လါအ့ဖြ့ၣ်(၁၀)သီ,၂၀၂၅နံၣ်
အမဲရကၤပတုာ်ကွံာ် တၫ်မၤစၢၤတဖၣ်၀ံၤအလီၫ်ခံ ဟီၣ်ခိၣ်ဒီဖျၢၣ်ဆူၣ်ချ့ကရၢအနံၣ်လၢကဟဲစ့ပာ်ကီၤတဖၣ်န့ၣ် လီၤစှၤ၀ဲ(၄၀)မျးကယၤအဂ့ၫ် ဖဲပှၤဘၣ်မူဘၣ်ဒါတဂၤ ထံၣ်လိာ်သးဒီး NHKတၫ်ကစီၣ် တၫ်သံကွၫ်စံးဆၢအကတီၫ် ထုးထီၣ်တဲဖျါ၀ဲလီၤ.
အမဲရကၤလၢဆီၣ်ထွဲမၤစၢၤ ဟီၣ်ခိၣ်ဒီဖျၢၣ်ဆူၣ်ချ့မၤကရၢ အအါကတၢၫ်အံၤ အတၫ်ပတုာ်ကွံာ် တၫ်ဆီၣ်ထွဲမၤစၢၤ စ့ပာ်ကီၤ တဖၣ်၀ံၤအလီၫ်ခံ လၢဟီၣ်ခိၣ်ဒီတဖျၢၣ် ပှၤမၤတၫ်ဖိ (၉၀၀၀၀)အကျါ (၈၀၀)ဂၤဃၣ်ဃၣ်န့ၣ် ဟ့ၣ်၀ဲလါလဲ တန့ၫ်လၢၤဘၣ်အဂ့ၫ် ဟီၣ်ခိၣ်ဒီဖျၢၣ်ဆူၣ်ချ့ကရၢပှၤနဲၣ်တၫ်သဃဲၤ နၣ်ကၣ်တၣ်နံၣ်ယၣ်ကံၣ် တဲ၀ဲလီၤ.
ကရၢတကပၤ လၢအမဲာ်ညါစ့ပာ်ကီၤတၫ်ရဲၣ်တၫ်ကျဲၤန့ၣ် မၤစှၤလီၤ၀ဲ(၂၀)မျးကယၤ၀ံၤ ဃုစ့ပာ်ကီၤ လၢထံဂုၤကီၫ်ဂၤ ထံကီၫ်တဖၣ်အိၣ်ဘၣ်ဆၣ် ၂၀၂၆နံၣ်-၂၀၂၇နံၣ်အဂီၫ် စ့ပာ်ကီၤန့ၣ် လိၣ်ဘၣ်ကဒီး၀ဲ အမဲရကၤဒီလၣ်(၁.၈)ဘံၣ်လံၣ်ယၣ်အဂ့ၫ် တဲ၀ဲလီၤ.
တကးဘၣ် လၢတၫ်ပၢၤကတီၤတၫ်ဆူးတၫ်ဆါဒီးတၫ်ဒီသဒၢတြီဆၢစ့ၣ်တၣ်တဖၣ်အပူၤ ဘၣ်ဒိဘၣ်ထံး၀ဲ တၫ်ပာ်ဖှိၣ် မၤသကိးတၫ်ဒီးအမဲရကၤပဒိၣ်တၫ်ကၢရကရိတဖၣ်အဂ့ၫ် နၣ်ကၣ်တၣ်နံၣ်တဲ၀ဲလီၤ.တၫ်ဆါသံသတြိာ်မ့ကဲထီၣ်န့ၣ် တၫ်ဒုးလီၤပှီၫ်ကွံာ်တၫ်ဆါတၫ်ဘၣ်ကူဘၣ်ဂာ်တၫ်ရဲၣ်တၫ်ကျဲၤဒီးတၫ်ဟ့ၣ်နီၤလီၤကသံၣ်ဒီသဒၢဒီးလၢတၫ်ထုးထီၣ်၀ဲအပူၤ စဲၤခံ၀ဲသ့အဂ့ၫ် ဟ့ၣ်ပလီၫ်ဃာ်၀ဲလီၤ.
ဟီၣ်ခိၣ်ဒီဖျၢၣ်ဆူၣ်ချ့ကရၢတကပၤ လၢအခဲအံၤစ့ပာ်ကီၤတၫ်ဃံးတၫ်စ့ၤအံၤ လၢ(၇၇)နံၣ် တၫ်စံၣ်စိၤအပူၤ တကွၫ် ဆၢၣ်မဲာ်ဘၣ်၀ဲနီတဘျီဒံးဘၣ်အဂ့ၫ်,တၫ်ရဲၣ်တၫ်ကျဲၤလၢတၫ်မၤညီနုၫ်တဖၣ် ကတုၤထီၣ်ထီၣ်ဘးအဂီၫ် တၫ်လၢကဲထီၣ်သးသ့တဖၣ် ကြၢးတၫ်ဆီတလဲလံအဂ့ၫ် နၣ်ကၣ်တၣ်နံၣ် တဲ၀ဲလီၤ.
ကရၢတကပၤ ကးတံာ်ကွံာ်၀ဲၤဒၢးတဖၣ်သ့ပာ်ဃုာ် မၤစှၤလီၤတၫ်လၢာ်ဘူၣ်လၢာ်စ့ၤအပှ့ၤကလံၤတၫ်ရဲၣ်တၫ်ကျဲၤတဖၣ် ဖၢနုာ်ဒွးဃာ်၀ဲၤ၀ံၤ စ့ပာ်ကီၤတၫ်ရဲၣ်တၫ်ကျဲၤအသီတတီၤန့ၣ် နံၣ်လၢကဟဲတၫ်ကမၤ၀ဲ ဟီၣ်ခိၣ်ဒီဖျၢၣ်ဆူၣ်ချ့တၫ်အိၣ်ဖှိၣ် အပူၤ ကတီၫ်ဖျါထီၣ်၀ဲအိၣ်န့ၣ်လီၤ.
Ref: VOM
