လါအ့ဖြ့ၣ်(၂၁)သီ, ၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၇), တန့ခၠါကီၢ်ဆၣ်ဟီၣ်က၀ီၤ, ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးသုးပၥ်ဖှိၣ်တဖၣ် ထီၣ်ဒုးမၤန့ၢ်သုးကီၣ်ကး လ့ဂီၤကၠိ(ကိး)မီၤကလၤသုးကလၢၤ ဖဲလါအ့ဖြ့ၣ်(၁၉)သီအနံၤအဂ့ၢ် တၢ်သ့ၣ်ညါဘၣ်န့ၣ်လီၤ.
တၢ်ထီၣ်ဒုးမၤန့ၢ် သုးကီၣ်ကးမီၤကလၤ(လ့ဂီၤကၠိ)သုးကလၢၤ၀ံၤအလီၢ်ခံ သုးကီၣ်ကးအပှၤသုးဖိ(၂၅)ဂၤအံၤ လဲၤဃ့ၢ်ခီဆူကၠီၣ်တဲၣ်တပၤဃုၥ်ဒီးစုက၀ဲၤအဂ့ၢ် ကၠီၣ်တဲၣ်တၢ်ကစီၣ်သန့လၢအမ့ၢ် The Reportersပၥ်ဖျါဃၥ်၀ဲန့ၣ်လီၤ.
သုးကီၣ်ကးအပှၤသုးဖိ(၂၅)ဂၤအံၤ လဲၤဃ့ၢ်ခီဆူကၠီၣ်တဲၣ်, တးကီၢ်ရ့ၣ်ပူၤဘၣ်ဆၣ် အိၣ်၀ဲလၢဖဲလဲၣ်တခီဒု တၢ်တသ့ၣ်ညါလီၤတံၢ်ဘၣ်အဂ့ၢ် ကၠီၣ်တဲၣ်တၢ်ကစီၣ် ပၥ်ဖျါဃၥ်၀ဲန့ၣ်လီၤ.
ကီၢ်ဆၢဟီၣ်က၀ီၤပူၤခီဖျိတၢ်အိၣ်သးတဖၣ်ကဲထီၣ်အဃိ ကၠီၣ်တဲၣ်တပၤပၥ်လီၤအါထီၣ်ဃၥ်၀ဲတၢ်ဘံၣ်တၢ်ဘၢတဖၣ်အဂ့ၢ် ကၠီၣ်တဲၣ်သုးမုၢ်ဒိၣ် Task Force 35သုးဒ့ခိၣ် Colonel Natthakorn Rueanthip စံး၀ဲန့ၣ်လီၤ.
သုးမီၤစိရိၤသုးကီၣ်ကးအသုး မၤကလံၤကျါတၢ်ဒုးဒီးဒြိတၢ်ဒုးတဖၣ်အဃိ ကီၢ်ပယီၤပှၤလီၢ်က၀ီၤဖိ(၂၄၇)ဂၤလဲၤဃ့ၢ်ပူၤဖျဲးသးဆူ ကၠီၣ်တဲၣ်တဖၣ်တခီ ကၠီၣ်တဲၣ်သုးမုၢ်ဒိၣ်ဒီးတးကီၢ်ရ့ၣ်ပှၤဘၣ်မူဘၣ်ဒါတဖၣ် ကွၢ်ထွဲဃၥ်၀ဲအဂ့ၢ်စံး၀ဲန့ၣ်လီၤ.
ပှၤလီၢ်က၀ီၤဖိလၢ ဟဲဃ့ၢ်ပူၤဖျဲးသးတဖၣ်အံၤ တၢ်ဘၣ်ဒိဘၣ်ထံးတအိၣ်ဘၣ်ဆၣ် နီၢ်သးဂ့ၢ်၀ီတၢ်ပျံၤတၢ်ဖူးတဖၣ်အိၣ်၀ဲအဂ့ၢ်န့ၣ် Task Force 35 သုးဒ့ခိၣ် Colonel Natthakorn Rueanthip စံး၀ဲန့ၣ်လီၤ.
