လါမးရှး(၂၅)သီ,၂၀၂၅နံၣ်
သုးကီၣ်ကးန့ၣ် လၢထံကီၫ်ဒီတဘ့ၣ်အပူၤ မၤ၀ဲတၫ်ဒုးတၫ်ယၤတကတီၫ်ဃီအကတီၫ် လၢန့ၣ်ပၠံၣ်တီၣ်မၤ၀ဲတၫ်တၢၣ်ပီၣ် တဲသကိးတၫ်မုာ်တၫ်ခုၣ် တတီၤန့ၣ်လီၤ.
တၫ်တၢၣ်ပီၣ်တဲသကိးအံၤ မၤ၀ဲဖဲလါမးရှး(၂၄)သီတုၤ(၂၆)သီ,ကယံာ်(၃)သီ၀ံၤ သုးကီၣ်ကးအပှၤတၢၣ်ပီၣ်တဲသကိး ဃုာ်တၫ်ကလုာ်ဒူၣ်ဖီၣ်စုက၀ဲၤတနီၤဒီးထံရူၫ်ကီၫ်သဲးပၣ်တံၣ်တဖၣ် ဟဲထီၣ်၀ဲလီၤ.
တၫ်ကမၤစှၤလီၤကွံာ်ကီၫ်ပူၤတၫ်သဘံၣ်သဘုၣ်တဖၣ်လၢအဆိအချ့အဂီၫ်ဒီးနံၣ်ဖုၣ်,နံၣ်ထီ မုာ်ကျိၤ၀ဲၤကွာ်တၫ်ဂုၤထီၣ် ပသီထီၣ် တၫ်မၤအကျဲသနူတဖၣ် မၤ၀ဲကန့ၫ်အဂီၫ် ပညိၣ်၀ဲအဂ့ၫ် သုးကီၣ်ကးအဒီကလုာ်တၫ်ဃူတၫ်ဖိးဒီးတၫ်ဒုးအိၣ် ထီၣ်တၫ်မုာ်တၫ်ခုၣ်ကမံတံာ်(NSPNC)ပှၤပၢၤလီၫ်ဆ့ၣ်နီၤ သုးခိၣ်ဒိၣ်စိယၣ်ပၠံး တဲ၀ဲဖဲတၫ်တၢၣ် ပီၣ်တဲသကိးအပူၤန့ၣ်လီၤ.
“တၫ်မုာ်တၫ်ခုၣ်အဂီၫ် လၢတမ့ၫ်တၫ်စုဆူၣ်ခီၣ်တကးအကျဲတၫ်မၤထွဲအီၤန့ၣ် တၫ်ကဒိးန့ၫ် တၫ်မုာ်တၫ်ခုၣ်လၢတူၫ်ယံာ်ဒီး ဂၢၫ်ကျၢၤလီၤန့ၣ် မ့ၫ်ဒ်သိးကမျၢၫ်အကျါ တၫ်ထံၣ်တၫ်သ့ၣ်ညါ ကအိၣ်အါထီၣ်အဂီၫ်လီၤ.”
ဖဲတၫ်မၤ၀ဲတၫ်တၢၣ်ပီၣ်တဲသကိးအံၤအကတီၫ် လၢကခၠ့ၣ်ကီၫ်စဲၣ်,ကရ့ၣ်နံၣ်ကီၫ်စဲၣ်,ကညီကီၫ်စဲၣ်,မကွ့ကီၫ်ခီ, စကဲကီၫ်ခီ,ပကိကီၫ်ခီဒီးမါတလ့ကီၫ်ခီတဖၣ်အပူၤ တၫ်ဒုးတဖၣ်ဆူၣ်၀ဲန့ၣ်လီၤ.
တၫ်ဒုးတဖၣ်အံၤအပူၤ သုးကီၣ်ကးအသုးန့ၣ် သူ၀ဲကလံၤကျါဒီးကျိဖးဒိၣ်တဖၣ်၀ံၤ ခးလီၤတၫ်ဒၣ်လဲၣ်ဆူကမျၢၫ်အိၣ်ဒူ သ၀ီတဖၣ်အပူၤအဂ့ၫ် လီၫ်က၀ီၤဖိတဖၣ်တဲ၀ဲလီၤ.
တၫ်တၢၣ်ပီၣ်တဲသကိးအံၤ မ့ၫ်ဒ်သိးကလီအီၣ် ထံဂုၤကီၫ်ဂၤတဖၣ်လီၤအဂ့ၫ် လၢကရ့ၣ်နံၣ်ကီၫ်စဲၣ်ဒီးယိၤဒိၣ်ကီၫ်စဲၣ် ကလံၤထံးတကပၤ တၫ်ဒုးကဲထီၣ်ဒီးသုးကီၣ်ကးကရၢတဖုလၢအမ့ၢ် ကရ့ၣ်နံၣ်ဒီကလုာ်တၫ်လဲၤထီၣ်လဲၤထီပၣ်တံၣ် (KNPP) အလီၫ်ခၢၣ်သးပၢဆှၢတၫ်ကမံးတံာ် ခူဒဲၣ်နံၣ်ယၢၣ်တဲ၀ဲလီၤ.
“တၫ်တၢၣ်ပီၣ်တဲသကိးအံၤ လၢပဂီၫ်အခီပညီတအိၣ်ဘၣ်.ထံဖိကီၫ်ဖိကမျၢၫ်အဂီၫ်စ့ၫ်ကီး အခီပညီတအိၣ်ဘၣ်.ပှၤလၢ ပာ်ဃုာ်လၢတၫ်တၢၣ်ပီၣ်တဲသကိးအံၤအပူၤဒီးထံဂုၤကီၫ်ဂၤလၢဒိကနၣ်၀ဲတဖၣ်န့ၣ် အဲၣ်ဒိးတဲဘၣ်လၢ သုးကီၣ်ကး လီ တ့ၫ်တၫ်ဒ်သိးအံၤန့ၣ် နာ်၀ဲဒံးလီၤဧါ”
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ပှၤတဲတၫ်ပၢ ပဒိၣ်စီၤတီနံၤစ့ၫ်ကီး တၫ်တၢၣ်ပီၣ်တဲသကိးအံၤ မ့ၫ်တၫ်မၤလၢ အဘျူးတအိၣ်ဘၣ်လီၤအဂ့ၫ် ပဲာ်ထံနီၤဖး၀ဲလီၤ.
သုးကီၣ်ကး NSPNC ပှၤပၢၤလီၫ်ဆ့ၣ်နီၤ သုးခိၣ်ဒိၣ်စိ(ဒုတိယ ဗိုလ်ချုပ်ကြီး) ယၣ်ပၠံးတခီ တၫ်တၢၣ်ပီၣ်တဲသကိးအစၢ တဖၣ် ဒုးအိၣ်ထီၣ်၀ဲအမိၫ်လံၤမိၫ်ပှၫ်ကန့ၫ်အဂီၫ် ကမၤထွဲ၀ဲအဂ့ၫ် တဲ၀ဲလီၤ.
Ref: RFA
