လါမးရှး(၃၁)သီ,၂၀၂၅နံၣ်
တၢ်ဟ့ၣ်တၢ်ဆီၣ်ထွဲမၤစၢၤဆူ ပှၤလၢအတူၢ်ဘၣ်ဟီၣ်ခိၣ်ဟူး၀းမၤဟးဂူၥ်ဟးဂီၤ တၢ်ဆၢကတီၢ်န့ၣ် မ်တၢ်ကဟံးန့ၢ်ခီၣ်တဃၥ်လၢ တၢ်ဟ့ၣ်တၢ်ဆီၣ်ထွဲတၢ်မၤကျဲလၢအလဲၤသဃဲၤလိၥ်အသးဒီး ဟ့ၣ်လီၤတၢ်ဆီၣ်ထွဲမၤစၢၤဆူ ဟီၣ်က၀ီၤကရူၢ်ကရၢလၢအမၤစၢၤတၢ်သ့ၣ်တဖၣ် ဒ်သိးတၢ်ဆီၣ်ထွဲမၤစၢၤအံၤ ကလဲၤတုၤ၀ဲဒၣ်ဆူ ပှၤလၢအလိၣ်ဘၣ်တၢ်ဆီၣ်ထွဲမၤစၢၤနီၢ်နီၢ်အအိၣ်ကသ့အဂီၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဟ့ၣ်သဆၣ်ထီၣ်ဆူ ထံဂုၤကီၢ်ဂၤထံကီၢ်တဖၣ်အအိၣ်န့ၣ်လီၤ.
ဖဲ၂၀၀၈နံၣ်အဆၢကတီၢ် ကီၢ်ပယီၤပူၤထံဖိကီၢ်ဖိတဖၣ် ဘၣ်ကွၢ်ဆၢၣ်မဲၥ်ဒီးကလံၤမုၢ်ဖးဒိၣ်(နၣ်က့း)အဆၢကတီၢ် ထံဂုၤကီၢ်ဂၤပှၤဂ့ၢ်၀ီတၢ်ဆီၣ်ထွဲမၤစၢၤလၢ တၢ်ဟ့ၣ်လီၤဆူ ထံဖိကီၢ်ဖိကမျၢၢ်အဂီၢ်တဖၣ်န့ၣ် သုးမီၤစိရိၤကရူၢ်အံၤ စူးကါ၀ဲဒၣ်လၢ အသုးကရူၢ်ဒၣ်၀ဲ အတၢ်ဘၣ်ဘျူးဘၣ်ဖှိၣ်အဂီၢ်န့ၣ် တၢ်စံၣ်စိၤတဲစိၤအိၣ်ဃၥ်၀ဲအဃိ တၢ်ဂ့ၢ်ဒ်န့ၣ်တဖၣ် သုးတကဲကဒီးတဂ့ၤအဂီၢ် ကအိၣ်ခိးကွၢ်၀ဲ ဘူးဘူးတံၢ်တံၢ်အဂ့ၢ်န့ၣ် စံး၀ဲန့ၣ်လီၤ.
ဖဲထံဖိကီၢ်ဖိကမျၢၢ်တဖၣ် ဘၣ်ကွၢ်ဆၢၣ်မဲၥ်ဘၣ်ဒီးန့ဆၢၣ်တၢ်တတၢၥ်တနါ ဟီၢ်ခိၣ်ဟူး၀းမၤဟးဂီၤတၢ် ဒိၣ်ဒိၣ်မုၢ်မုၢ်အဆၢကတီၢ်ဒၣ်လဲၥ်, သုးမီၤစိရိၤကရူၢ်အံၤ စူးကါ၀ဲကလံၤကျါတၢ်ဒုးဒီးပၥ်လီၤ၀ဲတၢ်ခးပနီၣ်ဆူ ထံဖိကီၢ်ဖိကမျၢၢ်အိၣ်ဆိးတၢ်လီၢ်ဒီးခးလီၤတၢ်လၢကဘီယူၤတဖၣ်အိၣ်ထီၣ်၀ဲန့ၣ်လီၤ.
တကးဘၣ် ထံဖိကီၢ်ဖိလၢ အဘၣ်ကွၢ်ဆၢၣ်မဲၥ်ဘၣ်ဒီး ဟီၣ်ခိၣ်ဟူး၀း မၤဟးဂူၥ်ဟးဂီၤတဖၣ် သုးမီၤစိရိၤတမၤစၢၤ၀ဲဘၣ်အမဲၥ်ညါ တြီမၤတံၥ်တၥ်အိၣ်၀ဲဒံးအဂ့ၢ် တၢ်ထံၣ်ဘၣ်ဒီးတၢ်သးတမုၥ်တဖၣ်အိၣ်ထီၣ်၀ဲအဂ့ၢ်န့ၣ် KNU စံးဝဲန့ၣ်လီၤ.
ဖဲလါမးရှး(၂၈)သီအနံၤ ကီၢ်ပယီၤပူၤခီဖျိ ဟီၣ်ခိၣ်ဟူး၀းကဲထီၣ်သး၀ံၤအလီၢ်ခံ (၄၈)နၣ်ရံၣ်အတီၢ်ပူၤ ပှၤသံအိၣ်၀ဲ(၁၆၁၄)ဂၤ, ပှၤဘၣ်ဒိ(၁၅၅၇)ဂၤ ဒီးပှၤလၢလီၤမၣ်အိၣ်ထီၣ်၀ဲ(၁၃၇၆)ဂၤအဂ့ၢ်န့ၣ် NUGဘိးဘၣ်ပၥ်ဖျါဃၥ်၀ဲ တၢ်ကစီၣ်န့ၣ်လီၤ.
ခီဖျိဟီၣ်ခိၣ်ဟူး၀းကဲထီၣ်လၢ စကဲ, ယိၤဒိၣ်ကီၢ်စဲၣ်ကလံၤထံးကီၢ်ဆၣ်တဖၣ်ဒီး ကီၢ်ခီတဖၣ်အပူၤအဃိ ဃိၣ်တဖၣ်, တၢ်ဘူၣ်တၢ်ဘါတၢ်သူၣ်ထီၣ်တဖၣ်, ဟံၣ်ဃီတဖၣ်ဘၣ်ဟးဂူၥ်ဟးဂီၤကွံၥ်၀ဲအသိး ထံဖိကီၢ်ဖိကမျၢၢ်သံဘၣ်ဒိတဖၣ်အိၣ်ထီၣ်၀ဲအဃိ ထံဂုၤကီၢ်ဂၤထံကီၢ်တဖၣ် အတၢ်မၤပူၤဖျဲးတၢ်မၤတဖၣ် ဒီးတၢ်ဆီၣ်ထွဲမၤစၢၤတဖၣ်စ့ၢ်ကီး ဟဲတုၤ၀ဲလံန့ၣ်လီၤ.
ဒ်န့ၣ်အသိး ကလုၥ်ဒူၣ်တၢ်ပၢၢ်ဆၢဂံၢ်ဘါကရူၢ်တဖၣ်ဒီး ကမျၢၢ်တၢ်ကရၢကရိတဖၣ်စ့ၢ်ကီး ပၥ်ဖျါဃၥ်၀ဲလၢ ထံဂုၤကီၢ်ဂၤထံကီၢ်တဖၣ် အတၢ်ဆီၣ်ထွဲမၤစၢၤတဖၣ်န့ၣ် ဒ်သိးသုးမီၤစိရိသုးကရူၢ် သုတတြီမၤတံၥ်တၥ်အီၤတဂ့ၤအဂီၢ် ဒီး အိၣ်ဂဲၤဆၢထၢၣ်ဃုၥ်ဒီး ထံဖိကီၢ်ဖိကမျၢၢ်တဖၣ်တဖံးဃီတညၣ်ဃီအဂ့ၢ်န့ၣ်လီၤ.
