လါအ့ဖြ့ၣ်(၆)သီ,၂၀၂၅နံၣ်
လါအ့ဖြ့ၣ်(၂)သီ, ၂၀၂၅နံၣ်အနံၤန့ၣ် ရၢၢ်ခၢၣ်သုးမုၢ်ဒိၣ်(AA)ထီၣ်ဒုးမၤန့ၢ် သုးကီၣ်ကးညီၣ်ကၠိသုးကလၢၤလၢအိၣ်ဖဲ ပကိကီၢ်ခီပူၤလံအဂ့ၢ်န့ၣ် AAဘိးဘၣ်ရၤလီၤဃၥ်၀ဲ တၢ်ကစီၣ်န့ၣ်လီၤ.
တၢ်စးထီၣ်ဒုးသုးကလၢၤအံၤလၢ လါမးရှး(၁၇)သီ,၂၀၂၅နံၣ်အနံၤဒီးယံၤ(၁၆)၀ံၤအလီၢ်ခံန့ၣ် တၢ်ဒုးမၤန့ၢ်၀ဲအဂ့ၢ် ပၥ်ဖျါဃၥ်၀ဲန့ၣ်လီၤ.
တၢ်ခွဲးတၢ်ယၥ်အိၣ်လၢ တၢ်ကဒုးရှဲပျီကွံၥ် သုးကီၣ်ကးအပှၤသုးဖိလၢ ဃ့ၢ်ဖျိးကွံၥ်တဖၣ်ဘၣ်ဆၣ် ခီဖျိတၢ်ပတုၥ်ဃၥ်တၢ်ခးအဃိ တၢ်တဒုးရှဲပျီလၢၤဘၣ်ဒီးတၢ်ပတုၥ်ဃၥ်၀ဲ၀ံၤ တၢ်လူၤပိၥ်မၤထွဲအ၀ဲသ့ၣ် တၢ်ပတုၥ်တၢ်ခးတၢ်ဘိးဘၣ်ရၤလီၤအဂ့ၢ် ပၥ်ဖျါဃၥ်၀ဲန့ၣ်လီၤ.
AA အတၢ်ဘိးဘၣ်ရၤလီၤလၢ “ဖဲဆ့း သုးကီၣ်ကးအသုး အတၢ်ဟဲဒုးရၢၢ်ခၢၣ်သုးမုၢ်ဒိၣ်လၢ ခိ,ထံ,ကလံၤကျါလၢ ကိးမုၢ်နံၤ တၢ်ဒုးတၢ်ကစီၣ်တဖၣ်” အပူၤ တၢ်ကစီၣ်အဂ့ၢ်အကျိၤတဖၣ် တၢ်ကပၥ်ဖျါထီၣ်န့ၢ်ဆူညါအဂ့ၢ် ရၢၢ်ခၢၣ်သုးမုၢ်ဒိၣ်(AA)ဘိးဘၣ်ရၤလီၤဃၥ် တၢ်ကစီၣ်န့ၣ်လီၤ.
လါအ့ဖြ့ၣ်(၃/၄/၅)သီ ၂၀၂၅နံၣ်အနံၤတဖၣ်စ့ၢ်ကီး သုးကီၣ်ကးအသုးလၢအိၣ်သ့ၣ်ပိးတီၣ်ထံသုးကလၢၤ, တိတါတီၣ် နီၣ်ဂံၢ်(၃၂)ပၢၤကီၢ်သုးရ့ၣ်ဒီး ခိသုးကျိၤတဖၣ်တကးဘၣ် သုးကဘီ, ကဘီယူၤဒုးသုးတဖၣ် ခးလီၤကျိဖးဒိၣ်, ဟဲတ့ၢ်လီၤမ့ၣ်ပိၢ်တဖၣ်ဆူ ကၠီးဖၠူၣ်ကီၢ်ဆၣ်အပူၤ သ၀ီ(၇)ဖျၢၣ်အပူၤအဂ့ၢ် ရၢၢ်ခၢၣ်သုးမုၢ်ဒိၣ်(AA) ပၥ်ဖျါဃၥ်၀ဲတၢ်ကစီၣ်န့ၣ်လီၤ.
လါအ့ဖြ့ၣ်(၅)သီအနံၤ ထဲတသီအတီၢ်ပူၤန့ၣ် သုးကီၣ်ကးအသုး ဟဲတ့ၢ်လီၤ Drop Bombအဘျီ(၆၀)ဘျဲၣ်အဂ့ၢ် ဒီး ခးလီၤကျိဖးဒိၣ်အိၣ်ထီၣ်၀ဲအဘျီ(၅၀)ဘျဲၣ်အဂ့ၢ် စံး၀ဲန့ၣ်လီၤ. ဒ်န့ၣ်အသိး ဖဲဂီၤ(၉)နၣ်ရံၣ်ဘျဲၣ်အဆၢကတီၢ်န့ၣ် သုးကီၣ်ကးအသုး ဟဲတ့ၢ်လီၤဒြိမ့ၣ်ပိၢ်(၂)ဘျီဃၣ်ဃၣ်အဂ့ၢ် ပၥ်ဖျါဃၥ်၀ဲန့ၣ်လီၤ.
လၢန့ၣ်အမဲၥ်ညါ လါအ့ဖြ့ၣ်(၅)သီ, ဟါ(၃း၄၅)နၣ်ရံၣ်အဆၢကတီၢ် သုးကီၣ်ကးအသုး Y12ဟဲတ့ၢ်လီၤမ့ၣ်ပိၢ်တဖၣ်ဆူ ရၢၢ်ခၢၣ်ရိမးကစၢၢ်လၢ ရၢၢ်ခၢၣ်သုးမုၢ်ဒိၣ်အပှၤသုးဖိတဖၣ်အိၣ်အလီၢ်အဂ့ၢ် ပၥ်ဖျါဃၥ်၀ဲန့ၣ်လီၤ.
