လါမးရှး(၂၀)သီ,၂၀၂၅နံၣ်
တၫ်ဃုထၢလၢ သုးဟံးန့ၫ်ထံကီၫ်တၫ်စိတၫ်ကမီၤတဖုအံၤကမၤ၀ဲန့ၣ် ကမျၢၫ်တၫ်ကရၢကရိတဖၣ် အိၣ်ခိးကွၫ်န့ၫ်,တန့ၫ် တလီၤတံၫ်ဘၣ်အဂ့ၫ် ကီၫ်ပူၤ,ကီၫ်ချၢကမျၢၫ်တၫ်ကရၢကရိတဖၣ်တဲ၀ဲလီၤ.
သုးကီၣ်ကးအခိၣ်လၢဟံးန့ၫ်ထံကီၫ်တၫ်စိတၫ်ကမီၤအံၤ ဖဲအပူၤကွံာ်လဲၤဆူကီၫ်ရၢးရှၢၣ်ဒီဘ့ၣ်လၣ်ရူးထံကီၫ်တဖၣ်အဆၢကတီၫ် တနံၣ်အံၤအလၢာ် တၫ်ဃုထၢလၢကမၤ၀ဲန့ၣ် ကွဲမုာ်ဃး ထံဂုၤကီၫ်ဂၤတဖၣ်လၢကဟဲကွၫ်၀ဲအသိး, ကကဲထီၣ်တၫ်ဃုထၢလၢအိၣ်ဒီးတၫ်တီတၫ်တြၫ်န့ၣ် တၫ်ကပာ်ဖှိၣ်မၤသကိးဘၣ်တၫ်အဂီၫ် တဲ၀ဲန့ၣ်လီၤ.
ဘၣ်ဆၣ်သနာ်က့တုၤလၢအခဲအံၤ ကီၫ်ပယီၤပူၤကမျၢၫ်တၫ်ကရၢကရိတဖၣ် ကအိၣ်ခိးကွၫ်ဘၣ်တၫ်ဃုထၢအံၤအဂီၫ် သုးကီၣ်ကးကွဲမုာ်ဃာ်၀ဲတအိၣ်ဒံးဘၣ်.
ကီၫ်စၢဖှိၣ်တၫ်ဃုထၢခီၣ်မံးရှၢၣ်လၢ ဘၣ်ဒိကနၣ်သုးကီၣ်ကးအကလုၫ်အံၤစ့ၫ်ကီး ကိးထံၣ်လိာ် ကမျၢၫ်တၫ်ကရၢကရိတဖၣ်၀ံၤ ဘၣ်ထွဲဒီးတၫ်ဃုထၢတၫ်ဖံးတၫ်မၤတၫ်ဂ့ၫ်တဖၣ် တတဲဘၣ်၀ဲအသိး,ကမျၢၫ်တၫ်ကရၢကရိတဖၣ်စ့ၫ်ကီး တၫ် ဃုထၢလၢသုးကီၣ်ကးကမၤ၀ဲ ကအိၣ်ခိးကွၫ်၀ဲအဂီၫ် ပာ်ဖျါထီၣ်အမံၤအသၣ်တအိၣ်ဒံးဘၣ်အဂ့ၫ် ကီၫ်ပူၤကမျၢၫ်တၫ် ကရၢကရိတဖၣ်တဲ၀ဲလီၤ.
ဒ်သိးကကဲထီၣ် တၫ်ဃုထၢလၢအိၣ်ဒီးတၫ်တီတၫ်တြၫ်အဂီၫ် ကမျၢၫ်တၫ်ကရၢကရိလၢ အိၣ်ခိးကွၫ်တၫ်ဃုထၢန့ၣ် မ့ၫ်တၫ်လၢအရ့ဒိၣ်အဃိ သုးကီၣ်ကးတကပၤ ကပျဲကမျၢၫ်တၫ်ကရၢကရိလၢအိၣ်ဃူအီၤဒီးထံဂုၤကီၫ်ဂၤတနီၤသ့အဂ့ၫ် ပှၤလၢအိၣ်ခိးကွၫ်တၫ်ဃုထၢ ပဲာ်ထံနီၤဖး၀ဲလီၤ.
သုးကီၣ်ကးန့ၣ် တၫ်ဃုထၢလၢကမၤ၀ဲ မ့ၫ်တၫ်ဃုထၢလၢအိၣ်ဒီးတၫ်တီတၫ်တြၫ်လီၤအဂ့ၫ် တဲထံဂုၤကီၫ်ဂၤတဖၣ် ကန့ၫ် အဂီၫ် ဒ်တၫ်ဂ့ၫ်တၫ်ကျိၤတခါအသိး,ထုးထီၣ်သူ၀ဲကီၫ်ပူၤကမျၢၫ် တၫ်ကရၢကရိတဖၣ်သ့ဘၣ်ဆၣ် ,တၫ်ကရၢကရိတဖၣ်အံၤ တမ့ၫ်လၢအိၣ်ခိးကွၫ်ညီနုၫ်တၫ်ဃုထၢတုၤလီၤတီၤလီၤဘၣ်အဂ့ၫ် ပှၤခိးကွၫ်တၫ်ဃုထၢလၢဟဲဃ့ၫ်အိၣ်ကဒုဆူ ထံဂုၤကီၫ်ဂၤတဂၤတဲ၀ဲလီၤ.
သုးမီၤစိရိၤလီၫ်လံၤ အူသါရွှ့ၣ်ပၢတၫ်အစိၤစ့ၫ်ကီး ထံရူၫ်ကီၫ်သဲးတၫ်ဆီတလဲအဂီၫ် ဖဲ၂၀၁၀နံၣ်တၫ်ဃုထၢအပူၤ ကမျၢၫ် တၫ်ကရၢကရိတဖၣ် အိၣ်ခိးကွၫ်၀ဲတန့ၫ်ဘၣ်အမဲာ်ညါ စးထီၣ်ဖဲ၂၀၁၂နံၣ်တၫ်ဘၢၣ်စၢၤတၫ်ဃုထၢန့ၣ် ကီၫ်ပယီၤပူၤ တၫ်ဃုထၢလၢမၤ၀ဲတဖၣ် ဟ့ၣ်ခွဲးလၢကမျၢၫ်တၫ်ကရၢကရိတဖၣ် အိၣ်ခိးကွၫ်၀ဲန့ၣ်လီၤ.
