လါမးရှး(၂၄)သီ,၂၀၂၅နံၣ်
လါမးရှး(၂၂)သီ,၂၀၂၅နံၣ်အနံၤန့ၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တီခိၣ်ရိၣ်မဲ တၢ်ပၢၢ်ဆၢသုးပၥ်ဖှိၣ် စးထီၣ်ဒုးသုးကီၣ်ကးချၢၣ်ဒ့သုးကလၢၤလၢအိၣ်ဖဲ ကီၢ်ဆၣ်လူပျဲၢ်, သုးက့(၇)ဟီၣ်က၀ီၤပူၤအဂ့ၢ် တၢ်သ့ၣ်ညါဘၣ်လၢ လီၢ်က၀ီၤတၢ်ကစီၣ်တဖၣ်ပၥ်ဖျါဃၥ်၀ဲအဖီခိၣ်န့ၣ်လီၤ.
မဟါဒီတနံၤစ့ၢ်ကီး တၢ်ဒုးဆူၣ်ထီၣ်၀ဲအဃိ လီၢ်က၀ီၤကမျၢၢ်(၁၅၀)ဃၥ်ဃၥ် ဘၣ်လဲၤစံၣ်ပူၤဖျဲးသးဆူ ကၠီၣ်တဲၣ်တပၤန့ၣ်လီၤ. ခီဖျိတၢ်ဒုးဆူၣ်ထီၣ်၀ဲအဆၢကတီၢ် သုးကီၣ်ကးတပၤ ဟဲ့တၢ်လီၤမ့ၣ်ပိၢ်လၢ ကဘီယူၤအိၣ်ထီၣ်၀ဲန့ၣ်လီၤ.
သုးကီၣ်ကးအသုးကဘီဒုးသုး YAK-130 ဟဲတ့ၢ်လီၤမ့ၣ်ပိၢ်(၄)ဖျၢၣ်ဆူ ကၠီၣ်တဲၣ်-ပယီၤကီၢ်ဆၢပူၤအဃိ မ့ၣ်ပိၢ်ပိၢ်ဖးထီၣ်အကလုၢ်တဖၣ်အိၣ်ထီၣ်၀ဲန့ၣ်လီၤ.
“သုးပၥ်ဖှိၣ် စးထီၣ်လဲၤဒုးသုးကီၣ်ကးသုးကလၢၤလၢဒြိတဖၣ်လီၤ. သုးကီၣ်ကးဟဲမၤစၢၤအပှၤလၢ ခိတပၤတန့ၢ်လၢၤဘၣ်.သုးကီၣ်ကးအပှၤတဖၣ်ခီၣ်ဆၢဒုးက့ၤတၢ်လီၤ.တနံၤအံၤန့ၣ်ဟဲတ့ၢ်လီၤမ့ၣ်ပိၢ်လၢကဘီယူၤအိၣ်ထီၣ်၀ဲလီၤ.သုးကလၢၤတခီတၢ်က၀ီၤကးတံၥ်ဃၥ်၀ဲ”အဂ့ၢ်ဂံၢ်ခီၣ်ထံးတၢ်ပၢၢ်ဆၢတၢ်ကစီၣ်စံး၀ဲန့ၣ်လီၤ.
ကတီၢ်ခဲအံၤ ခီဖျိတၢ်ဒုးကဲထီၣ်လၢ ကၠီၣ်တဲၣ်-ပယီၤကီၢ်ဆၢအကပၤအဃိ ကၠီၣ်တဲၣ်သုးမုၢ်ဒိၣ် မၤဃံးထီၣ်ဃၥ်၀ဲ တၢ်ဘံၣ်တၢ်ဘၢတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
သုးကီၣ်ကးကဘီယူၤဒုးသုးဟဲတ့ၢ်လီၤမ့ၣ်ပိၢ်အဃိ ကၠီၣ်တဲၣ်သုးမုၢ်ဒိၣ် အမဲရကၤထုးထီၣ် F-16 ကဘီယူၤဒုးသုး(၂)ခိၣ် ဟဲဆှၣ်တၢ်လၢ ကၠီၣ်တဲၣ်-ပယီၤကီၢ်ဆၢအဂ့ၢ် ကၠီၣ်တဲၣ်သုးမုၢ်ဒိၣ်ပၥ်ဖျါဃၥ်၀ဲတၢ်ကစီၣ်န့ၣ်လီၤ.
ဖဲအပူၤကွံၥ် လါမးရှး(၁၄)သီအနံၤစ့ၢ်ကီး KNLAတီခိၣ်ရိၣ်မဲတၢ်ပၢၢ်ဆၢသုးပၥ်ဖှိၣ်တဖၣ်ဒုးမၤန့ၢ်ဃၥ်၀ဲ သုးကီၣ်ကးပူလူတူၢ်သုးကလၢၤလၢအိၣ်ဖဲ သုးက့(၇)ဟီၣ်က၀ီၤပူၤဒီး တၢ်ဒုးအပူၤ သုးကီၣ်ကးအသုးသံ၀ဲ(၁၂)ဂၤဒီး (၁၁)ဂၤန့ၣ် ဃ့ၢ်ပဒ့ၣ်အသးဆူကၠီၣ်တဲၣ်တပၤအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲန့ၣ်လီၤ.
