လါမးရှး(၂၀)သီ,၂၀၂၅နံၣ်
၂၀၂၅နံၣ်, လါဖ့ၤဘြူၤအါရံၤအတီၢ်ပူၤ ကညီကူၣ်သ့ဆဲးလၤ၀ဲၤကျိၤ(KECD) ပှၤဘၣ်မူဘၣ်ဒါတဖၣ် မၤ၀ဲတၢ်ထံၣ်လိၥ်ဒီး ကၠိဖိမုၣ်/ခွါ, ကၠိသရၣ်သမါတဖၣ်လၢ အိၣ်ဖဲခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဆှၢဟီၣ်က၀ီၤ, ကီၢ်ရ့ၣ်(၃)ဘ့ၣ်အပူၤ ကီၢ်ဆၣ်(၅)ဘ့ၣ်အဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲန့ၣ်လီၤ.
ကီၢ်သူလ့ၤတၢ်ပၢဆှၢဟီၣ်က၀ီၤတဖၣ်ဒ်အမ့ၢ် ဒူသထူၣ်ကီၢ်ရ့ၣ်ပူၤ ကီၢ်ဆၣ်ဖၣ်အၣ်, ဒူပျၥ်ယၥ်ကီၢ်ရ့ၣ်ပူၤ ကီးတရံးကီၢ်ဆၣ်, ဖၣ်အၣ်ကီၢ်ရ့ၣ်ပူၤ တၢ်ကြဲၢ်ကီၢ်ဆၣ်ဒီးနဘူကီၢ်ဆၣ်တဖၣ်အပူၤ လဲၤမၤ၀ဲတၢ်ထံၣ်လိၥ်ဒီး ကီၢ်ရ့ၣ်,ကီၢ်ဆၣ်ပှၤဘၣ်မူဘၣ်ဒါဒီးကၠိဖိမုၣ်/ခွါခဲလၢၥ်ပၥ်ဖှိၣ် ပှၤနီၣ်ဂံၢ်(၂၅၀၀)ဘျဲၣ်လၢ တၢ်ဘံၣ်တၢ်ဘၢတၢ်လီၤဘၣ်ယိၣ်အပူၤအဂ့ၢ် စံး၀ဲန့ၣ်လီၤ.
လီၢ်က၀ီၤတၢ်ကရၢကရိခိၣ်နၢ်တဂၤစံး၀ဲလၢ” တၢ်ဟဲမၤရဲၣ်ကျဲၤန့ၣ် တၢ်ရဲၣ်တၢ်ကျဲၤတဖၣ်န့ၣ် ပဖိသၣ်တဖၣ် ဒိးန့ၢ်ဘၣ်တၢ်သ့ၣ်ညါနၢ်ပၢၢ်တဖၣ်အသိး တၢ်ပၥ်ဖှိၣ်မၤသကိးတၢ်ဒီးတၢ်သူၣ်ဆူၣ်သးဂဲၤတဖၣ်အိၣ်ထီၣ်၀ဲအဃိ ဂ့ၤဒိၣ်မးလီၤ” တဲစံးပတြၢၤ၀ဲဒီး ဒ်သိးတၢ်ရဲၣ်တၢ်ကျဲၤတဖၣ် ကဟဲမၤ၀ဲလၢ ကီၢ်ရ့ၣ်တဘ့ၣ်စုၥ်စုၥ်အပူၤအဂီၢ်စ့ၢ်ကီး ကွဲမုၥ်၀ဲအဂ့ၢ် စံး၀ဲန့ၣ်လီၤ.
တၢ်ထံၣ်လိၥ်အပူၤ တၢ်မၤ၀ဲတၢ်ရဲၣ်တၢ်ကျဲၤတဖၣ်ဒ်အမ့ၢ် တၢ်လိၥ်ခိၣ်လိၥ်ကွဲတဖၣ်, တၢ်တဲသကိးဘၣ်ထွဲသးအတၢ်အိၣ်ဆူအိၣ်ချ့, တၢ်တဲသကိးယၥ်ခီယၥ်ခီ, ကညီကူၣ်သ့ဂ့ၢ်၀ီဒီးတၢ်လၢကြၢးသ့ၣ်ညါ ခ့ၣ်အဲၣ်ယူၣ်-တၢ်ပၢဆှၢရဲၣ်ကျဲၤတဖၣ် ပၣ်ဃုၥ်၀ဲန့ၣ်လီၤ.
တကးဘၣ် ပၣ်ဃုၥ်၀ဲစ့ၢ်ကီး ဒီး Spelling bees တၢ်ပြၢးတဖၣ်, တၢ်ကတိၤပြၢတၢ်တဖၣ်, တၢ်ပၥ်ဖျါထီၣ်တၢ်ဆဲးတၢ်လၤတၢ်ပြၢးတဖၣ်, တၢ်ခဲၣ်တၢ်ဂီၤတၢ်ပြၢတဖၣ်, တၢ်ထါဆ့ၤကၤတၢ်ပြၢးတဖၣ်န့ၣ်လီၤ.
