လါမးရှး(၁၈)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ဖၣ်အၣ်, သုးက့(၇)သုး၀ဲၤလီၢ်ခိၣ်သ့ၣ် ဘၣ်တၢ်ဒုးကဒီးအီၤဒီးဒြိ ဖဲလါမးရှး(၁၈)သီအနံၤ, ဂီၤအဆၢကတီၢ်၀ံၤ တၢ်သူၣ်ထီၣ်တနီၤဟးဂီၤကွံၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ဟဲဒုးတၢ်လၢဒြိသၢခိၣ်အဃိ ခ့ၣ်အဲၣ်ယူၣ်ပၢတၢ်သူၣ်ထီၣ်တနီၤ အခိၣ်ဒုးတဖၣ်ဘၣ်ဒိ၀ဲ၀ံၤ မ့မ့ၢ်လၢပှၤကညီတၢ်ဘၣ်ဒိဘၣ်ထံးတခီ တအိၣ်ဘၣ်အဂ့ၢ် ကီၢ်ရ့ၣ်ဖၣ်အၣ် ပဒိၣ်စီၤအီၣ်မီၣ်အ့ တဲဃၥ်၀ဲဆူ KICတၢ်ကစီၣ်သန့အအိၣ်န့ၣ်လီၤ.
“အဘၣ်ဒိဒၣ် ဟံၣ်ခိၣ်ဒုးလၣ်၀ါတဆံးတက့ၢ်လီၤ. ပှၤကညီတခီ တၢ်ဘၣ်ဒိဘၣ်ထံးတအိၣ်ဘၣ်. ဒြိသၢခိၣ်စလၢၥ် ဟဲကျဲအကျိၤဒ်သိးသိးလီၤ. မ့ၢ်လၢတၢ်ဒုးတၢ်ယၤကဲထီၣ်သးအဆၢကတီၢ်အဃိ ပလဲၤဒုးဒူၣ်ဒါအသိး ဒူၣ်ဒါတပၤစ့ၢ်ကီး ဟဲဒုးပှၤလီၤ. ပသုးမုၢ်ဒိၣ်တခီ တၢ်မၤလၢအအိၣ်တဖၣ် ကဆဲးမၤ၀ဲလီၤအဂ့ၢ်” ပဒိၣ်စီၤအီၣ်မီၣ်အ့ စံး၀ဲန့ၣ်လီၤ.
လၢ ဂီၤ(၃)နၣ်ရံၣ်ဘျဲၣ်အဆၢကတီၢ် ဒြိသၢခိၣ်အံၤ အိၣ်ဟးထီၣ်၀ဲဒၣ်ဖဲ ဖၣ်အၣ်ကီၢ်ရ့ၣ်, လူပျဲၢ်ကီၢ်ဆၣ်, ရှါယွၣ်သ့း၀့ၢ်တပၤအဂ့ၢ် အ၀ဲတယၥ်၀ဲန့ၣ်လီၤ.
သုးက့(၇)အစုတီၤဖီလၥ်သုးတဖၣ် မၤ၀ဲတၢ်ထီၣ်ဒုးသုးကီၣ်ကးအသုးဒုးယၤရဲၣ်ကျဲၤတဖၣ်အဃိ သုးကီၣ်ကးတပၤစ့ၢ်ကီး မၤ၀ဲတၢ်ခီၣ်ဆၢဒုးတၢ်တဖၣ်အဂ့ၢ် KNUပတီၢ်ထီလီၢ်လၤအိၣ်လၢတအဲၣ်ပၥ်ဖျါအမံၤတဂၤ စံး၀ဲဆူ Myanmar Nowအအိၣ်အဂ့ၢ် Myanmar Nowတၢ်ကစီၣ်ပၥ်ဖျါဃၥ်၀ဲန့ၣ်လီၤ.
ဖဲအပူၤကွံၥ် လါမးရှး(၁၄)သီအနံၤန့ၣ် KNLAတီခိၣ်ရိၣ်မဲတၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုး၀ဲ သုးကီၣ်ကးပူးလူးတူၢ်သုးကလၢၤလၢအိၣ်ဖဲ ကညီကီၢ်စဲၣ်, ဖၣ်အၣ်ကီၢ်ရ့ၣ်, ကြူၢ်တု၀့ၢ်အဃၢၤတဖျၢၣ်န့ၣ်လီၤ.
တၢ်ဒုးအပူၤ သုးကီၣ်ကးတပၤ သံ၀ဲ(၁၂)ဂၤဒီး (၁၁)ဂၤလဲၤဃ့ၢ်ပူၤဖျဲးသးဆူ ကၠီၣ်တဲၣ်တပၤအသိး KNLAတပၤစ့ၢ်ကီဒီး ဘၣ်ဒိ၀ဲ(၆)ဂၤ၀ံၤ သံ၀ဲ(၃)ဂၤအဂ့ၢ် ဖၣ်အၣ်ကီၢ်ရ့ၣ်တၢ်ကစီၣ်ပၥ်ဖျါဃၥ်၀ဲန့ၣ်လီၤ.
သုးက့(၇)ဟီၣ်က၀ီၤအပူၤ ပူးလူးတူၢ်သုးကလၢၤလီၤ၀ံၤအလီၢ်ခံ သုးကီၣ်ကးတပၤ မၤအါထီၣ်၀ဲဒြိတၢ်ဒုးတဖၣ်န့ၣ်လီၤ.ဒ်န့ၣ်အသိး သုးက့(၇)ဟီၣ်က၀ီၤန့ၣ် အိၣ်ဘူးလိၥ်သးဒီး သုးကီၣ်ကးအသုးရ့ၣ်တဖၣ် အိၣ်သူၣ်လီၤ ၀့ၢ်ဖၣ်အၣ်န့ၣ်လီၤ.
တၢ်ဟဲဒုးတၢ်လၢဒြိဘျီ၀ဲအံၤန့ၣ် သုးကီၣ်ကးအသုး ဟဲဒုးတၢ်ဒီးဒြိလၢ သုးက့(၇)ဟီၣ်က၀ီၤအပူၤ အိၣ်ထီၣ်၀ဲသၢ၀ီတ၀ီလံဒီး တနံၣ်အံၤ လါယနူၤအါရံၤ(၃၁)သီအနံၤန့ၣ် တဘျီ, ၂၀၂၄နံၣ်လါအီးကထိဘၢၣ်(၂၂)သီအနံၤန့ၣ် တဘျီ ဟဲဒုး၀ဲလၢဒြိန့ၣ်လီၤ.
အပူၤကွံၥ်နံၣ် လါအီးကထိဘၢၣ်(၂၂)သီအနံၤ, ဂီၤ(၁၁)နၣ်ရံၣ်ဃၣ်ဃၣ်အဆၢကတီၢ်စ့ၢ်ကီး သုးကီၣ်ကးအသုး ဟဲဒုး၀ဲဒီးဒြိလၢ KNUခိၣ်နၢ်ဒိၣ်ထီတဖၣ် ဟဲထီၣ်၀ဲတၢ်အိၣ်ဖှိၣ်အလီၢ် KNUလီၢ်ခၢၣ်သး၀ဲၤလီၢ်ခိၣ်သ့ၣ်တၢ်လီၢ်န့ၣ်လီၤ.
Ref: Myanmar Now
