တၢ်ဒုးဆူၣ်လၢ တတၣ်ကူဒီး ရၤမတံကျဲလီၢ်လံ မံးခၠီအ့တပၤ သုးကီၣ်ကးဒွဲၣ်အူကွံၥ် ကမျၢၢ်ဟံၣ်တဖၣ်

လါမးရှး(၁၇)သီ,၂၀၂၅နံၣ်

သုးကီၣ်ကးအသုးဒီးတၢ်ပၢၢ်ဆၢသုးပၥ်ဖှိၣ်အဘၢၣ်စၢၤ တၢ်ဒုးဆူၣ်လၢ ကညီကီၢ်စဲၣ်, ကီးတရံးကီၢ်ဆၣ်, တတၣ်ကူတပၤအဂ့ၢ် တၢ်သ့ၣ်ညါဘၣ်လၢ ဂံၢ်ခီၣ်ထံးသုးဂ့ၢ်၀ီတၢ်ကစီၣ်အအိၣ်န့ၣ်လီၤ.

တၢ်ဒုးအံၤအပူၤ သုးကီၣ်ကးတပၤ သံဒီးဘၣ်ဒိအိၣ်ထီၣ်၀ဲအါအဂ့ၢ် ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.

“ကဘီယူၤတဟဲဘၣ်. မဟါအနံၤန့ၣ် သုးကီၣ်ကးတပၤ သူအါထီၣ်ဒြိတဖၣ်အဂ့ၢ်”န့ၣ် ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.

လါမးရှး(၁၄)သီအနံၤန့ၣ် တၢ်ဒုးဆူၣ်၀ဲဒီတနံၤ၀ံၤအလီၢ်ခံ တၢ်ပၢၢ်ဆၢသုးတပၤ မၤန့ၢ်၀ဲသုးကီၣ်ကးကျိတခိၣ်အဂ့ၢ် စံး၀ဲန့ၣ်လီၤ.

ဒ်န့ၣ်အသိး သုးကီၣ်ကးအသုး ဟဲတ့ၢ်လီၤမ့ၣ်အူမ့ၣ်ပိၢ်တဖၣ်ဆူ ကီးတရံးကလံၤစိး, ရၤမတံကျဲမုၢ်လီၤလံၢ် မံးခၠီအ့သ၀ီ ကမျၢၢ်အိၣ်ဟံၣ်တဖၣ်ဒီး ဒွဲၣ်အူကမျၢၢ်ဟံၣ်ဃီတဖၣ်အဂ့ၢ် ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.

ဖဲမဟါအနံၤစ့ၢ်ကီး သုးကီၣ်ကးအသုး သူ၀ဲမ့ၣ်အူမ့ၣ်ပိၢ်တဖၣ်၀ံၤ ဒွဲၣ်အူကွံၥ်ကမျၢၢ်ဟံၣ်ဃီတဖၣ်လၢအိၣ်ဖဲ ယးကိး, မံးခၠီအ့တပၤန့ၣ်လီၤ.

သုးကီၣ်ကးအသုးကလၢၤလၢအိၣ်ဖဲ ကီးတရံးကီၢ်ဆၣ်ဒီးအ့ရှကျဲမုၢ်အဖီခိၣ်တဖၣ် ကထုးကွံၥ်အသးအဂီၢ်  KNLAပၣ်ဃုၣ် သိၣ်မှံသုးပၥ်ဖှိၣ်တဖၣ် ဟ့ၣ်လီၤတၢ်ကလုၢ်အိၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.

သုးကီၣ်ကးသုးကလၢၤတနီၤစ့ၢ်ကီး ကထုးကွံၥ်အသးအဂီၢ် တၢ်ကဟ့ၣ်ဘၣ်တၢ်ဆၢကတီၢ်အဂီၢ် တဲဃၥ်၀ဲတၢ်ပၢၢ်ဆၢသိၣ်မှံသုးပၥ်ဖှိၣ်တဖၣ်အအိၣ်၀ံၤ ကထုးကွံၥ်သးလၢသုးကလၢၤအဂီၢ် ကဘၣ်တီၣ်ထီၣ်တၢ်ဂ့ၢ်ဆူ တၢ်ဖီခိၣ်ပှၤဘၣ်မူဘၣ်ဒါတဖၣ်အအိၣ်အဂ့ၢ်ဒီး မ့ၢ်လီၤဆီတမံၤမံၤန့ၣ် ကဒုးသ့ၣ်ညါက့ၤ၀ဲအဂ့ၢ် တဲဃၥ်၀ဲဆူ တၢ်ပၢၢ်ဆၢသိၣ်မှံသုးပၥ်ဖှိၣ်အအိၣ်အဂ့ၢ် တၢ်သ့ၣ်ညါဘၣ်န့ၣ်လီၤ.

Ref: Salween Press