၀့ၫ်ပလီးအကပၤ တၫ်ခးလိာ်သးအိၣ်ကဲထီၣ်ကဒီး,ဒ၀ဲၫ်-မၠ့းသိလ့ၣ်ကျဲအိၣ်ကးတံာ်သးအဖၢမုၫ်

လါအ့ဖြ့ၣ်(၂၄)သီ,၂၀၂၅နံၣ်

ပလီကီၫ်ဆၣ်,၀့ၫ်ပလီးအကပၤ ဒ၀ဲၫ်-မၠ့းသိလ့ၣ်ကျဲမုၫ်အဖီခိၣ် ဆ့ၣ်ထိကၠံသ၀ီ ဖဲလါအ့ဖြ့ၣ်(၂၃)သီအနံၤ ဂီၤခီအကတီၫ် သုးကီၣ်ကးဒီးကညီဒီကလုာ်တၫ်ထူၣ်ဖျဲးသုးမုၫ်ဒိၣ်-KNLAအဘၢၣ်စၢၤ ခံကပၤတၫ်ခးလိာ်သးကဲထီၣ်အဂ့ၫ် လီၫ်က၀ီၤဖိတဖၣ်တဲ၀ဲလီၤ.

လၢတၫ်ကဒီသဒၢ ၀့ၫ်ပလီးအဂီၫ် သုးကီၣ်ကးအသုးလၢအိၣ်ဆီလီၤအသး ဖဲဘယ့းတီၣ်သ၀ီန့ၣ် ဟဲထီၣ်သုးကျိၤဆူ ဆ့ၣ်ထိကၠံသ၀ီအဃိ တၫ်ခးလိာ်သးကဲထီၣ်ဒီးKNLA သုးရ့ၣ်(၁၂)သုးဖိတဖၣ်လၢအိၣ်ဆီလီၤဃာ်အသး ဖဲဆ့ၣ်ထိကၠံသ၀ီအဂ့ၫ် လီၫ်က၀ီၤဖိတဖၣ်တဲ၀ဲလီၤ.

“ဖဲမဟါနံၤ လၢဘယ့းတီၣ်တကပၤ သုးကီၣ်ကးသုးတဖၣ်လီၤမၫ်၀ဲလီၤ.လၢတနံၤအံၤဂီၤန့ၣ် ဟဲထီၣ်ဆူ ဆ့ၣ်ထိကၠံတကပၤအဃိ ဘၣ်သဂၢၫ်ခးလိာ်သးဒီးKNLAသုးတဖၣ်အဂ့ၫ်”ဆ့ၣ်ထိကၠံသ၀ီ ပှၤလီၫ်အိၣ်ကမှံပိာ်မုၣ်တဂၤတဲ၀ဲလီၤ.

ဖဲဂီၤ(၉)နၣ်ရံၣ်ဃၣ်ဃၣ်န့ၣ် ခံကပၤတၫ်ဘၣ်သဂၢၫ်ခးလိာ်သးကဲထီၣ်၀ံၤ သုးကီၣ်ကးအသုးလၢအိၣ်ဟဲထီၣ် လၢဘယ့းတီၣ်သ၀ီန့ၣ် ဟဲတိဖျိ၀ဲ ဒ၀ဲၫ်-မၠ့းသိလ့ၣ်ကျဲ KNLA သုးရ့ၣ်(၁၂),သုးဒ့(၃) တၫ်သမံသမိးတြဲၤအဂ့ၫ် တၫ်သ့ၣ်ညါဘၣ် လၢသုးဂ့ၫ်၀ီဂ့ၫ်ခီၣ်ထံးတၫ်ကစီၣ်အိၣ်န့ၣ်လီၤ.

“ဖဲဂီၤန့ၣ်ခးလိာ်သးဒီးအိၣ်ဘှံးတဘျးဖိလီၤ.အခဲအံၤ ပ၀ဲKNLAတကပၤ ခးစိဃီၤလၢကျိဖးဒိၣ်လီၤ. ပှၤလီၫ်က၀ီၤဖိလၢ နုာ်လီၤဆူဆ့ၣ်ထိကၠံသ၀ီတနီၤဒု လၢမဟါနံၤန့ၣ် ဃ့ၫ်ဖျိးကွံာ်လၢာ်လံအဂ့ၫ်”သုးဂ့ၫ်၀ီဂ့ၫ်ခီၣ်ထံးတၫ်ကစီၣ်တဂၤ လၢအိၣ်ဘူးဒီးKNLAတဲ၀ဲန့ၣ်လီၤ.

ဖဲလါအ့ဖြ့ၣ်(၂၁)သီ,ဟါအနၣ်ရံၣ်(၁၀)တခီဃၣ်ဃၣ်အကတီၫ် သုးကီၣ်ကးကလံၤသုး တ့ၫ်လီၤမ့ၣ်ပိၫ်(၁)ဖျၢၣ် ဖဲဆ့ၣ်ထိကၠံဒီးအ့မးသ၀ီ(၂)ဖျၢၣ်အဂ့ၫ် ဆ့ၣ်ထိကၠံပှၤသ၀ီဖိတဖၣ်တဲ၀ဲလီၤ.

ဒ်န့ၣ်အသိး သုးကီၣ်ကးအသုး တ့ၫ်လီၤကဒီးမ့ၫ်ပိၫ်(၁၃)ဖျၢၣ်ဃၣ်ဃၣ် ဖဲ၀့မး,မ့ဒး,သဲခၠီသါသ၀ီတဖၣ်အဂ့ၫ် လီၫ်က၀ီၤဖိတဖၣ်တဲ၀ဲလီၤ.

ဖဲတၫ်ဒုး၀ဲန့ၣ်အပူၤ ပှၤလီၫ်က၀ီၤဖိဘၣ်ဒိဘၣ်ထံးတအိၣ်အသိး,ခံကပၤတၫ်ဘၣ်ဒိဘၣ်ထံးအိၣ်တအိၣ် တၫ်တနၫ်ဟူဒံးဘၣ်အဂ့ၫ် ဆ့ၣ်ထိကၠံသ၀ီဖိတဖၣ်တဲ၀ဲလီၤ.

တၫ်ပၢၫ်ဆၢသုးပာ်ဖှိၣ်လၢKNLAတီခိၣ်ရိၣ်မဲ၀ဲတဖၣ် ခး၀ဲ ၀့၀းဟီၣ်က၀ီၤပၢၤကီၫ်သုးကလၢၤ လၢအိၣ်ဖဲဒ၀ဲၫ်-မၠ့းသိ လ့ၣ်ကျဲမုၫ်အဖီခိၣ်၀ံၤအလီၫ်ခံ သုးကီၣ်ကးအသုးန့ၣ် ဖဲလါအ့ဖြ့ၣ်(၁၉)သီနံၤန့ၣ်(၁)ဘျီ,(၂၁)သီအနံၤ မုၫ်ဆါခီန့ၣ် (၁)ဘျီ,ဟါအနၣ်ရံၣ်(၁၀)တခီဃၣ်ဃၣ်န့ၣ်(၁)ဘျီ တ့ၫ်လီၤမ့ၣ်ပိၫ်လၢကလံၤကျါန့ၣ်လီၤ.

ခံကပၤတၫ်ဒုးတဖၣ်ဒီးကလံၤကျါတၫ်ခးလီၤတၫ်တဖၣ်အဃိ ဒ၀ဲၫ်-မၠ့းသိလ့ၣ်လၢလြၤထီၣ်က့ၤလီၤတဖၣ် စးထီၣ်ဖဲလါအ့ဖြ့ၣ်(၁၈)သီနံၤတုၤလၢကတီၫ်အံၤ အိၣ်ကးတံာ်ကွံာ်အသးလၢကျဲ၀ံၤ ပှၤဟးထီၣ်က့ၤလီၤဖိတနီၤ ဘၣ်ဟ့ၣ်၀ဲစ့(၃)ကလီၫ်၀ံၤ ဘၣ်လဲၤထီၣ်က့ၤလီၤလၢSpeed Boatတဖၣ်အဂ့ၫ်န့ၣ်လီၤ.

၀့ၫ်တကူၣ်-ဒ၀ဲၫ်-မၠ့း-ကီးသီကျဲန့ၣ် ပနံာ်ဃ့,ပနံာ်သံသိတဖၣ် တၫ်ဆှၢထီၣ်ဆှၢလီၤ၀ဲအသိး, ပနံာ်ဟးထီၣ်လၢထံကျါဒီး ဒ်သိးပနံာ်သံသိ တဘၣ်ဘိၣ်ခိၣ်,တကီၤဆံၣ်,ဒူရ့သၣ်,တဲၣ်တီသၣ်တဖၣ် စ့ၫ်ကီးတၫ်ကူၣ်လဲၫ်မၤကၤဆှၢထီၣ်ဆှၢလီၤ၀ဲ လီၤ.

သိလ့ၣ်လၢအိၣ်ဟဲလၢဒ၀ဲၫ်တကပၤန့ၣ် ဘၣ်ဟဲတုၤဒၣ်ထဲ စိၣ်စ့ၣ်ဖၠါသ၀ီ၀ံၤ သိလ့ၣ်လၢအိၣ်ဟဲလၢမၠ့းတကပၤတခီ ဘၣ်ဟဲတုၤဒၣ်ထဲ ၀့ၫ်ပလီအကပၤဧိၤလီၤအဂ့ၫ် တၫ်သ့ၣ်ညါဘၣ်လၢ ပှၤနီသိလ့ၣ်ဖိဒီးပှၤဟးထီၣ်က့ၤလီၤတဖၣ် အိၣ် န့ၣ်လီၤ.

Ref: Dawei Watch