လါအ့ဖြ့ၣ်(၃)သီ,၂၀၂၅နံၣ်
ထံကီၢ်ဒီတဘ့ၣ်အပူၤ သုးကီၣ်ကးအသုး ကမၤ၀ဲတၢ်ပတုၥ်တၢ်ခးတစိၢ်တလီၢ်သၢနွံအဂ့ၢ် ဘိးဘၣ်ရၤလီၤဃၥ်၀ဲ ဖဲလါအ့ဖြ့ၣ်(၂)သီအနံၤန့ၣ်လီၤ.
တၢ်ကမၤဆူၣ်ထီၣ် တၢ်မၤပူၤဖျဲးတၢ်ဖံးတၢ်မၤဒီး တၢ်က့ၤသူၣ်ထီၣ်ဆီလီၤတၢ်ဖံးတၢ်မၤတဖၣ်အဂီၢ်ဒီး တၢ်မုၢ်လၣ်ကွၢ်စိလၢတၢ်အိၣ်ဂၢၢ်ဆိးကျၢၢ်အဂီၢ်၀ံၤ ကမၤ၀ဲတၢ်ပတုၥ်တၢ်ခးတစိၢ်တလီၢ်စးထီၣ်လၢ လါအ့ဖြ့ၣ်(၁)သီတုၤ(၂၂)သီအနံၤအဂ့ၢ် တၢ်ဘိးဘၣ်ရၤလီၤအပူၤ ပၥ်ဖျါဃၥ်၀ဲန့ၣ်လီၤ.
ဘၣ်ဆၣ်ဒီး ဖဲလၢတၢ်ပတုၥ်တၢ်ခးအဆၢကတီၢ် ပှၤဖီၣ်စုက၀ဲၤကရၢတဖၣ်တခီ တၢ်သုတလဲၤဒုး ထံဖိကီၢ်ဖိကမျၢၢ်သူတၢ်ဆဲးကျိးကျဲတဖၣ်, သုးကီၣ်ကးအသုးကလၢၤဒီးသုး၀ဲၤလီၢ်ခိၣ်သ့ၣ်တဖၣ်တဂ့ၤအဂီၢ်ဒီး တၢ်သုတထၢအါထီၣ်သုးတဖၣ်ဒီး တၢ်သုတမၤလဲၢ်ထီၣ်ဟီၣ်က၀ီၤတဂ့ၤအဂီၢ် ပၥ်ဖျါဃၥ်၀ဲ၀ံၤ တၢ်မ့ၢ်မၤ၀ဲဒ်န့ၣ်န့ၣ် ကခီၣ်ဆၢက့ၤ၀ဲအဂ့ၢ် အလံၥ်ဘိးဘၣ်ရၤလီၤအပူၤ ပၥ်ဖျါဃၥ်၀ဲန့ၣ်လီၤ.
ရၢၢ်ခၢၣ်သုးမုၢ်ဒိၣ်(AA), တအီဒီကလုၥ်တၢ်ထူၣ်ဖျဲးသုးမုၢ်ဒိၣ်(TNLA) ဒီး ကီၢ်ပယီၤဒီကလုၥ်ဒံၣ်မိၣ်ကရံးတံးသိၣ်မှံသုးမုၢ်ဒိၣ်(MNDAA)တဖၣ်စ့ၢ်ကီး ကမၤ၀ဲတၢ်ပတုၥ်တၢ်ခး စးထီၣ်လၢလါအ့ဖြ့ၣ်(၁)သီတုၤ(၃၀)သီအနံၤန့ၣ် ဘိးဘၣ်ရၤလီၤဃၥ်၀ဲန့ၣ်လီၤ.
ဟီၣ်က၀ီၤတဖၣ်လၢ အကွၢ်ဆၢၣ်မဲၥ်ဘၣ်ဟီၣ်ခိၣ်ဟူး၀းတၢ်တတဲၥ်တနါတဖၣ်အပူၤ တၢ်မၤ၀ဲတၢ်မၤပူၤဖျဲးတၢ်ဖံးတၢ်မၤတဖၣ်ကန့ၢ်ကသ့အဂီၢ်ဒီး ပှၤဟီၣ်ခိၣ်ဖိတၢ်ဒိသူၣ်ဒိသးတၢ်မၤစၢၤတဖၣ် ကလဲၤတုၤဆူ ထံဖိကီၢ်ဖိကမျၢၢ်လၢလိၣ်ဘၣ်တၢ်မၤစၢၤတဖၣ်အအိၣ် တုၤလီၤတီၤလီၤအဂီၢ်အဂ့ၢ် စံး၀ဲန့ၣ်လီၤ.
ဒ်န့ၣ်အသိး ဒီကလုၥ်ဃူးဖိးပဒိၣ်(NUG)စ့ၢ်ကီး ကမၤ၀ဲတၢ်ပတုၥ်တၢ်ခး စးထီၣ်လၢလါအ့ဖြ့ၣ်(၁)သီဒီးယံၤ(၂)နွံအတီၢ်ပူၤအဂ့ၢ် ဘိးဘၣ်ရၤလီၤဃၥ်၀ဲန့ၣ်လီၤ.
