လါမးရှး(၂၈)သီ,၂၀၂၅နံၣ်
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤသုးကီၣ်ကးအသုး ဟဲတ့ၢ်လီၤမ့ၣ်ပိၢ်ဆူ ခ့ၣ်အဲၣ်ယူၣ်-လၢၢ်ဒိၣ်ကီၢ်ဆၣ်ပူၤအဃိ သီခါတဂၤပၣ်ဃုၥ်လီၢ်က၀ီၤကမျၢၢ်(၃)ဂၤဘၣ်ဒိ၀ဲအဂ့ၢ်န့ၣ် ခ့ၣ်အဲၣ်ယူၣ်-လီၢ်ခၢၣ်သး ပၥ်ဖျါဃၥ်၀ဲတၢ်ကစီၣ် ဖဲလါမးရှး(၂၆)သီအနံၤန့ၣ်လီၤ.
လါမးရှး(၂၅)သီအနံၤန့ၣ် သုးကီၣ်ကးအသုးလၢအိၣ်ဆီလီၤဃၥ်အသး ဖဲစ့အိလးသ၀ီ, လၢၢ်ဒိၣ်ကီၢ်ဆၣ်ပူၤအံၤ ခီဖျိလဲၤတ့ၢ်လီၤဒြိမ့ၣ်ပိၢ်တဖၣ်ဆူ တလဲခ့ၣ်သ၀ီပူၤအဃိ ဖိသၣ်ခံဂၤပၣ်ဃုၥ် သၢဂၤဘၣ်ဒိ၀ဲအဂ့ၢ် စံး၀ဲန့ၣ်လီၤ.
နၣ်စးသ၀ီဖိလၢကလဲၤအိၣ်ကဒုဆူ တလဲခ့ၣ်သ၀ီတဖၣ် ဒ်အမ့ၢ် သးနံၣ်(၁)နံၣ်အိၣ် နီၢ်မူကျၢၤဖီ, သးနံၣ်(၉)နံၣ်အိၣ်နီၢ်အဲၣ်ကရၣ်ဖီဒီးသးနံၣ်(၃၀)အိၣ် နီၢ်မုၢ်ဒါတဖၣ်ဘၣ်ဒိ၀ဲအဂ့ၢ် ပၥ်ဖျါဃၥ်၀ဲန့ၣ်လီၤ.
တကးဘၣ် ဖဲလါမးရှး(၂၄)သီအနံၤ, ဟါလီၤခီအဆၢကတီၢ်စ့ၢ်ကီး သုးကီၣ်ကးအသုး ဟဲတ့ၢ်လီၤမ့ၣ်ပိၢ်ဖဲ ၀့ၢ်ဒီခိၣ်ဒီးထိၣ်ပှၥ်စူၥ်သ၀ီအဘၢၣ်စၢၤအဃိ သီခါလၢအမ့ၢ် အူစၣ်နီဘၣ်သး အစုတဲၥ်ကွံၥ်တခီန့ၣ်လီၤ.
စးထီၣ်လၢ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤဒီးတုၤလါမးရှး(၂၅)သီ, ၂၀၂၅နံၣ်အနံၤအတီၢ်ပူၤ ခီဖျိသုးကီၣ်ကးအသုး မၤ၀ဲကလံၤကျါတၢ်ဒုးဒီးခးကျိဖးဒိၣ်တဖၣ်အဃိ လီၢ်က၀ီၤကမျၢၢ်ဘၣ်သံ၀ဲ(၃၂၃၇)ဂၤ၀ံၤ ဘၣ်ဒိ၀ဲ(၆၄၂၆)ဂၤအဂ့ၢ် RFAပၥ်ဖျါ၀ဲလၢ အတၢ်မၤနီၣ်စရီအပူၤန့ၣ်လီၤ.
