လါမးရှး(၂၁)သီ,၂၀၂၅နံၣ်
လါမးရှး(၁၉)သီ, ၂၀၂၅နံၣ်အနံၤ,ဂီၤ(၃)နၣ်ရံၣ်တုၤ(၈)နၣ်ရံၣ်အဆၢကတီၢ်န့ၣ် သုးကီၣ်ကးအသုး သူ၀ဲကဘီယူၤဒုးသုးဒီးဒြိတဖၣ်၀ံၤ ဟဲတ့ၢ်လီၤမ့ၣ်ပိၢ်အဖျၢၣ်(၅၀)ဆူ ဖၣ်ပူၣ်၀့ၢ်လီၢ်က၀ီၤ, ကီၢ်ဆၣ်ဘုသိၣ်, ကီၢ်ရ့ၣ်မုၢ်တြီၢ်ဟီၣ်က၀ီၤပူၤအဂ့ၢ် ဂံၢ်ခီၣ်ထံးသုးဂ့ၢ်၀ီတၢ်ကစီၣ်စံး၀ဲန့ၣ်လီၤ.
“တဂီၤအံၤ လါမးရှး(၁၉)သီ, ဂီၤ(၃)နၣ်ရံၣ်တုၤ(၈)နၣ်ရံၣ်အဆၢကတီၢ် ဟဲတ့ၢ်လီၤ၀ဲတဖျၢၣ်လီၤ. ကဘီယူၤဒုးသုး ဟဲတ့ၢ်လီၤဆိလီၤ. ၀ံၤမး ဒြိဖးဒိၣ်တခိၣ် ဟဲတ့ၢ်လီၤ၀ဲမ့ၣ်ပိၢ်တဖၣ်အါမးလီၤ. တစှၤန့ၣ်အဖျၢၣ်(၅၀)ဆူ(၆၀)ဃၣ်ဃၣ်ညါအဂ့ၢ်” ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
“ဖၣ်ပူၣ်သုးတၢ်တိၥ်ကူၣ်ကျဲၤခိၣ်သ့ၣ်အိၣ်သုးကီၣ်ကးအပှၤသုးဖိတဖၣ်အံၤ အသကိးတဖၣ်မ့ၢ်ဟဲဆှၢန့ၢ်အီၤတၢ်ပီးတၢ်လီတဖၣ်န့ၣ် ဟဲဒုးပှၤအိၣ်အဂ့ၢ်” အ၀ဲစံး၀ဲန့ၣ်လီၤ.
တကးဘၣ် KNLAသုးပၥ်ဖှိၣ်တဖၣ် ထီၣ်ဒုး၀ဲသုးကီၣ်ကးအပှၤသုးဖိလၢဟဲက့ၤအိၣ်ဆီလီၤအသးလၢ BGF(၁၀၁၃)သုးအိၣ်ကတၢတံးသုးကလၢၤတၢ်လီၢ်တဖၣ်န့ၣ်လီၤ.
လါဖ့ၤဘြူၤအါရံၤ(၂၇)သီအနံၤန့ၣ် KNLAသုးပၥ်ဖှိၣ်တဖၣ် နုၥ်လီၤဒုး၀ဲ သုးကီၣ်ကးအပှၤသုးဖိတဖၣ်အဃိ သုးကီၣ်ကးအပှၤသံဒီးဘၣ်ဒိတဖၣ်အိၣ်၀ဲ၀ံၤ တၢ်ဖီၣ်န့ၢ်မူဒံးအိၣ်(၆)ဂၤအဂ့ၢ် ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
KNLAသုးပၥ်ဖှိၣ်တဖၣ် ဒီၣ်တဲၥ်ဃၥ် ထံကျိၤအဃိ သုးကီၣ်ကးအသုးတဖၣ် ဘၣ်ကွၢ်ဆၢၣ်မဲၥ်ဘၣ်ဒီးထံတၢ်ကီတၢ်ခဲ၀ံၤ က့ၤသုးအိၣ်အသးဆူ ထံအိၣ်အလီၢ်ထံကျိတပၤအဂ့ၢ် စံး၀ဲန့ၣ်လီၤ.
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,ကီၢ်ရ့ၣ်မုၢ်တြီၢ်,ဖၣ်ပူၣ်သုးတၢ်တိၥ်ကူၣ်ကျဲၤခိၣ်သ့ၣ်တၢ်လူၢ်ခိၣ်ဒီးကတၢတံးသုးကလၢၤတဖၣ်အံၤ KNLAသုးပၥ်ဖှိၣ်တဖၣ် နုၥ်ဒုး၀ဲတပယူၥ်ဃီအဂ့ၢ် ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
Ref: Salween Press
