လါအ့ဖြ့ၣ်(၂၃)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဟီၣ်က၀ီၤတဖၣ်အပူၤ တနွံအတီၢ်ပူၤ ခီဖျိသုးမီၤစိရိၤအသုး ဟဲတ့ၢ်လီၤမ့ၣ်ပိၢ်တဖၣ်အဃိ သီခါတဖၣ်ပၣ်ဃဒၥ် ကမျၢၢ်(၂)ဂၤသံ၀ဲဒီး လီၢ်က၀ီၤကမျၢၢ်ဖိ(၅)ကလးဘျဲၣ် ဘၣ်ဃ့ၢ်ပူၤဖျဲးသးအဂ့ၢ်န့ၣ် တလၢၤဒီးကညီကီၢ်စဲၣ်ပူၤ ပှၤလၢမၤစၢၤပှၤလီၢ်အိၣ်ကမှံဖိတဖၣ် စံး၀ဲန့ၣ်လီၤ.
စးထီၣ်လၢလါအ့ဖြ့ၣ်(၁၄)သီတုၤ(၂၁)သီအနံၤအတီၢ်ပူၤ သုးမီၤစိရိၤအသုး ဟဲတ့ၢ်လီၤမ့ၣ်ပိၢ်တဖၣ်ဆူ ကီၢ်သူလ့ၤတၢ်ပၢဟီၣ်က၀ီၤတဖၣ်ဒ်အမ့ၢ် ဘံလ့,သထူၣ်, ဖၣ်အၣ်, ဖၣ်ပူၣ်,ကီးတရံး,ကြုၢ်တုလီၢ်က၀ီၤတဖၣ်ပူၤအဃိ သီခါတဖၣ်ပၣ်ဃုၥ် ကမျၢၢ်(၂၀)ဂၤသံ၀ဲဒီးဘၣ်ဒိ၀ဲ(၃၀)ဂၤဘျဲၣ်အသိး လီၢ်က၀ီၤကမျၢၢ်(၅)ကလးဘျဲၣ် ဘၣ်ဃ့ၢ်ပူၤဖျဲးသးအဂ့ၢ် တၢ်သ့ၣ်ညါဘၣ်လၢ ပှၤလီၢ်အိၣ်ကမှံဖိတဖၣ်အအိၣ်န့ၣ်လီၤ.
“လါအ့ဖြ့ၣ်(၁၄)သီအနံၤန့ၣ် သုးကီၣ်ကးဟဲတ့ၢ်လီၤမ့ၣ်ပိၢ် ဖဲကြုၢ်တု၀့ၢ်, ကါနံၣ်သီခါဖၠၣ်ဒီး တုၤလၢလါအ့ဖြ့ၣ်(၂၁)သီအနံၤ ဟဲတ့ၢ်လီၤကဒီးမ့ၣ်ပိၢ်ဆူ ဘံလ့, ဃီဖိပျဲၢ်သီခါဖၠၣ်န့ၣ်လီၤ. ဖၣ်ပူၣ်, ကတၢတံး, ဖၣ်အၣ်, တဂ့ၤလီ, ကီးတရံးအ့ကၠံ, မံးကလိၣ်, နွါခၠၣ်ကိဒီးသ၀ီခဲလၢၥ်(၂၀)ဘျဲၣ်ပူၤစ့ၢ်ကီး ဟဲတ့ၢ်လီၤမ့ၣ်ပိၢ်န့ၣ်လီၤ. တၢ်သံတၢ်ပှၢ်တခီ သီခါ, ပှၤလီၢ်က၀ီၤဖိ, ပှၤဖိသၣ်, တကွဲဖိတဖၣ် သံ၀ဲ(၂၀)ဂၤဘျဲၣ်၀ံၤ ဘၣ်ဒိ၀ဲ(၃၀)ဂၤဘျဲၣ်အသိး ပှၤသံလၢတၢ်ထၢစရီတဖၣ်စ့ၢ်ကီးအိၣ်၀ဲအဂ့ၢ်” ကရူၢ်တဖုလၢ အမၤစၢၤ KNUဟီၣ်က၀ီၤပူၤ ပှၤလီၢ်အိၣ်ကမှံဖိတဖၣ် န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ပၢဟီၣ်က၀ီၤ သုးက့(၁), သုးက့(၅), သုးက့(၆), သုးက့(၇)ဟီၣ်က၀ီၤတဖၣ်အပူၤ သုးကီၣ်ကးဟဲတ့ၢ်လီၤမ့ၣ်ပိၢ်ဒီးခီဖျိတၢ်ဒုးတဖၣ်အဃိ ပှၤစံၣ်သုးပှၤလီၢ်အိၣ်ကမှံဖိအိၣ်ထီၣ်၀ဲ (၅)ကလးဘျဲၣ်လံန့ၣ်လီၤ. တၢ်မ့ၢ်ဟဲတ့ၢ်လီၤကဒီး၀ဲတပယူၥ်ဃီန့ၣ် ပှၤလီၢ်အိၣ်ကမှံဖိဟဲအိၣ်အါထီၣ်သ့အဂ့ၢ် အ၀ဲစံး၀ဲန့ၣ်လီၤ.
လါအ့ဖြ့ၣ်(၂၁)သီအနံၤ, ဂီၤ(၃း၃၀)နၣ်ရံၣ်အဆၢကတီၢ်တုၤ(၆)နၣ်ရံၣ်အဆၢကတီၢ် သုးကီၣ်ကးအသုး ဟဲတ့ၢ်လီၤမ့ၣ်ပိၢ်ဆူ ကီးတရံးကီၢ်ဆၣ်, ကြုၢ်တု၀့ၢ်အပူၤ ယံၤ(၃)နၣ်ရံၣ်ဃၣ်ဃၣ်အဂ့ၢ်ဒီး တၢ်သံတၢ်ပှၢ်ဒီးတၢ်ဘၣ်ဒိဘၣ်ထံးတဖၣ် အိၣ်၀ဲအဂ့ၢ်န့ၣ် KNLA ဂံၢ်ခီၣ်ထံးသုးဂ့ၢ်၀ီတၢ်ကစီၣ်စံး၀ဲန့ၣ်လီၤ. “ဟါလီၤခီအဆၢကတီၢ်န့ၣ် ဟဲကွၢ်ဟုၣ်ကွၢ်စုၣ်တၢ်လၢ ဒြိဒီးကဘီယူၤဒုးသုးတဖၣ်လီၤ. လီတဲစိတၢ်ဆဲးကျိးတဖၣ်တန့ၢ်လၢၤဘၣ်. ဂီၤ(၃း၃၀)နၣ်ရံၣ်အဆၢကတီၢ် တၢ်နၢ်ဟူဘၣ် Y-12ကဘီယူၤအကလုၢ်၀ံၤတ့ၢ်လီၤ၀ဲမ့ၣ်ပိၢ်တဖၣ်လီၤ. အနီၢ်နီၢ်န့ၣ် ဆိမိၣ်၀ဲလၢ ကညီ, တလၢၤဒီး PDFပှၤဖီၣ်စုက၀ဲၤကရၢအိၣ်တၢ်လီၢ်ဒီးသ၀ီတဖၣ်အဃိ တ့ၢ်လီၤ၀ဲန့ၣ်လီၤ. ခဲအံၤတၢ်သ့ၣ်ညါဘၣ်န့ၣ် ကလံၤထံးကမၣ်ယဲး,မၠီကမၣ်ယဲး, သမ့ဒိး, ၀့ကးတဖၣ်အပူၤ ဟဲတ့ၢ်လီၤ၀ဲမ့ၣ်ပိၢ်တဖၣ်လီၤ. တၢ်ကသ့ၣ်ညါဘၣ် တၢ်ဘၣ်ဒိဘၣ်ထံး,တၢ်ဟးဂုၤဟးဂီၤဒီး တၢ်ကမၤပူၤဖျဲးပှၤသ၀ီဖိတဖၣ်အဂီၢ်န့ၣ် ခီဖျိမူခိၣ်စူၤဒိၣ်ဒီးကျဲဟးဂီၤအဃိ တၢ်မၤပူၤဖျဲးအီၤတန့ၢ်ဒံးဘၣ်”အဂ့ၢ် KNUဂံၢ်ခီၣ်ထံးသုးဂ့ၢ်၀ီတၢ်ကစီၣ်စံး၀ဲန့ၣ်လီၤ.
ကတီၢ်ခဲအံၤန့ၣ် ခ့ၣ်အဲၣ်ယူၣ်တၢ်ပၢဟီၣ်က၀ီၤတဖၣ်အပူၤ သုးကီၣ်ကးအသုးကလၢၤလၢ ဘၣ်ပျၢ်ကွံၥ်၀ဲတဖၣ် ဒ်သိးကန့ၢ်က့ၤအဂီၢ် မၤ၀ဲကလံၤကျါဒုးယၤရဲၣ်ကျဲၤတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
“အခဲအံၤ Y12န့ၣ် ဟဲထီၣ်လၢ မီၣ်လမၠဲၣ်(ဃိၣ်ထၣ်၀့ၢ်)လီၤ. ကဘီယူၤဒုးသုးတခီ ဟဲထီၣ်လၢ တီအူတပၤန့ၣ်လီၤ. ဟီၣ်ခိၣ်မဲၥ်ဖံးခိၣ်န့ၣ်ခီဖျိ အပှၤတလၢတလီၢ်ဘၣ်အဃိ ပှၤ၀ဲဒုးယၤရဲၣ်ကျဲၤဒ် ဟဲတ့ၢ်လီၤမ့ၣ်ပိၢ်လၢကလံၤကျါဒီး ကထီၣ်ဒုးတၢ်လၢဟီၣ်ခိၣ်မဲၥ်ဖံးခိၣ်လီၤ. မ့ၢ်လိၣ်သပှၢ်ကတၢၢ်န့ၣ် ကသူ၀ဲ ဖၣ်အၣ်ဒီးတီၣ်ကလ့ကဘီယူၤသန့လၢ သူကဘီယူၤပျီအသိးအဂ့ၢ်”န့ၣ် ပှၤလၢအိၣ်ဘူးဒီး ကညီကီၢ်စဲၣ်သုးကီၣ်ကးဂံၢ်ခီၣ်ထံးတၢ်ကစီၣ်တဲဖျါထီၣ်၀ဲန့ၣ်လီၤ.
Ref: Hlaing Info
