လါအ့ဖြ့ၣ်(၂၁)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီးတရံးကီၢ်ဆၣ်ဒီးကြုၢ်တုအဘၢၣ်စၢၤ တၢ်ဒုးတဖၣ်ဆူၣ် ထီၣ်တုၤလၢလါအ့ဖြ့ၣ်(၂၀)သီအနံၤအဂ့ၢ် လီၢ်က၀ီၤဖိတဖၣ်ဒီးတလၢၤတၢ်ထူၣ်ဖျဲးသုးမုၢ်ဒိၣ်(MLA) စံး၀ဲန့ၣ်လီၤ.
၀့ၢ်ကီးတရံးဒီးကြုၢ်တုကီၢ်ဆၣ်အဘၢၣ်စၢၤ အ့ရှၢကျဲမုၢ်အကပၤဒီတကျိၤအဖီခိၣ် စးထီၣ်လၢလါအ့ဖြ့ၣ်(၁၄)အနံၤ တၢ်ဒုးဆူၣ်ထီၣ်လၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်ဒီးသုးကီၣ်ကးအသုးအဘၢၣ်စၢၤအပူၤ သုးကီၣ်ကးတပၤ ဟဲခးတၢ်လၢကလံၤကျါအဂ့ၢ် တၢ်သ့ၣ်ညါဘၣ်န့ၣ်လီၤ.
တၢ်ဒုးအပူၤ သုးကီၣ်ကးဟဲခးလီၤတၢ်လၢကလံၤကျါအဃိ လါအ့ဖြ့ၣ်(၁၅)သီအနံၤန့ၣ် ကြုၢ်တု၀့ၢ်, ကါနံၣ်ဒိဂ့ၤတဲၥ်သ၀ီပူၤ(၆)ဂၤ, လါအ့ဖြ့ၣ်(၁၆)သီအနံၤန့ၣ် နွါခၠၣ်ကိသ၀ီပူၤ (၇)ဂၤ, ကီးတရံးကီၢ်ဆၣ်, မၠီးကမၣ်ယဲးသ၀ီပူၤမိၢ်ဒၢ(၁)ဂၤ,လါအ့ဖြ့ၣ်(၁၈)သီအနံၤန့ၣ်ကီးတရံးကီၢ်ဆၣ်,သလွဲထီၣ်သ၀ီပူၤ(၁)ဂၤခဲလၢၥ်ပၥ်ဖှိၣ်(၁၅)ဂၤဘၣ်သံ၀ဲအဂ့ၢ်တၢ်သ့ၣ်ညါဘၣ်လၢတလၢၤတၢ်ထူၣ်ဖျဲးသုးမုၢ်ဒိၣ်အတၢ်မၤနီၣ်စရီအဖီခိၣ်န့ၣ်လီၤ.
တၢ်ဒုးတဖၣ်အဃိ ကီၢ်တရံး၀့ၢ်ပူၤလီၢ်က၀ီၤဖိတဖၣ် ဂုၥ်ကျဲးစၢးဟးထီၣ်ဘၣ်ဆၣ် ဟးထီၣ်၀ဲတန့ၢ်ဘၣ်ဒီး အိၣ်ကးတံၥ်သးအဂ့ၢ် ပှၤတ၀ၢတၢ်မၤစၢၤကရၢဖိတဂၤ စံး၀ဲန့ၣ်လီၤ.
“ဂုၥ်ကျဲးစၢးနုၥ်လီၤလၢ ကီးတရံး၀့ၢ်ပူၤတန့ၢ်ဘၣ်. စးထီၣ်လၢတၢ်ဒုးကဲထီၣ်လံၤလံၤဒီးတုၤခဲအံၤန့ၣ် တၢ်ကမၤစၢၤအဂီၢ် လဲၤနုၥ်လီၤ၀ဲတန့ၢ်ဘၣ်. ပှၤအိၣ်လၢ၀့ၢ်ပူၤတဖၣ်စ့ၢ်ကီး ဟးထီၣ်၀ဲတန့ၢ်ဘၣ်. ကးတံၥ်ဃၥ်ကျဲတခီ ကးတံၥ်ဃၥ်၀ဲ ခံခီခံကပၤလၢၥ်အဂ့ၢ်” အ၀ဲစံး၀ဲန့ၣ်လီၤ.
တၢ်ဒုးဒီးကလံၤကျါတၢ်ဒုးတဖၣ်အဃိ ကီးတရံး၀့ၢ်းကြုၢ်တုအဘၢၣ်စၢၤသ၀ီတဖၣ်ဒ်အမ့ၢ် ကီး၀ၣ်လဲ, နီၢ်တမံ, ၀့ပၠး, နွါခၠၣ်ကိ, ကါနံၣ်, သယဲးတီ, သလွဲထီၣ်, ကမၣ်ယဲးပၣ်ဃုၥ် သ၀ီ(၁၀)ဖျၢၣ်အပူၤ လီၢ်က၀ီၤကမျၢၢ်တကလးဘျဲၣ် ဘၣ်ဃ့ၢ်ပူၤဖျဲးသးအဂ့ၢ် တၢ်သ့ၣ်ညါဘၣ်န့ၣ်လီၤ.
မ့မ့ၢ်လၢသုးကီၣ်ကးတခီ ဖဲလါအ့ဖြ့ၣ်(၁၈)သီအနံၤန့ၣ် PDFကရၢတဖၣ် ခးလီၤကျိဖးဒိၣ်လၢ ကီးတရံး၀့ၢ်ပူၤ, အဃိ လီၤတဲၥ်ပိၢ်ဖးထီၣ်၀ဲဒၣ်ဖဲနီၣ်ဂံၢ်(၄)က၀ီၤဒ့,တီၣ်ပီၣ်သီခါဖၠၣ်အဖီခိၣ်၀ံၤသီခါဖၠၣ်တၢ်သူၣ်ထီၣ်တနီၤဘၣ်ဟးဂီၤကွံၥ်၀ဲအဂ့ၢ်ဘိးဘၣ်ရၤလီၤဃၥ်၀ဲဖဲလါအ့ဖြ့ၣ်(၁၉)သီအနံၤန့ၣ်လီၤ.ဘၣ်ဆၣ်ဘၣ်ဃးဒီးအ၀ဲသ့ၣ်ကလံၤကျါတၢ်ဟဲဒုးလီၤတၢ်တဖၣ်အဂ့ၢ်တခီ တကွဲးဖျါဃၥ်၀ဲဘၣ်န့ၣ်လီၤ.
Ref:bbc
