လါအ့ဖြ့ၣ်(၂၃)သီ,၂၀၂၅နံၣ်
ရၢရှၢၣ်ဒီးယူၣ်ကရ့တဖၣ်န့ၣ် မၤဟးဂီၤအဲၣ်စထၢၣ်တၫ်ပတုာ်တၫ်ခးအဂ့ၫ် ပာ်ဒ့ၣ်ပာ်ကမၣ်လိာ်သးကဒဲကဒဲ၀ံၤ မၤတၫ်ဒုးတၫ်ယၤတဖၣ်အါအါဂီၫ်ဂီၫ်အဂ့ၫ် ခံကပၤလၢာ် ပာ်ဒ့ၣ်ပာ်ကမၣ်လိာ်သးန့ၣ်လီၤ.
ရၢရှၢၣ်ကီၫ်ခိၣ် ပလၣ်ဒံၣ်မံၣ်ယၣ်ပူၣ်တ့ၣ်န့ၣ် တၫ်သဘံၣ်သဘုၣ်ကဲထီၣ်ဒီးယူၣ်ကရ့အဖီခိၣ် လၢအဲၣ်စထၢၣ်တၫ်ဆၢကတီၫ်အတီၫ်ပူၤ ပတုာ်တၫ်ခးတခီတၢၤအဂ့ၫ် ဖဲလါအ့ဖြ့ၣ်(၁၉)သီအနံၤန့ၣ် ဘိးဘၣ်ရၤလီၤ၀ဲလီၤ.
ရၢရှၢၣ်တၫ်ဒီသဒၢကိတိာ်၀ဲၤကျိၤန့ၣ် ပူတ့ၣ်အတၫ်ကလုၫ်အဖီခိၣ် လၢတၫ်ဒုးလီၤဆီဟီၣ်က၀ီၤအပူၤ ရၢရှၢၣ်သုးဖိတဖၣ် ဖဲလါအ့ဖြ့ၣ်(၁၉)သီ,မီၣ်စကိၣ်နီၫ်ထိၣ် စးထီၣ်ဖဲဟါ(၆)နၣ်ရံၣ်န့ၣ် ဘၣ်ထွဲဒီးတၫ်ပတုာ်တၫ်ခးတၫ်အိၣ်သးန့ၣ် အိၣ်ခိးကွၫ်၀ဲဃံးဃံးအဂ့ၫ် တဲ၀ဲလီၤ.
ဘၣ်ဆၣ်နာ်သက့ ယူၣ်ကရ့သုးန့ၣ် ဟဲခးရၢရှၢၣ်တၫ်လီၫ်တဖၣ်လၢကျိဒီးမီၣ်တၣ်တဖၣ်(၄၄၄)ဘျီ၀ံၤ ဒုး၀ဲဒီးကဘီယူၤလၢတလိၣ်ပှၤနီအခိၣ်(၉၀၀)အဃိ ကမျၢၫ်ဘၣ်သံဘၣ်ပှၫ်ဒီးကမျၢၫ်တၫ်သူၣ်ထီၣ်တဖၣ် ဘၣ်ဟးဂီၤ၀ဲအဂ့ၫ် တၫ်ဘိးဘၣ်ရၤလီၤအပူၤ ပာ်ဖျါ၀ဲလီၤ.
ယူၣ်ကရ့ကီၫ်ခိၣ် ဘိၣ်လိၣ်ဒံၣ်မၣ်စလါစကံန့ၣ် ဖဲလါအ့ဖြ့ၣ်(၂၀)သီနံၤ မုၫ်ထူၣ်(၁၂)နၣ်ရံၣ်န့ၣ် ဒိကနၣ်၀ဲယူၣ်ကရ့သုး မုၫ်ဒိၣ် တၫ်ဒီသဒၢသုးရိၣ်မဲခိၣ်ကျၢၫ် အိၣ်လဲးစၣ်ဒၣ် စံၣ်ယၣ်စကံၣ် တၫ်မဲာ်ညါတၫ်ဒုးဘျီတၫ်အိၣ်သးလံာ်ပာ်ဖျါတဖၣ်၀ံၤ ဖဲတနံၤဃီ၀ဲန့ၣ် လၢအ၀ဲအထဲၣ်လံၣ်ကရၣ်အပူၤ ပာ်ဖျါ၀ဲလီၤ.
ဖဲလါအ့ဖြ့ၣ်(၂၀)သီနံၤ စးထီၣ်ဖဲဂီၤ(၁၀)နၣ်ရံၣ်န့ၣ် ရၢရှၢၣ်ဒုးအါထီၣ်တၫ်လၢမျိာ်သၣ်ဒီးဒြိတဖၣ်အနီၫ်ဂံၫ်နီၫ်ဒွးအိၣ် အါထီၣ်၀ံၤ ရၢရှၢၣ်အတၫ်သူ၀ဲ FPVဒြိအါထီၣ်၀ဲအဂ့ၫ် စလါစကံၣ် တဲဖျါတ့ၫ်၀ဲလၢမံၣ်ဒံၣ်ယၣ်ဖိးအပူၤန့ၣ်လီၤ.
ရၢရှၢၣ်သုးန့ၣ် စးထီၣ်ဖဲမုၫ်ဃုနံၤဂီၤခီအကတီၫ်တုၤမုၫ်အိၣ်ဘှံးနံၤ မုၫ်ထူၣ်(၁၂)နၣ်ရံၣ်အတီၫ်ပူၤ မၤ၀ဲဒုးယၤဂ့ၫ်ဂီခဲလၢာ်ပာ်ဖှိၣ် (၂၆)ဘျီအဂ့ၫ် ယူၣ်ကရ့ကီၫ်ခိၣ်တဲ၀ဲလီၤ.
အဲၣ်စထၢၣ်တၫ်ဆၢကတီၫ်အတီၫ်ပူၤ တၫ်ပတုာ်တၫ်ခးန့ၣ် တၫ်ကကတီၤဃာ်အဂီၫ် ရၢရှၢၣ်အတၫ်အၢၣ်လီၤ လၢမၤကမၣ်၀ဲတဖၣ် ယူၣ်ကရ့ ဟံးန့ၫ်ဃာ်စရီ၀ံၤ တၫ်ဂ့ၫ်တၫ်ကျိၤတဖၣ် ကဆှၢ၀ဲဆူသိၣ်မှံၤတဖၣ်အိၣ်အဂ့ၫ် စလါစကံၣ် တဲ၀ဲလီၤ.
တၫ်ကဟ့ၣ်မီၫ်သီမီၫ်လါတၫ်ခွဲးတၫ်ယာ်အဂီၫ် အဲၣ်စထၢၣ်အမူးမ့ၫ်၀ံၤအလီၫ်ခံ အစှၤကတၢၫ်အသီ(၃၀)တၫ်ကကတီၤဃာ်တၫ်ပတုာ်တၫ်ခးအဂီၫ် ဟ့ၣ်တၫ်ဆီၣ်သနံးတဲဆီၣ်တခူထီၣ် ရၢရှၢၣ်အဂ့ၫ် စလါစကံတဲတ့ၫ်၀ဲလီၤ.
Ref: DVB
