လါမးရှး(၃၁)သီ,၂၀၂၅နံၣ်
သုးကီၣ်ကးအတၫ်ဘိးဘၣ်ရၤလီၤမူဒါခိၣ် သုးခိၣ်ကျၢၢ်ဂီၢ်ဂ့ၢ်စီၣ်မ့ထိန့ၣ် တဲ၀ဲလၢဟံးန့ၫ်တၫ်ဘံၣ်တၫ်ဘၢတန့ၫ်ဘၣ်အဃိ ဘၣ်ထွဲဒီးဟီၣ်ခိၣ်ဟူးတၫ်ဂ့ၫ် တဟ့ၣ်တၫ်ပျဲလၢ ထံဂုၤကီၫ်ဂၤပှၤဟံးန့ၫ်တၫ်ကစီၣ်ဖိတဖၣ် ကနုာ်လီၤဟံးန့ၫ်တၫ်ကစီၣ် လၢကီၫ်ပူၤဘၣ်န့ၣ်လီၤ.
သုးခိၣ်ကျၢၢ်ဂီၢ်ဂ့ၢ်စီၣ်မ့ထိတဲလီၤ၀ဲဖဲလါမးရှး(၃၀)သီနံၤ၀ံၤ သုးကီၣ်ကးလီၣ်ဘံၣ်တဲၣ်လံၣ်ကရၣ်ခၠဲၣ်နဲၣ်တဖၣ်စ့ၫ်ကီး ပာ်ဖျါ၀ဲလီၤ.
“ထံဂုၤကီၫ်ဂၤပှၤဟံးန့ၫ်တၫ်ကစီၣ်ဖိတဖၣ်ကဟဲအဂီၫ် ဃ့ခွဲးအိၣ်၀ဲလီၤ.ထံဂုၤကီၫ်ဂၤပှၤဟံးန့ၫ်တၫ်ကစီၣ်တဖၣ်မ့ၫ်ဟဲန့ၣ် အိၣ်ဆိးအဂီၫ်တၫ်ကီတၫ်ခဲအိၣ်၀ဲလီၤ.ဟိၣ်ထဲအါတက့ၫ် ဟးဂုၤဟးဂီၤလီၤ.လီမ့ၣ်အူစ့ၫ်ကီး လၢတၫ်လီၫ်အါတက့ၫ်အပူၤ တၫ်တဒိးန့ၫ်၀ဲဒံးဘၣ်ဒီးထံစ့ၫ်ကီးတၫ်ဂ့ၫ်ကီအိၣ်၀ဲအဂ့ၫ် “အ၀ဲတဲ၀ဲလီၤ.
တကးဘၣ် သုးကီၣ်ကးအကီၫ်ခီ,ကီၫ်စဲၣ်,ကီၫ်ဆၣ်ဒီးဒူသ၀ီပှၤဘၣ်မူဘၣ်ဒါတဖၣ် ပာ်တ့ၫ်ကွံာ်အဟံၣ်အဃီတဖၣ်၀ံၤ မၤတၫ်မၤပူၤဖျဲးတၫ်ဖံးတၫ်မၤတဖၣ်အဃိ တမ့ၫ်လၢဟံးန့ၫ်ထံဂုၤကီၫ်ဂၤပှၤဟံးန့ၫ်တၫ်ကစီၣ်ဖိတဖၣ်မူဒါကန့ၫ်ဘၣ်အဂ့ၫ် တဲ၀ဲလီၤ.
တၫ်ကစီၣ်သရၣ် အူမၠံးကၠီၣ်တခီ ထံဂုၤကီၫ်ဂၤပှၤဟံးန့ၫ်တၫ်ကစီၣ်ဖိတဖၣ်န့ၣ် အိၣ်ဒီးတၫ်လဲၤခီဖျိလၢ န့ဆၢၣ်တၫ်လီၤဘၣ်ယိၣ်ဒ်သိးအံၤမ့ၫ်ကဲထီၣ်န့ၣ် အ၀ဲသ့ၣ်လဲၤဟံးန့ၫ်တၫ်ကစီၣ်ဒီးဘိးဘၣ်ရၤလီၤ၀ဲသ့ဒီးအိၣ်ဆိးအီၣ်အီအဂီၫ် ရဲၣ်ကျဲၤ ၀ဲသ့လီၤအဂ့ၫ်တဲ၀ဲလီၤ.
“ပာ်ထီၣ်တၫ်ဂ့ၫ်တဖၣ်န့ၣ် တမ့ၫ်တၫ်လၢဖိးမံလိာ်အသးဒီးတၫ်ဂ့ၫ်တၫ်ကျိၤဘၣ်.ဘၣ်ထွဲဒီးဟီၣ်ခိၣ်ဟူးလၢကီၣ်ပယီၤန့ၣ် ထံဂုၤကီၫ်ဂၤတဖၣ်ကသ့ၣ်ညါဘၣ်အဂီၫ် ကြၢးဟ့ၣ်တၫ်ပျဲလၢထံဂုၤကီၫ်ဂၤပှၤဟံးန့ၫ်တၫ်ကစီၣ်ဖိတဖၣ် ကဟဲလီၤ. ဘၣ်ထွဲဒီးဟီၣ်ခိၣ်ဟူး အတၫ်ပၢဆှၢရဲၣ်ကျဲၤတဖၣ်ဒီးတၫ်ဂ့ၫ်လၢအဂၤတဖၣ် တအဲၣ်ဒိးဒုးသ့ၣ်ညါ၀ဲဘၣ်အဃိ နၫ်ပၢၫ်လၢတြီဃာ်၀ဲဒ်သိးအံၤအဂ့ၫ်”တၫ်ကစီၣ်သရၣ်အူမၠံးကၠီၣ်တဲ၀ဲလီၤ.
ထံဂုၤကီၫ်ဂၤတၫ်မၤစၢၤလၢသုးကီၣ်ကးဃ့ဃာ်တဖၣ်ဟဲတုၤလံဘၣ်ဆၣ် ဟီၣ်ခိၣ်ဟူးဒီးတၫ်ဟးဂုၤဟးဂီၤအါ လၢစကဲဒီးမါတလ့တၫ်လီၫ်တဖၣ် တၫ်မၤစၢၤတတုၤဒံးဘၣ်အဂ့ၫ် တၫ်သ့ၣ်ညါဘၣ်လၢလီၫ်က၀ီၤဖိတဖၣ်အိၣ်န့ၣ်လီၤ.
မံးစံးမၣ် တရီတၫ်မၤနီၣ်ထၢဖှိၣ်အဖီခိၣ် တုၤလါမးရှး(၃၀)သီနံၤ ဟီၣ်ခိၣ်ဟူးအဃိပှၤဘၣ်သံ အိၣ်၀ဲ(၃၀၀၀)ဂၤ ဃၣ်ဃၣ်၀ံၤ ပှၤဘၣ်ဒိဘၣ်ထံးအိၣ်(၃၀၀၀)ဂၤဘျဲၣ်ဒီးပှၤလီၤမၫ်အိၣ်၀ဲ(၇၀)ဂၤဃၣ်ဃၣ်န့ၣ်လီၤ.
Ref: Mizzima
