လါမးရှး(၂၇)သီ,၂၀၂၅နံၣ်
ပယီၤသုးကီၣ်ကးအခိၣ် မ့အီၣ်လဲၣ်ကဟဲထီၣ်ဘၣ် ဘ့စတဲး(BIMSTEC)တၫ်အိၣ်ဖှိၣ်အဂီၫ် ကၠီၣ်တဲၣ်ပဒိၣ်အတၫ်ကွဲမုာ်အဖီခိၣ် ပာ်ဒ့ၣ်ပာ်ကမၣ်၀ဲဆူၣ်ဆူၣ်ကိၤကိၤအဂ့ၫ် ပယီၤကမျၢၫ်တၫ်ကရၢကရိလၢဟူးဂဲၤလၢပှၤဂ့ၫ်၀ီခွဲးယာ်အဂီၫ်တဖၣ် ထုးထီၣ်လံာ်ဘိးဘၣ်ရၤလီၤဖဲလါမးရှး(၂၅)သီအနံၤန့ၣ်လီၤ.
လၢကီၫ်ကၠီၣ်တဲၣ်,၀့ၫ်ဘီကီာ်အပူၤ လါအ့ဖြ့ၣ် (၃)သီဒီး(၄)သီအနံၤန့ၣ် ကၠီၣ်တဲၣ်ပဒိၣ် ကွဲမုာ်မ့အီၣ်လဲၣ်လၢကဟဲထီၣ်ဘၣ် ဘ့စတဲး(BIMSTEC)ပတီၫ်ထီတၫ်အိၣ်ဖှိၣ်အဂ့ၫ် ဖဲအပူၤကွံာ်စှၤသီန့ၣ်Thai PBSတၫ်ကစီၣ်သန့ ပာ်ဖျါ၀ဲလီၤ.
ကၠီၣ်တဲၣ်,အ့ဒံယါ,နံၣ်ပီ,ဘူၣ်တၣ်,ဘ့ကလါဒ့းရှ်,ပယီၤ,သံၣ်ရံးသ့ၣ်ကၣ်ထံကီၫ်တဖၣ်ပာ်ဃုာ် ဘ့စတဲး(BIMSTEC) ပတီၫ်ထီတၫ်အိၣ်ဖှိၣ် သုးကွီၫ်မ့ၣ်ပှၤမၤကမၣ်တၫ်မ့အီၣ်လဲၣ်ကဟဲထီၣ်ဘၣ်အဂီၫ် တၫ်ကွဲမုာ်၀ဲတၫ်ရဲၣ်တၫ်ကျဲၤန့ၣ် မ့ၫ်တၫ်တပာ်လုၫ်ပာ်ပှ့ၤ ကီၫ်ပယီၤကမျၢၫ်အပှၤဂ့ၫ်၀ီခွဲးယာ်ဒီးဒံၣ်မိၣ်ကရ့ၣ်စံၣ်တၫ်မုၫ်လၫ်တဖၣ်အဂ့ၫ် ကရၢဟူးဂဲၤလၢ ပှၤဂ့ၫ်၀ီခွဲးယာ်တခါလၢအမ့ၫ် Justice For Myanmar ထုးထီၣ်ဘိးဘၣ်ရၤလီၤ၀ဲဖဲလါမးရှး(၂၅)သီအနံၤန့ၣ်လီၤ.
ဒ်န့ၣ်အသိးကၠီၣ်တဲၣ်ပဒိၣ် အတၫ်ဆၢတဲာ်လၢ တၫ်ကွဲမုာ်မ့အီၣ်လဲၣ် လၢကဟဲထီၣ်ဘၣ် ဘ့စတဲး(BIMSTEC)ပတီၫ်ထီတၫ်အိၣ်ဖှိၣ်န့ၣ် ပာ်ဒ့ၣ်ပာ်ကမၣ်၀ဲဆူၣ်ဆူၣ်ကိၤကိၤအဂ့ၫ် ကမျၢၫ်တၫ်ကရၢကရိအဂၤတခါလၢအမ့ၫ် Defend Myanmar Democracy (DMD)ကရၢစ့ၫ်ကီး ထုးထီၣ်ဘိးဘၣ်ရၤလီၤတဲတ့ၫ်ဃာ်၀ဲလီၤ.
Defend Myanmar Democracy (DMD)အပှၤတဲတၫ်ပၢ နီၫ်အီၣ်တဲ၀ဲလၢ”ကၠီၣ်တဲၣ်န့ၣ် တကြၢးကွဲမုာ်မ့အီၣ်လဲၣ် ဒ်ကီၫ်ပယီၤအခၢၣ်စးဘၣ်.အ၀ဲန့ၣ် တမ့ၫ်ပဒိၣ်ခိၣ်နၫ်ဘၣ်.မ့ၫ်ပှၤမၤကမၣ်တၫ် သုးကရူၫ်ကဲခိၣ်နၫ်လီၤ.လၢတၫ်ကဒါ လီၤန့ၫ်အီၤ လီၫ်ဒါဂီၤဒီးကွဲမုာ်အီအလီၫ်န့ၣ် ခီဖျိတၫ်မၤသံလီၤတူာ်ပှၤရိၣ်ဟ့ၣ်ကၠၣ်ဖိတဖၣ် ဒ်ဟီၣ်ခိၣ်ဒီဘ့ၣ်စံၣ်ညီၣ် ပီတ့တၫ်ဘျၢအသိး အၣ်ကၠ့ၣ်တံနါစံၣ်ညီၣ်ပီတ့၀ဲၤဒၢးအတၫ်ဆၢတဲာ်တဖၣ် တၫ်ကလူၤပိာ်မၤထွဲ၀ဲ၀ံၤ ကြၢးတၫ်ဖီၣ် အီၤန့ၣ်လီၤ.”
မ့အီၣ်လဲၣ် လဲၤထီၣ်တၫ်အိၣ်ဖှိၣ်၀ဲန့ၣ်သုတန့ၫ်အဂီၫ် ကဆၢထၢၣ်ဂၢၫ်ကျၢၤတြီဆၢ၀ဲအသိး,တၫ်ကလူၤပိာ်ဒိကနၣ်ဘၣ် အၣ်ကၠ့ၣ်တံနါ စံၣ်ညီၣ်ပီတ့၀ဲၤဒၢးအတၫ်ဆၢတဲာ်၀ံၤ ကြၢးတၫ်ဖီၣ်အီၤအဂ့ၫ်စ့ၫ်ကီး ပှၤဂ့ၫ်၀ီကရၢတဖၣ်တဲ၀ဲလီၤ.
အၣ်စံၣ်ယၣ်တကပၤ အ၀ဲသ့ၣ်အပတီၫ်ထီတၫ်အိၣ်ဖှိၣ်တဖၣ်အပူၤ တဟ့ၣ်ဒုးထီၣ်မ့အီၣ်လဲၣ်ဘၣ်ဆၣ် ဘ့းစတဲး (BIMSTEC)န့ၣ် သုးကရူၫ်လၢတဖိးသဲစးအံၤ ပာ်ပနီၣ်၀ဲလၢဖိးသဲစးအပူၤ၀ံၤ ရ့လိာ်မၤဘၣ်ထွဲအသးတကးဘၣ်,၂၀၂၂နံၣ် ကရၢကလံာ်တၫ်အၢၣ်လီၤ တၫ်ကဆဲးလီၤစုမုၫ်ကျၢၫ်အဂီၫ် ကွဲမုာ်စ့ၫ်ကီးမ့အီၣ်လဲၣ်ဒၣ်လဲၣ်အဂ့ၫ် DMDကရၢ စံးအၢ၀ဲ န့ၣ်လီၤ.
ဘ့စတဲး (BIMSTEC)န့ၣ် ဖဲ၂၀၂၂နံၣ်,လၢကီၫ်သံၣ်ရံးလ့ၣ်ကၣ်အပူၤ တၫ်မၤ၀ဲအ၀ဲသ့ၣ် အထံဂုၤကီၫ်ဂၤကိတိာ်တၫ်အိၣ် ဖှိၣ်အပူၤ ကွဲမုာ်သုးကရူၫ်တဖုအံၤလၢကဟဲထီၣ်၀ဲအသိး,၂၀၂၄နံၣ် (၄)နံၣ်တဘျီ ဘ့စတဲး (BIMSTEC) ထံကီၫ်တၫ်ဘံၣ် တၫ်ဘၢခိၣ်နၫ်ဒိၣ်ထီတဖၣ် တၫ်အိၣ်ဖှိၣ်စ့ၫ်ကီးဒ်ဟံၣ်ကစၫ်အသိး ဟ့ၣ်တၫ်ပျဲလၢ သုးကီၣ်ကးမၤ၀ဲအဂ့ၫ် တၫ်သ့ၣ်ညါ ဘၣ်လီၤ.
ဘ့စတဲး (BIMSTEC)ဒီးအကရၢထံကီၫ်တဖၣ်တကပၤ သုးကရူၫ်တဖုလၢမၤကမၣ်ကွီၫ်မ့ၣ်အံၤ သုတပာ်ပနီၣ်၀ဲအဂီၫ်, ကတြီဆၢဒီးထုးကွံာ်မ့အီၣ်လဲၣ်ဒီးအခၢၣ်စးတဖၣ် လၢပတီၫ်ထီတၫ်အိၣ်ဖှိၣ်အံၤအဂီၫ် ပှၤဂ့ၫ်၀ီကရၢတဖၣ် တဲဆီၣ်တခူ ထီၣ်ဃ့ထီၣ်ဃာ်၀ဲန့ၣ်လီၤ.
Ref: Khit Thit
