လါအ့ဖြ့ၣ်(၂၄)သီ,၂၀၂၅နံၣ်
ကီၢ်ခိၣ်ထရၢးပဒိၣ် ကမၤစၢၤက့ၤ VOAတၢ်ကစီၣ်သန့ဒီး တၢ်ကစီၣ်သန့အဂၤလၢ အမဲရၤဆီၣ်ထွဲတ့ၢ်ဃၥ်၀ဲတဖၣ်အံၤအဂီၢ် ဖဲၣ်ဒရၢၣ်စံၣ်ညီၣ်ကွီၢ် ပၥ်လီၤ၀ဲတၢ်ကလုၢ်၀ံၤ တၢ်ဂုၥ်ကျဲးစၢးလၢ တၢ်ကဆိကတီၤကွံၥ် VOAတဖၣ်အံၤ မ့ၢ်ဒၣ်တၢ်မၤကမၣ် ဂံၢ်ခီၣ်ထံးတၢ်ဘျၢသဲစးခိၣ်သ့ၣ်အဂ့ၢ် ဆၢတဲၥ်လီၤ၀ဲန့ၣ်လီၤ.
ခီဖျိကီၢ်ခိၣ်ဒီၣ်နၢၤထရၢးအတၢ်ကလုၢ်အဃိ VOAအပှၤမၤတၢ်ဖိ(၁၃၀၀)ဘျဲၣ် လီၤဆီဒၣ်တၢ် ပှၤထၢတၢ်ကစီၣ်ဖိ(၁)ကထိဃၣ်ဃၣ်အံၤ တၢ်ဟ့ၣ်လါလဲဒီးတၢ်ထုးကွံၥ်အီၤလၢတၢ်မၤအပူၤန့ၣ်လီၤ. ထရၢးပဲၥ်အၢပဲၥ်သီ၀ဲလၢ VOAအံၤ မၤ၀ဲတၢ်ထီဒါထရၢးအဂ့ၢ်န့ၣ်လီၤ.
ဖဲၣ်ဒရၢၣ်စံၣ်ညီၣ်ကွီၢ် Royce Lamberthအံၤ ခီဖျိထရၢးပဒိၣ်အတၢ်မၤတဖၣ်အဃိ VOAလၢအမၤတ့ၢ်အနံၣ်(၈၀)အံၤ တၢ်စံၣ်စိၤတဲစိၤအပူၤ အဆိကတၢၢ်တဘျီ ထုးထီၣ်ဘိးဘၣ်ရၤလီၤ၀ဲ တၢ်ကစီၣ်တန့ၢ်လၢၤဘၣ်အဂ့ၢ် စံး၀ဲန့ၣ်လီၤ.
ထရၢးပဒိၣ်အတၢ်မၤတဖၣ်အံၤ ကွၢ်ကပၤတ့ၢ်၀ဲ ပှၤမၤတၢ်ဖိ,ပှၤမၤတၢ်လၢလံၥ်ဟံးဃၥ်တဖၣ်, ပှၤထၢတၢ်ကစီၣ်ဖိတဖၣ်ဒီး ဟီၣ်ခိၣ်ဒီဘ့ၣ် ပှၤကွၢ်တၢ်ကစီၣ်ဖိတဖၣ်အဖီခိၣ် တၢ်ဘၣ်ဒိဘၣ်ထံးတဖၣ်အဂ့ၢ် စံၣ်ညီၣ်ကွီၢ်စံး၀ဲန့ၣ်လီၤ.
စံၣ်ညီၣ်ကွီၢ်နဲၣ်လီၤဃၥ်၀ဲလၢ တၢ်ကဟ့ၣ်က့ၤ တၢ်မၤလၢပှၤမၤတၢ်ဖိတဖၣ်ဒီးပှၤမၤတၢ်လၢလံၥ်ဟံးဃၥ်အဂီၢ်အသိး တၢ်ကမၤစၢၤက့ၤ Radio Free Asia ဒီးမုၢ်ထီၣ်ချၢၣ်သး တၢ်ဘိးဘၣ်ရၤလီၤပှၥ်ဘျးစဲတဖၣ် စ့ပၥ်ကီၤတဖၣ်အဂီၢ်န့ၣ်လီၤ.
တကးဘၣ် ထရၢးပဒိၣ်အတၢ်မၤတဖၣ်အံၤ အိၣ်ဒီးတၢ်မၤကမၣ်လၢ ဟီၣ်ခိၣ်ဒီဘ့ၣ် တၢ်ဘိးဘၣ်ရၤလီၤ သဲစးတၢ်ဘျၢဒီး ခီကရဲးအစ့ပၥ်ကီၤ တၢ်နီၤလီၤအခွဲးအယၥ်တဖၣ်အဖီခိၣ်အဂ့ၢ် စံၣ်ညီၣ်ကွီၢ် ဆၢတဲၥ်လီၤ၀ဲန့ၣ်လီၤ. မ့မ့ၢ်လၢဟံၣ်၀ါတခီ ဘၣ်ထွဲဒီးစံၣ်ညီၣ်ကွီၢ် အတၢ်ကလုၢ်အဖီခိၣ် ခီၣ်ဆၢက့ၤ၀ဲတအိၣ်နီတမံၤဒံးဘၣ်န့ၣ်လီၤ.
၀့ၢ်နယူယီး စံၣ်ညီၣ်ကွီၢ်လီၤဆီတဂၤစ့ၢ်ကီး စံး၀ဲထရၢးပဒိၣ်လၢ ပှၤထၢတၢ်ကစီၣ်ဖိဒီးပှၤမၤတၢ်ဖိကရၢတဖၣ် အတၢ်လိၥ်ဘၢလိၥ်ကွီၢ်ဃၥ် ထရၢးပဒိၣ်အဖီခိၣ် ထရၢးပတုၥ်ဃၥ် အတၢ်ကလုၢ်တစိၤတလီၢ်၀ံၤ တၢ်မၤတဖၣ်အံၤန့ၣ် မ့ၢ်ဒၣ်အတအိၣ်ဒီးသဲစးတၢ်ဘျၢအတကွီၢ်ပူၤဘၣ်အဂ့ၢ်န့ၣ်လီၤ.
Ref: thet htwe naing
