လါမးရှး(၁၉)သီ,၂၀၂၅နံၣ်
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်ကးအသုးနီၣ်ဂံၢ်(၁၂၂)ဒြိသုးလၢ အိၣ်ဆီလီၤအသးဖဲ နီၣ်ဂံၢ်(၉)ဂံၢ်ခီၣ်ထံးသုးတၢ်သိၣ်လိလီၢ် အလၣ်တယၣ် ကၠဲးထိၣ်ကီၢ်ဆၣ်ကွၢ်လံၣ်ယ့ၣ်ကၣ်ကိ ခမရ(၂၀၇)ဒီးနီၣ်ဂံၢ်(၃၁၀)ကျိဖးဒိၣ်သုးရ့ၣ်တဖၣ် ဟဲတ့ၢ်မ့ၣ်ပိၢ်လၢဒြိတဖၣ်အိၣ်ထီၣ်၀ဲအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲတၢ်ကစီၣ်န့ၣ်လီၤ.
၂၀၂၅နံၣ်, လါမးရှး(၁)သီအနံၤ, စးထီၣ်လၢ(၁၂)နၣ်ရံၣ်ဘျဲၣ်ဒီးတုၤ(၂)နၣ်ရံၣ်ဃၥ်ဃၥ်အဆၢကတီၢ်ပူၤ သုးကီၣ်ကးဒြိသုးလၢအိၣ်ဖဲကွၣ်လံၣ်ယ့ၣ်ကၣ်ကိ ဟဲတ့ၢ်လီၤဒြိမ့ၣ်ပိၢ်(၆)ဖျၢၣ်ဆူ ခ့ၣ်အဲၣ်ယူၣ်-ဒူသထူၣ်ကီၢ်ရ့ၣ်, ကၠဲးထိၣ်ကီၢ်ဆၣ်, ပၠ့ကတိကိသ၀ီကရူၢ်, ပၠ့ကတိကိတၢ်သွၣ်ခိၣ်ဒီး အ့ကၢၣ်(၁၀၀)စၢၤထးတၢ်လီၢ်တဖၣ်အဂ့ၢ် ပၥ်ဖျါဃၥ်၀ဲန့ၣ်လီၤ.
တကတီၢ်ဃီ သုးကီၣ်ကးသုးနီၣ်ဂံၢ်(၃၁၀)ကျိဖးဒိၣ်သုးစ့ၢ်ကီး ခးလီၤ၀ဲကျိဖးဒိၣ်အဖျၢၣ်(၁၀)၀ဲၤ နီၣ်ဂံၢ်(၄၄)ခီၣ်ချ့သုးတြိၤသုး၀ဲၤလီၢ်ခိၣ်သ့ၣ်အစုတီၤဖီလၥ် နီၣ်ဂံၢ်(၂၀၇)ခီၣ်ချ့သုးရ့ၣ်စ့ၢ်ကီး ခးလီၤ၀ဲကျိဖးဒိၣ်(၈)ဖျၢၣ်ဆူ ကၠဲးထိၣ်ကီၢ်ဆၣ်ဟီၣ်က၀ီၤအပူၤအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲန့ၣ်လီၤ.
ခီဖျိမ့ၣ်ပိၢ်လီၤတဲၥ်ပိၢ်ဖးထီၣ်အဃိ ပၠ့ကတိကိကရူၢ်, ပၠ့ကတိကိသ၀ီပူၤ ဘၣ်ဟးဂီၤကွံၥ်၀ဲ ဟံၣ်တဖျၢၣ်, တၢ်သွၣ်ခိၣ်အလီၢ်တဖၣ်ဒီးတၢ်မုၥ်တၢ်ဘိတဖၣ်၀ံၤ ကၠဲးထိၣ်ကီၢ်ဆၣ် ခယဲကရူၢ်, စ့းကွ့သ၀ီ, မိးခမီးသ၀ီ, သိခွးသ၀ီ မုၢ်နုၥ်တပၤစ့ၢ်ကီး ကမျၢၢ်သူၣ်ဖျးတၢ်မုၥ်တၢ်ဘိတဖၣ် ဘၣ်ဟးဂီၤကွံၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
၂၀၂၅နံၣ်, လါမးရှး(၄)သီနံၤတုၤ(၆)သီအနံၤ ခီဖျိသုးကီၣ်ကးအသုး မၤကလံၤကျါတၢ်ဒုးဒီးခးကျိဖးဒိၣ်တဖၣ်အဃိ လီၢ်က၀ီၤကမျၢၢ်တဖၣ် ဘၣ်အိၣ်၀ဲဒၣ်ဒီးတၢ်ပျံၤတၢ်ဖူး,တၢ်ဘၣ်ယိၣ်ဘၣ်ဘှီအပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိးဖဲအပူၤကွံၥ်လါဖ့ၤဘြူၤအါရံၤတလါအတီၢ်ပူၤ သုးကီၣ်ကးအသုး ဟဲခးလီၤတၢ်လၢကဘီယူၤ အိၣ်ထီၣ်၀ဲ(၅၆)ဘျီဆူအဖီခိၣ်အသိး ဟဲတ့ၢ်လီၤဒြိမ့ၣ်ပိၢ်(၂၈)ဘျီဒီး ခးလီၤကျိဖးဒိၣ်တဖၣ်စ့ၢ်ကီး အိၣ်ထီၣ်၀ဲကိးမုၢ်နံၤဃၥ်ဃၥ်န့ၣ်လီၤ.ဖဲန့ၣ်အကျါ ခီဖျိသုးကီၣ်ကးအသုး ခးလီၤကျိဖးဒိၣ်အဃိ လီၢ်က၀ီၤကမျၢၢ်ဘၣ်သံ၀ဲ(၆)ဂၤ, ဘၣ်ဒိ၀ဲ(၃၂)ဂၤဒီး ဘၣ်ဟးဂီၤကွံၥ်ဟံၣ်(၉၀)ဖျၢၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
