လါအ့ဖြ့ၣ်(၁၁)သီ,၂၀၂၅နံၣ်
ကီၢ်ခၣ်ဘီဒံယါမုၢ်နုၥ်ကလံၤထံး, ကရိၣ်ဖရးစံၣ်ဟၣ်နူးကီၢ်စဲၣ်, ရ့ၤကဘီသန့ၤတၢ်လီၢ်အပူၤ တရူး-ခၣ်ဘီဒံယါ ပၥ်ဖှိၣ်အိးထီၣ်ဃၥ်၀ဲ သုးဂ့ၢ်၀ီတၢ်ဆီၣ်ထွဲဒီးသုးတၢ်ဂဲၤလိစ့ၣ်တၣ်တခါန့ၣ်လီၤ.
တၢ်မၤဂ့ၤထီၣ် ထံကီၢ်ခံဘ့ၣ်အဘၢၣ်စၢၤ သုးဂ့ၢ်၀ီတၢ်ရ့လိၥ်ဘၣ်ထွဲတၢ်ဂုၤထီၣ်ပသီထီၣ်အဂ့ၢ်န့ၣ် တရူးတၢ်ဒီသဒၢကိတိၥ်၀ဲၤကျိၤ ပှၤကတိၤတၢ်ပၢ တဲလီၤ၀ဲဖဲ လါအ့ဖြ့ၣ်(၉)သီအနံၤန့ၣ်လီၤ.
စ့ၣ်တၣ်အံၤန့ၣ် တၢ်အိးထီၣ်အီၤဖဲအပူၤကွံၥ် မုၢ်ဘူၣ်အနံၤဒီး ခၣ်ဘီဒံယါကိတိၥ်ခိၣ်ကျၢၢ် ဟိၣ်မၣ်နဲးဒီးတရူးကမျၢၢ်တၢ်ထူၣ်ဖျဲးသုးမုၢ်ဒိၣ်ခၢၣ်စးတဖၣ် လဲၤထီၣ်၀ဲတၢ်အိးထီၣ်မူးတၢ်ရဲၣ်တၢ်ကျဲၤအံၤန့ၣ်လီၤ.
တၢ်အိးထီၣ်မူးတၢ်ရဲၣ်တၢ်ကျဲၤဃုၣ်ဒီး တရူးဒီးခၣ်ဘီဒံယါ သုးမုၢ်ဒိၣ်တဖၣ်အံၤ ပၥ်ဖှိၣ်ဂဲၤလိ၀ဲ ထူပယိၤ၂၀၂၅သုးတၢ်ဂဲၤလိဖဲ ၀ဲကျိၤတၢ်လီၢ်အပူၤအဂ့ၢ်န့ၣ်လီၤ.
တၢ်သူၣ်ထီၣ် တရူး-ခၣ်ဘီဒံယါပၥ်ဖှိၣ် သုးဂ့ၢ်၀ီတၢ်ဆီၣ်ထွဲဒီးသုးတၢ်ဂဲၤလိစ့ၣ်တၣ်ဖဲ ရ့ၤကဘီသန့ၤန့ၣ် မ့ၢ်ထံကီၢ်ခံဘ့ၣ်အဘၢၣ်စၢၤ တၢ်ပၥ်ကဲလိၥ်သးတၢ်ထဲသိးတုၤသိး တၢ်တဲသကိးအဆၢတခါအဂ့ၢ်န့ၣ် တရူးတၢ်ဒီသဒၢကိတိၥ်၀ဲၤကျိၤ ပှၤကတိၤတၢ်ပၢ ကၠါရှီၣ်ဂၣ် တဲလီၤ၀ဲဖဲ တၢ်မၤ၀ဲတၢ်မၤနၢ်ပၢၢ်တၢ်ကွဲးပရၢတၢ်ရဲၣ်တၢ်ကျဲၤဖဲ ၀့ၢ်ခိၣ်ပ့ၣ်ကၠ့န့ၣ်လီၤ.
ထံကီၢ်ခံဘ့ၣ် ကီၢ်ပူၤသဲစးတၢ်ဘျၢတဖၣ်, ဟီၣ်ခိၣ်ထံကီၢ်သဲစးတၢ်ဘျၢလၢဘၣ်ထွဲလိၥ်သးတဖၣ်ဒီး ဟီၣ်ခိၣ်ဒီဘ့ၣ်တၢ်သိၣ်တၢ်သီတဖၣ် ကလူၤပိၥ်မၤထွဲ၀ဲအဂ့ၤကတၢၢ်ဒီး တၢ်မၤဂၢၢ်ကျၢၤထံကီၢ်ခံဘ့ၣ် သုးဂ့ၢ်၀ီတၢ်ရ့လိၥ်ဘၣ်ထွဲတဖၣ်အဂ့ၢ် အ၀ဲစံး၀ဲန့ၣ်လီၤ.
တၢ်ကပၢၤဃၥ် လီၢ်က၀ီၤတၢ်မုၥ်တၢ်ခုၣ်ဒီးတၢ်ဂၢၢ်တၢ်ကျၢၤအဂီၢ် လိၣ်လၢတၢ်ကမၤဂ့ၤထီၣ်တၢ်ဒီသဒၢကံၢ်စီတဖၣ်တပယူၥ်ဃီ, ပၥ်ဖှိၣ်ဂဲၤလိသုးတၢ်ဂဲၤလိတဖၣ်, တၢ်ဟ့ၣ်ခီဟ့နီၤလိၥ်သးလၢ တၢ်မၤဂ့ၤထီၣ်ပှၤမၤတၢ်ဖိတၢ်သ့တၢ်ဘၣ်ကံၢ်စီလၢ ထံကီၢ်ခံဘၣ်အဘၢၣ်စၢၤတဖၣ်အပူၤအဂီၢ် တရူးဒီးခၣ်ဘီဒံယါသုးမုၢ်ဒိၣ် ခံဖုအံၤ ကပၥ်ဖှိၣ်မၤသကိးတၢ် တုၤလီၤတီၤလီၤအဂ့ၢ် အ၀ဲတဲအါထီၣ်၀ဲန့ၣ်လီၤ.
Ref: DVB
