လါအ့ဖြ့ၣ် (၁၁)သီ၊ ၂၀၂၅ နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,ကီၢ်သူလ့ၤတၢ်ပၢဟီၣ်က၀ီၤ,ချၢၣ်လွံၢ်ထူကီၢ်ရ့ၣ်,လၢၢ်ဒိၣ်ကီၢ်ဆၣ်အပူၤ ၂၀၂၅ န့ၣ်,လါအ့ဖြ့ၣ်(၇)သီဆၢကတီၢ် တၢ်စူၤဒီးကလံၤသီၣ်ဂီၤဆူၣ်အဃိ ထဲထူသဝီတၢ်သိၣ်လိကၠိအခိၣ်ဒုး ဟးဂီၤကွံၥ်ဝဲ ဒီး သ၀ီဖိဟံၣ်ဟးဂီၤ၀ဲ(၄)ဖျၢၣ်လၢအမ့ၢ် (၁) စီၤမီၣ်ဟဲ (၂) စီၤဘျ့ၣ်ဘျီၣ် (၃) နီၢ်ဝ့ကၠံၣ် ဒီး (၄) စီၤလါရဲၣ် အဟံၣ် ဒီး တၢ်ပၥ်ကီၤဟုသးလီၢ် ဘုဖီတဖျၢၣ်အပူၤ ဟုသး(၂၀)ထၢၣ်ဃၣ်ဃၣ် ဟးဂီၤကွံၥ်ဝဲအဂ့ၢ် ခ့ၣ်အဲၣ်ယူၣ် – လီၢ်ခၢၣ်သးပၥ်ဖျါဃၥ်၀ဲန့ၣ်လီၤ.
ဒ်န့ၣ်အသိး ဖဲအပူၤကွံၥ်(၃/၄/၅)သီအနံၤတဖၣ်စ့ၢ်ကီး သုးကီၣ်ကးအသုး ပညိၣ်ခးလီၤကျိဖးဒိၣ်တဖၣ် ဆူ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၢ်ထူၣ်, ကီၢ်ဆၣ်တဖၣ်ဒ်အမ့ၢ် ဆီထံး, မူးဟီၣ်က၀ီၤတဖၣ်ပူၤအဃိ လီၢ်က၀ီၤကမျၢၢ်ဘၣ်ဒိ၀ဲ(၅)ဂၤအသိး ဟံၣ်(၁)ဖျၢၣ်ဒီး သီခါဖၠၣ်(၁)ဖျၢၣ် ဘၣ်ဟးဂီၤကွံၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ချၢၣ်လွံၢ်ထူၣ်ကီၢ်ရ့ၣ်ဟီၣ်က၀ီၤပူၤ ကမျၢၢ်ထံဖိကီၢ်ဖိတဖၣ် ဘၣ်တူၢ်ဘၣ်၀ဲ သုးဂ့ၢ်၀ီတၢ်ဆီၣ်သနံး ခီဖျိသုးကီၣ်ကးလၢဟံးဆူၣ်တၢ်စိတၢ်ကမိၤတဖၣ် အိၣ်ဒီးတၢ်ပညိၣ် ခးလီၤကျိဖးဒိၣ်, ဟဲခးလီၤတၢ်လၢဒြိ ဒီးကဘီယူၤတဖၣ် လၢန့ၢ်အမဲၥ်ညါ ကတီၢ်အံၤဘၣ်ကွၢ်ဆၢၣ်မဲၥ်ဒီး န့ဆၢၣ်တၢ်ဆီၣ်သနံးအဂ့ၢ် ပၥ်ဖျါဃၥ်၀ဲန့ၣ်လီၤ.
တကတီၢ်ဃီ တူၢ်ဘၣ်၀ဲ သုးကီၣ်ကးဟံးဆူၣ်တၢ်စိတၢ်ကမီၤ သုးမီၤစိရိၤတၢ်မၤထီဒါ ပှၤဂ့ၢ်၀ီခွဲးယၥ်ကိးနံၤဒဲးဃၣ်ဃၣ် အဖီခိၣ် လၢတၢ်ကက့ၤသူၣ်ထီၣ်ဘှီထီၣ်က့ၤ တၢ်သူၣ်ထီၣ် တၢ်ဖံးတၢ်မၤအဂီၢ် ကဲထီၣ်က့ၤ၀ဲ တၢ်ကီတၢ်ခဲ, တၢ်မၤတံၥ်တၥ် ဒီး ဒူသ၀ီကမျၢၣ်ဖိသ့ၣ်တဖၣ် ဘၣ်အိၣ်မူဝဲလၢတၢ်ပျံၤတၢ်ဖုး, တၢ်လီၤဘၣ်ယိၣ်အပူၤစ့ၢ်ကီးအဂ့ၢ်တၢ်သ့ၣ်ညါဘၣ်န့ၣ်လီၤ.
