အီၣ်စ့ၣ်ယးသုးကျိၤ ကတိဖျိ ၀့ၫ်ရၤမတံအဂီၫ် ဟဲထီၣ်ဒုးဃီၤတၫ်လၢကျဲအကလုာ်ကလုာ်

လါမးရှး(၁၉)သီ,၂၀၂၅နံၣ်

လၢကညီကီၫ်စဲၣ်,ကီးတရံး-ရၤမတံ(အ့ရှၢၣ်)ကျဲ သုးကီၣ်ကးအအီၣ်စ့ၣ်ယးသုးကျိၤ တိဖျိ၀့ၫ်ရၤမတံကန့ၫ်အဂီၫ် ဟဲထီၣ်ဒုးဃီၤတၫ်လၢကျဲအကလုာ်ကလုာ်အဃိ တၫ်ဒုးကဲထီၣ်၀ဲဒၣ်ဒီးKNLAသုးပာ်ဖှိၣ်တဖၣ်န့ၣ်လီၤ.

တၫ်ကထီၣ်ပၢဆှၢကဒါက့ၤ အ့ရှၢၣ်ကျဲဒီး၀့ၫ်ရၤမတံအဂီၫ် စးထီၣ်ဖဲလါစဲးပထ့ဘၢၣ်(၂)နွံတနွံအပူၤန့ၣ် သုးကီၣ်ကးအအီၣ်စ့ၣ်ယးသုးကျိၤလၢ ဟဲထီၣ်ကဒါက့ၤဒီးကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA)သုးပာ်ဖှိၣ်အဘၢၣ်စၢၤ တၫ်ဒုးဆူၣ်ထီၣ်၀ဲလီၤ.

လါမးရှးအပူၤ သုးကီၣ်ကးအအီၣ်စ့ၣ်ယးသုးကျိၤန့ၣ် ဟဲထီၣ်တိဖျိ၀့ၫ်ရၤမတံကန့ၫ်အဂီၫ် သူ၀ဲကျဲအကလုာ်ကလုာ်ဒီး ဟဲထီၣ်၀ဲဆူ အ့ရှၢၣ်ကျဲဒီးယၣ်ကိး(ကျဲလီၫ်လံၤ)တကပၤ၀ံၤ ကျဲးစၢထီၣ်ဒုးဃီၤတၫ်အဃိ တၫ်ဒုးဆူၣ်၀ဲဒီး(KNLA)သုးပာ်ဖှိၣ်တဖၣ်လီၤ.တၫ်ဒုးအပူၤခံကပၤ တၫ်ဘၣ်ဒိဘၣ်ထံးအိၣ်၀ဲလီၤ.

တၫ်မဲာ်ညါဂ့ၫ်ခီၣ်ထံးတၫ်ကစီၣ်တဲ၀ဲလၢ”တၫ်ဒုးကဲထီၣ်တပယူာ်ဃီလီၤ.သုးကီၣ်ကးမၤပှဲၤဂံၫ်ဘါလီၤ.ဟဲထီၣ်ဆူတၫ်မဲာ်ညါ,ခးတၫ်လၢဒြိတဖၣ်၀ံၤအလီၫ်ခံဘၣ်ဒိဆါဒီးက့ၤလီၤကဒါက့ၤလီၤ.တၫ်အံၤကဲထီၣ်အသးကိးမုၫ်ဒဲးဃၣ်ဃၣ်လီၤ.ဖဲအပူၤကွံာ်စှၤသီန့ၣ် အ၀ဲသ့ၣ်ဟဲထီၣ်လၢဂံၫ်ဘါအါဒီးပသုးပာ်ဖှိၣ်တကပၤ ဘၣ်လီၤကွံာ်(၂)ဂၤ,(၃)ဂၤအိၣ်၀ဲလီၤ.လၢအ့ရှၢၣ် ကျဲဒီတဘိ ဖဲတၫ်ဟံးန့ၫ်ဃာ်တၫ်လီၫ်ကိးတီၤဒဲးအပူၤ ကိးမုၫ်နံၤတၫ်ဘၣ်သဂၢၫ်ခးလိာ်သးကဲထီၣ်၀ဲအဂ့ၫ်”န့ၣ်လီၤ.

စးထီၣ်ဖဲလါမးရှး(၂)နွံတနွံအပူၤန့ၣ် သုးကီၣ်ကးအသုးကျိၤတဖၣ် ခးလီၤကျိဖးဒိၣ်ဆူ ပၠါပ့ၣ်,ခန့မူၣ်,တတါကူ,ဆ့ၣ်ကိ, ကီးနွဲးသ၀ီတဖၣ်အပူၤ,ကွၫ်စုာ်တၫ်လၢဒြိတဖၣ်ဒီးတ့ၫ်လီၤမ့ၣ်ပိၫ်လၢဒြိတဖၣ်၀ံၤအလီၫ်ခံ ကျဲစၢးနုာ်လီၤ၀ဲဆူ ခန့မူၣ်ဒီး ပၠါပ့ၣ်သ၀ီတဖၣ်အပူၤအဃိ တၫ်ဒုးကဲထီၣ်၀ဲဒီး(KNLA)သုးပာ်ဖှိၣ်တဖၣ်လီၤ.

လၢကတီၫ်အံၤ ၀့ၫ်ကီးတရံးပာ်ဃုာ် သ၀ီကပိာ်ကပၤ ကမျၢၫ်လၢအကလီၫ်တဖၣ် ဘၣ်လဲၤဃ့ၫ်အိၣ်ကဒုဆူ ဖၣ်အၣ်, မီၣ်လမၠဲၣ်,သၣ်မညးဒီးလၢအဘူးတံၫ်အိၣ်တဖၣ်အဃိ ကွၫ်ဆၢၣ်မဲာ်ဘၣ်တၫ်ကီတၫ်ခဲအဂ့ၫ် ပှၤမၤစၢၤပှၤလီၫ်အိၣ်ကမှံ ဖိတဖၣ်တဲ၀ဲလီၤ.

ပှၤမၤစၢၤပှၤလီၫ်အိၣ်ကမှံဖိတဂၤတဲ၀ဲလၢ”လီၫ်က၀ီၤကမျၢၫ်တၫ်အိၣ်သးန့ၣ် လၢကတီၫ်အံၤကီခဲ၀ဲလီၤ.မၤတၫ်တသ့နီ တမံၤဘၣ်,တၫ်အိၣ်ဆိးအီၣ်အီအဂီၫ်ကီခဲ၀ဲလီၤ.ဖိသၣ်တၫ်ကူၣ်ဘၣ်ကူၣ်သ့,တၫ်အိၣ်ဆူၣ်အိၣ်ချ့ကီခဲထီၣ်လီၤ.စ့ဟဲနုာ်ခွဲးယာ်တဖၣ်,တၫ်ဖံးတၫ်မၤတဖၣ်ကၤထီၣ်၀ဲလီၤ.ဘၣ်တဲလၢ ယံာ်ထီၣ်န့ၣ် ကီထီၣ်လၢထံဖိကီၫ်ဖိကမျၢၫ်အဂီၫ်လီၤ.”

ဖဲလါဖ့ၤဘြူၤအါရံၤအကတၢၫ်ဆနွံအပူၤန့ၣ် KNLAသုးပာ်ဖှိၣ်ဒီးသုးကီၣ်ကးအအီၫ်စ့ၣ်ယးသုးအဘၢၣ်စၢၤ တၫ်ဒုးဆူၣ်ထီၣ်၀ံၤအလီၫ်ခံ ကီးနွဲၣ်သ၀ီလၢဟံၣ်ခိၣ်အိၣ်(၈၀)ဖျၢၣ်အံၤ သုးကီၣ်ကအသုးဒွဲၣ်အူထီၣ်ကွံာ်၀ဲ (၄)၀ီတ၀ီန့ၣ်လီၤ.

ဒ်န့ၣ်အသိး ဖဲလါမး(၂)သီနံၤ,ဟါ(၁၀)နၣ်ရံၣ်ဃၣ်ဃၣ်အဆၢကတီၫ် သုးကီၫ်ကးအသုးခးလီၤ မံးစဲကျိဖးဒိၣ်(၂)ဖျၢၣ် ဆူနါရွှ့ၣ်မိၣ်သ၀ီပူၤဒီးပိၫ်ဖးထီၣ်၀ဲ(၁)ဖျၢၣ်၀ံၤလအိၣ်တ့ၫ်(၁)ဖျၢၣ်န့ၣ် တပိၫ်ဖးထီၣ်၀ဲဘၣ်.လီၫ်က၀ီၤကမျၢၫ်တဖၣ် ဃ့ၫ်ပူၤဖျဲးကွံာ်သးအဃိ သုးကီၣ်ကးအတၫ်ခးလီၤကျိဖးဒိၣ်အပူၤ တၫ်ဘၣ်ဒိဘၣ်ထံးတအိၣ်၀ဲဘၣ်.

Ref:DVB