ရၢၢ်ခၢၣ်ကီၢ်စဲၣ်ပူၤ AAဂုၥ်ကျဲးစၢးပၥ်လီၤ၀ဲ တၢ်ဘၣ်ကဲသုးသနူ လၢအဖိးသဲစးအဂီၢ်

လါမးရှး(၂၈)သီ,၂၀၂၄နံၣ်

ရၢၢ်ခၢၣ်ကီၢ်စဲၣ်အပူၤ ပှၤလၢသးနံၣ်ပှဲၤ(၁၈)နံၣ်ကိးဂၤဒဲး တၢ်ကဘၣ်ကဲသုးသနူကပၥ်လီၤ၀ဲအဖိးသဲစးအဂီၢ် ရၢၢ်ခၢၣ်သုးမုၢ်ဒိၣ်(AA)အိၣ်ကတီၤအသး၀ံၤ ကတီၢ်ခဲအံၤန့ၣ်စးထီၣ်မၤ၀ဲတၢ်ကရၢကရိတၢ်ဟူးတၢ်ဂဲၤတဖၣ်ဒီးထၢပှၤမံၤစရီတဖၣ်လၢ ဒူသ၀ီတဖၣ်အပူၤအဂ့ၢ် လီၢ်က၀ီၤဖိတဖၣ်စံး၀ဲန့ၣ်လီၤ.

ပိၥ်မုၣ်လၢသးနံၣ်အိၣ်(၁၈)နံၣ်ဆူ(၃၅)နံၣ်ဒီး ပိၥ်ခွါလၢသးနံၣ်အိၣ်(၁၈)နံၣ်ဆူ(၄၅)နံၣ်အတီၢ်ပူၤတဖၣ် ကဘၣ်ထီၣ်၀ဲ သုးတၢ်မၤလိကိးဂဲၤဒဲးအဂ့ၢ် စံး၀ဲန့ၣ်လီၤ.

ခီဖျိလၢတၢ်ရဲၣ်တၢ်ကျဲၤအံၤအဃိ တၢ်သူၣ်တမံသးတမုၥ်တဖၣ်အိၣ်ထီၣ်၀ဲအဂ့ၢ် ပှၤသးစၢ်လၢအိၣ်ဖဲ မၠီးအူကီၢ်ဆၣ်တဂၤစံး၀ဲန့ၣ်လီၤ.

“ဘၣ်ထွဲဒီးတၢ်ဘၣ်ကဲသုးအဖီခိၣ် ရၢၢ်ခၢၣ်သုးမုၢ်ဒိၣ်(AA) ဟးမၤတၢ်အိၣ်ဖှိၣ်လၢသ၀ီပူၤဒီး တဲလီၤ၀ဲအိၣ်လီၤ. ဟးထၢ၀ဲစ့ၢ်ကီး ပှၤနီၣ်ဂံၢ်စရီတဖၣ်လီၤ. သးနံၣ်အိၣ်(၁၈)နံၣ်ဆူ(၄၅)ဆူအဖီလၥ်တဖၣ် တၢ်ကဘၣ်ထီၣ်၀ဲသုးတၢ်မၤလိခံလါ၀ံၤန့ၣ် တၢ်ကဘၣ်ကဲသုး(၂)နံၣ်န့ၣ်လီၤ. စးထီၣ်လၢယသ့ၣ်ညါလံၤလံၤန့ၣ် ယသးအုးဒိၣ်မးလီၤ.”

ရၢၢ်ခၢၣ်သုးမုၢ်ဒိၣ်(AA)အံၤ စးထီၣ်ရဲၣ်ကျဲၤကွဲးလီၤပၥ်၀ဲ ဘၣ်ထွဲဒီးရၢၢ်ခၢၣ်ဒီကလုၥ်တၢ်ဒီတဒၢဂ့ၢ်၀ီ (National Defense Emergency Provision – NDEP)၀ံၤ တယံၤတမီၤဘၣ်န့ၣ် ကပၥ်လီၤတၢ်ဘျၢအံၤလၢအဖိးသဲစးအဂ့ၢ် ပှၤလၢအိၣ်ဘူးဒီး AAတဖၣ်စံး၀ဲန့ၣ်လီၤ.

ကတီၢ်ခဲအံၤန့ၣ် ဘၣ်ထွဲဒီးတၢ်ဘၣ်ကဲသုးအဂီၢ် တဘိးဘၣ်ရၤလီၤ၀ဲလၢအဖိးသဲစးဒံးဘၣ်ဆၣ် ဟးမၤ၀ဲ တၢ်ကရၢကရိတၢ်ဟူးတၢ်ဂဲၤတဖၣ်ဒီးထၢပှၤနီၣ်ဂံၢ်စရီတဖၣ် လၢကၠီးတီၣ်ဒီးမၠီးအူကီၢ်ဆၣ်တဖၣ်အပူၤအဂ့ၢ်စံး၀ဲန့ၣ်လီၤ.

ရၢၢ်ခၢၣ်သုးမုၢ်ဒိၣ်(AA) ကပၥ်လီၤတၢ်ဘၣ်ကဲသုးတၢ်ဘျၢန့ၣ် ကမ့ၢ်လၢဒူသ၀ီတၢ်ဘံၣ်တၢ်ဘၢအဂီၢ်ဧါ မ့တမ့ၢ် တၢ်ဒုးတၢ်ယၤအဂီၢ်ဧါန့ၣ် တၢ်တသ့ၣ်ဘၣ်ဒံးရှဲရှဲပျီပျီဒံးဘၣ်အဃိ လီၢ်က၀ီၤဖိတဖၣ်ဘၣ်ယိၣ်ဘၣ်ဘှီ၀ဲအဂ့ၢ် လီၢ်က၀ီၤဖိတဖၣ်စံး၀ဲန့ၣ်လီၤ.

Ref: RFA