လါအ့ဖြ့ၣ်(၂)သီ,၂၀၂၅နံၣ်
လါမးရှး(၂၈)သီ, ၂၀၂၅နံၣ်အနံၤန့ၣ် ခီဖျိဟီၣ်ခိၣ်ဟူး၀း ကဲထီၣ်တ့ၢ်၀ဲလၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤပူၤအဃိ ဃိၣ်တဖၣ်, တၢ်သွၣ်ခိၣ်တဖၣ်ဒီးဟံၣ်ဃီ(၂)ဖျၢၣ်ဘၣ်ဟးဂီၤကွံၥ်၀ဲအသိး ကမျၢၢ်ဘၣ်သံ၀ဲတဂၤဒီးဘၣ်ဒိ၀ဲတဂၤအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲန့ၣ်လီၤ.
ခ့ၣ်အဲၣ်ယူၣ်-လၢၢ်ဒိၣ်ကီၢ်ဆၣ်အပူၤ ဖဲလါမးရှး(၂၈)သီအနံၤ, မုၢ်ထူၣ်(၁၂း၅၄)နၣ်ရံၣ်အဆၢကတီၢ် ရဲးခၠဲၣ်စတၣ်စက့(၇.၇)အိၣ် ဟီၣ်ခိၣ်ဟူး၀းကဲထီၣ်တ့ၢ်၀ဲအဃိတီၣ်ကၠီၣ်ပီးသ၀ီ,ပရဲလိၥ်ကျိထံကျိကၢၢ်နံၤလီၤပှီၢ်ကွံၥ်၀ံၤ နီၢ်တူမၣ်ဒီးနီၢ်ငွ့ၣ်မၠးအဟံၣ်(၂)ဖျၢၣ် ဘၣ်ဟးဂီၤကွံၥ်၀ဲန့ၣ်လီၤ.
တကးဘၣ် ခီဖျိဟီၣ်ခိၣ်ဟူးအဃိ ကၠံပ့ၣ်စူးသ၀ီဖိလၢအမ့ၢ် မီၣ်ညၣ်လ့အူသးနံၣ်(၂၈)နံၣ်စ့ၢ်ကီး သးတၢ်ဆါကဲထီၣ်ဒီးသံ၀ဲဒီး သဲးဖယီတါသ၀ီဖိလၢအမ့ၢ် စီၤမီၣ်စၣ်သးနံၣ်(၅၆)နံၣ်စ့ၢ်ကီးတၢ်သူၣ်ထီၣ်လီၤပှီၢ်ကွံၥ်အဃိ ဘၣ်ဒိ၀ဲအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲန့ၣ်လီၤ.
ဒ်န့ၣ်အသိး ခီဖျိဟီၣ်ခိၣ်ဟူး၀းကဲထီၣ်တ့ၢ်အဃိ လၢၢ်ဒိၣ်ကီၢ်ဆၣ်, ထိ၀ါဆဲး, ဘီဘးလူၢ်, ဃီကၤသ၀ီဒီးဆီထံးကီၢ်ဆၣ်ပူၤ အ့ကၠ့ပလၣ်သ၀ီတဖၣ်အပူၤဒီး စံၥ်ပျီတဖၣ်အပူၤ ဟီၣ်ခိၣ်တၢၤဖးအသးဒီး ကပံၥ်ထံတဖၣ် ဟဲထီၣ်၀ဲအိၣ်အဂ့ၢ် ပၥ်ဖျါဃၥ်၀ဲန့ၣ်လီၤ.
လၢန့ၣ်အမဲၥ်ညါ ၀ဲကၠိသ၀ီ, ၀ဲကၠိသ၀ီသီခါဖၠၣ် ဃိၣ်အခိၣ်သလုးစ့ၢ်ကီး ဘၣ်လီၤတဲၥ်ကွံၥ်လၢ ဟီၣ်ခိၣ်လိၤအသိး တၢ်သွၣ်ခိၣ်တဖၣ်စ့ၢ်ကီး ဘၣ်လီၤပှီၢ်ကွံၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
