ် သူၣ်တမုာ်သးတမုာ်အဂ့ၫ်စ့ၫ်ကီး Sean O’Neillတဲ၀ဲလီၤ.
လၢတၫ်က့ၤသူၣ်ထီၣ်ဆီလီၤက့ၤတၫ်ဆၢကတီၫ်အတီၫ်ပူၤ ယံာ်ထၢ၀ဲအကတီၫ် အမဲရၤကၤကီၫ်စၢဖှိၣ်န့ၣ် ဘၣ်ထွဲဒီးပှၤတ၀ၢတၫ်မၤစၢၤတဖၣ်န့ၣ် ဂဲၤလိာ်ဆီၣ်ထွဲမၤစၢၤ၀ဲတပယူာ်ဃီအဂ့ၫ် အ၀ဲတဲ၀ဲန့ၣ်လီၤ.
တၫ်တၢၣ်ပီၣ်တဲသကိးအပူၤ မုၫ်ထီၣ်ကလံၤထံးအ့ရှၢၣ်ဟီၣ်က၀ီၤပူၤ တၫ်ကကတီၤတၫ်မုာ်တၫ်ခုၣ်ဒီးတၫ်ဘံၣ်တၫ်ဘၢအဂီၫ် အၣ်စံၣ်ယၣ်ဒီးအမဲရၤကၤတဖၣ်န့ၣ် စဲၣ်ဘၢၣ်တၫ်ဘံၣ်တၫ်ဘၢဂ့ၫ်၀ီ,တၫ်ကူၣ်လဲၫ်မၤကၤတၫ်မူၤတၫ်ဘှီး, အိၣ်လဲတၫ်လံၣ်အီၣ်လီအီၣ်ကျိာ်စ့တဖၣ်,တၫ်ဒီသဒၢဒီးတၫ်ခီၣ်ဆၢတၫ်ခီဂာ်ထံကီၫ်တၫ်မၤတပျုာ်တပျီၫ်တဖၣ်အပူၤ တၫ်ကမၤ ဆူၣ်ထီၣ်တၫ်ပာ်ဖှိၣ်မၤသကိးတၫ်တဖၣ်အဂီၫ် ဟ့ၣ်တၫ်အၢၣ်လီၤတဖၣ်အဂ့ၫ် အမဲရၤကၤထံဂုၤကီၫ်ဂၤ၀ဲၤကျိၤ တၫ်ဘိးဘၣ်ရၤလီၤအပူၤ ပာ်ဃုာ်၀ဲန့ၣ်လီၤ.
Ref: rfa
