လါအ့ဖြ့ၣ်(၂၂)သီ,၂၀၂၅နံၣ်
ပရံၣ်ကၠံၣ်စီၤသီအဒိၣ်ကတၢၢ် ဖရၢးစ့းအံၤ အသးအိၣ်(၈၈)နံၣ်န့ၣ် စူးကွံၥ်အသးလံအဂ့ၢ် ဘၣ်တံၣ်ကၣ်ပၥ်ဂၢၢ်ပၥ်ကျၢၤ ဘိးဘၣ်ရၤလီၤဃၥ်၀ဲန့ၣ်လီၤ.
ပရံၣ်ကၠံၣ်စီၤသီအဒိၣ်ကတၢၢ် ဖရၢးစ့းအံၤ စူးကွံၥ်အသးလၢ အအိၣ်တၢ်လီၢ် ဘၣ်တံၣ်ကၣ် Casa Santa Martaတၢ်လီၢ်၀ံၤ အတၢ်အိၣ်မူတစိၤသးန့ၣ် ဟ့ၣ်လီၤတ့ၢ်၀ဲလၢကစၢ်ယွၤဒီးတၢ်အိၣ်ဖှိၣ်တၢ်ဖံးတၢ်မၤအပူၤအဂ့ၢ်န့ၣ် ဘၣ်တံၣ်ကၣ်အလံၥ်ဘိးဘၣ်ရၤလီၤအပူၤ ပၥ်ဖျါဃၥ်၀ဲန့ၣ်လီၤ.
ပရံၣ်ကၠံၣ်စီၤသီအဒိၣ်ကတၢၢ် ဖရၢးစ့းအံၤ အံၣ်စတၣ်မူးပွဲဖးဒိၣ်အဆၢကတီၢ် ဒ်သိးကဆိၣ်ဂ့ၤဃ့ဘါထုးကဖၣ်န့ၢ် ပှၤအထိတဖၣ်အဂီၢ် ဟဲပၥ်ဖျါအသးလၢပှၤအါဂၤအိၣ်အလီၢ်၀ံၤအလီၢ်ခံ တသီအကတီၢ်န့ၣ် စူးကွံၥ်အသးန့ၣ်လီၤ.
သးနံၣ်(၈၈)နံၣ်အိၣ် စီၤသီဖးဒိၣ်အံၤ ခီဖျိတူၢ်ဘၣ်၀ဲ တၢ်သါထီၣ်သါလီၤအကျိၤတၢ်ဆါလၢလီၤဂၥ်ဒ်သိး တၢ်သးဘံးတၢ်ဆါအဃိ ဖဲလါဖ့ၤဘြူၤအါရံၤ(၁၄)သီအနံၤန့ၣ် လဲၤကူစါယါဘျါအသးလၢ ၀့ၢ်ရိမးအိၣ်တၢ်ဆါဟံၣ်၀ံၤအလီၢ်ခံ လၢတယံၤတမီၤဒံးဘၣ်န့ၣ် ဟဲက့ၤလီၤတၢ်ဆါဟံၣ်န့ၣ်လီၤ.
ပရံၣ်ကၠံၣ်စီၤသီအဒိၣ်ကတၢၢ် ဖရၢးစ့းအံၤ ဖဲ၂၀၂၃နံၣ် လါမးရှးအတီၢ်ပူၤစ့ၢ်ကီး ခီဖျိတၢ်သါထီၣ်သါလီၤအကျိၤတၢ်ဆါအဃိ ဘၣ်လဲၤယါဘျါအသးလၢတၢ်ဆါဟံၣ်န့ၣ်လီၤ. ဖဲအနံၣ် လါယူၤအတီၢ်ပူၤန့ၣ် ဘၣ်ကွဲးကါ၀ဲ ကဖုအကျိၤန့ၣ်လီၤ.
စီၤသီဖးဒိၣ်အံၤ ဖဲလၢအသးအိၣ်(၂၁)နံၣ်လံၤလံၤန့ၣ် ဘၣ်ထုးကွံၥ်၀ဲ အပသိၣ်တက့တခီန့ၣ်လီၤ. တကးဘၣ်အဟံးမူဒါဒ် ပရံၣ်ကၠံၣ်ခိၣ်နၢ်ဒိၣ်ထီအသိး အဆၢကတီၢ်(၁၂)နံၣ်အတီၢ်ပူၤစ့ၢ်ကီး ဘၣ်လဲၤထီၣ်၀ဲတၢ်ဆါဟံၣ်အဘျီတဖၣ်အဘျီ၀ံၤ ဘၣ်သဂၢၢ်၀ဲဒၣ်ဒီးဆူၣ်ချ့တၢ်ဂ့ၢ်ကီတဖၣ်န့ၣ်လီၤ.
Ref:BBC
