လါမးရှး(၃၁)သီ,၂၀၂၅နံၣ်
ဟီၣ်ခိၣ်ဟူးဝးအဃိ ကီၢ်ပယီၤလၢလိၣ်ဘၣ်ပှၤဟီၣ်ခိၣ်ဖိတၢ်ဒိသူၣ်ဒိသးတၢ်မၤစၢၤအံၤ အမဲရကၤကမၤစၢၤ၀ဲ အမဲရကၤဒီလၣ် ခံကကွဲၢ်အဂ့ၢ် အမဲရကၤမီၢ်သီလၢဘၣ်ထွဲကီၢ်ပယီၤ ဘိးဘၣ်ရၤလီၤဃၥ်တၢ်ကစီၣ် ဖဲလါမးရှး(၃၀)သီအနံၤန့ၣ်လီၤ.
တၢ်ဆီၣ်ထွဲမၤစၢၤတဖၣ်န့ၣ် ကမၤစၢၤလီၤ၀ဲဆူပှၤဟီၣ်ခိၣ်ဖိတၢ်ဒိသူၣ်ဒိသးတၢ်မၤစၢၤတၢ်ကရၢကရိတဖၣ်လၢအိၣ်သူၣ်လီၤအသး လၢကီၢ်ပယီၤပူၤတဆီအဂ့ၢ်န့ၣ် ပၥ်ဖျါဃၥ်၀ဲလၢတၢ်ကစီၣ်အပူၤန့ၣ်လီၤ.
တကးဘၣ် အမဲရကၤဟီၣ်ခိၣ်ဒီဘ့ၣ် တၢ်ဂုၤထီၣ်ပသီထီၣ်အ့ၣ်ကၠ့ၣ်စံၣ်(USAID) ဂ့ၢ်ဂီၤအူတၢ်ခီၣ်ဆၢကရၢအံၤန့ၣ် ကသမံသမိးက့ၤ ဂ့ၢ်ဂီၤအူတၢ်အိၣ်ကဒုအလီၢ်, တၢ်အီၣ်တၢ်အီ, ကသံၣ်ကသီတၢ်လိၣ်ဘၣ်တဖၣ်ပၣ်ဃုၥ် ပှၤလၢကွၢ်ဆၢၣ်မဲၥ်ဘၣ်ဟီၣ်ခိၣ်ဟူးဝးတၢ်ကီတၢ်ခဲတဖၣ်အဂီၢ် ကဟဲလီၤဆူ ကီၢ်ပယီၤအဂ့ၢ် ပၥ်ဖျါဃၥ်၀ဲလၢ အလံၥ်ပၥ်ဖျါအပူၤန့ၣ်လီၤ.
အမဲရကၤအိၣ်ဂဲၤဆၢထၢၣ်ဒီး ကီၢ်ပယီၤထံဖိကီၢ်ဖိကမျၢၢ်လၢ ဂုၥ်ကျဲးစၢးမၤက့ၤတၢ်ဂုၤထီၣ်ပသီတဖၣ် လၢတၢ်ဟးဂုၤဟးဂီၤအပူၤတဖၣ်အသိး တၢ်သံတၢ်ပှၢ်တၢ်ဘၣ်ဒိဘၣ်ထံးဒီးတၢ်ဟးဂုၤဟးဂီၤတဖၣ်အဖီခိၣ် သူၣ်တမုၥ်သးတမုၥ်အိၣ်ထီၣ်၀ဲအဂ့ၢ် စံး၀ဲန့ၣ်လီၤ.
ကီၢ်အမဲရကၤမၤစၢၤ၀ဲအသိး ကီၢ်ဘြံးတံး မၤစၢၤ၀ဲ ပီၣ်အကကွဲၢ်(၁၀), အီစတြ့လယါ မၤစၢၤ၀ဲ ဒီလၣ်ခံကကွဲၢ်, တရူးမၤစၢၤ၀ဲ ယွၣ်အကကွဲၢ်(၁၀၀)ဆူ ကီၢ်ပယီၤထံဖိကီၢ်ဖိကမျၢၢ်အအိၣ်အဂ့ၢ် ပၥ်ဖျါဃၥ်၀ဲလၢ လံၥ်ပၥ်ဖျါအပူၤန့ၣ်လီၤ.
