လါအ့ဖြ့ၣ်(၂)သီ,၂၀၂၅နံၣ်
လါမးရှး(၂၈)သီ, ၂၀၂၅နံၣ်အနံၤ ဟီၣ်ခိၣ်ဟူး၀းကဲထီၣ်တ့ၢ်၀ဲလၢ ကီၢ်ကရ့ၣ်နံၣ်, ဒံၣ်မီစိၤကီၢ်ဆၣ်, မုၢ်နုၥ်တကပၤ၀ံၤအလီၢ်ခံ တၢ်ပူၤလၢအလဲၢ်အိၣ်အပျၢ်(၁၀၀)ဘျဲၣ်ဒီး အယိၥ်အိၣ်(၁၀၀)ဘျဲၣ် ကဲထီၣ်တ့ၢ်၀ဲအဂ့ၢ် တၢ်သ့ၣ်ညါဘၣ်လၢ လီၢ်က၀ီၤဖိဒီးပှၤလီၢ်အိၣ်ကမှံဖိတဖၣ်အအိၣ်န့ၣ်လီၤ.
“လါမးရှး ၂၉သီအနံၤ, မုၢ်ထူၣ်အဆၢကတီၢ်န့ၣ် ဟီၣ်ခိၣ်လီၤပှီၢ်၀းက၀ီၤလၢသ့ၣ်ထူၣ်တဖၣ်အဖီလၥ်လီၤ. တုၤတနံၤအံၤန့ၣ် လီၤပှီၢ်၀ဲကယီကယီန့ၣ်လီၤ. တၢ်ပူၤန့ၣ် ယိၥ်တုၤလၢ တၢ်တထံၣ်အီၤလၢတၢ်ဖီလၥ်ဘၣ်”အဂ့ၢ် လီၢ်က၀ီၤပိၥ်ခွါတဂၤ စံး၀ဲန့ၣ်လီၤ.
တၢ်ပူၤအံၤအလဲၢ်န့ၣ်ကအိၣ်၀ဲ အပျၢ်(၁၀၀)ဘျဲၣ်၀ံၤ စးထီၣ်လၢ၂၉သီအနံၤ, မုၢ်ထူၣ်အဆၢကတီၢ်ဒီးတုၤခဲအံၤန့ၣ် လီၤပှီၢ်၀ဲကယီကယီအဃိ တၢ်တယၥ်အဖီခိၣ် ကယိၥ်တုၤအပျၢ်(၁၀၀)ဃၣ်ဃၣ်အဂ့ၢ် စံး၀ဲန့ၣ်လီၤ.
ခီဖျိလၢဟီၣ်ခိၣ်ဟူး၀ဲကဲထီၣ်တ့ၢ်၀ဲအဃိ ထံကျိၤတဘိလၢ ဒံၣ်မီစိၤမုၢ်နုၥ် လီၢ်က၀ီၤဖိတဖၣ်ဘၣ်ဒိသန့ၤအီၤအံၤ ထံလီၤ၀ဲဒၣ်တုၤသၢပျၢ်၀ံၤ ထံတဖၣ်ဒုထီၣ်၀ဲဒၣ်အဃိ တၢ်ကသူအီၤအဂီၢ်ဒီး ကအီအီၤအဂီၢ်တဘၣ်လီၢ်ဘၣ်စးဘၣ်အဂ့ၢ် ပှၤလီၢ်အိၣ်ကမှံဖိတဖၣ် စံး၀ဲန့ၣ်လီၤ.
လၢန့ၣ်အမဲၥ်ညါ ခီဖျိဟီၣ်ခိၣ်ဟူး၀းအဃိ လၢဟိၣ်၀ၣ်လီၢ်က၀ီၤပူၤ တၢ်ဘါယွၤသရိၥ်လီၤပှီၢ်ကွံၥ်၀ဲ, နါမဲၣ်ခိၣ်အပူၤ တၢ်ဂုၤဟူးသးစဲးဖီကဟၣ်ဒီးဟံၣ်အဒူၣ်တဖၣ်လီၤပှီၢ်ကွံၥ်အသိး မိၤခံလီၢ်က၀ီၤပူၤ တၢ်သိၣ်လိကၠိတဖၣ် ဘၣ်ဟးဂီၤကွံၥ်၀ဲအဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
Ref: DVB
