လါမးရှး(၁၇)သီ,၂၀၂၅နံၣ်
မါတလ့ကီၫ်ခီ,ကညီကီၫ်စဲၣ်,တလၢၤကီၫ်စဲၣ်ဒီးအ့ၣ်ယၣ်၀တံၣ်ကီၫ်ခီတဖၣ်အပူၤ ဖဲလါမးရှး(၁၃)သီဒီး(၁၄)သီအနံၤ ခံသီအတီၫ်ပူၤ ဖီၣ်န့ၫ်ပနံာ်တဖိးသဲစးလၢ အလုၫ်အပှ့ၤအိၣ် ကၠးအကလီၫ်ခံကလးဃၣ်ဃၣ်အဂ့ၫ် သုးကီၣ်ကးအတၫ်ကစီၣ်သန့တဖၣ် ဘိးဘၣ်ရၤလီၤ၀ဲလီၤ.
အပူၤကွံာ် လါမးရှး(၁၃)သီနံၤ လၢကညီကီၫ်စဲၣ်,ဖၣ်အၣ်စဲးဖီကဟၣ်တၫ်မၤလီၫ်အကပၤ သိလ့ၣ်(၁၈)ခိၣ်အဖီခိၣ် ပနံာ်လၢလံာ်တၫ်အုၣ်ကီၤတအိၣ် အကလုာ်ခဲလၢာ်ပာ်ဖှိၣ်(၆၀)ဘျဲၣ် ဖီၣ်န့ၫ်၀ဲအဂ့ၫ် တဲ၀ဲလီၤ.
တကးဘၣ် တလၢၤကီၫ်စဲၣ်,အ့ၣ်ယၣ်၀တံၣ်ကီၫ်ခီဒီးမါတလ့ကီၫ်ခီတဖၣ်အပူၤ လၢတၫ်သမံသမိးတြဲၤတဖၣ်စ့ၫ်ကီး လၢၫ်လါ,သ့ၣ်,ပနံၣ်လၢပှၤသူဒီးအီၣ်၀ဲတဖၣ် ဒုးနဲၣ်၀ဲတၫ်အုၣ်ကီၤတန့ၫ်ဘၣ်အဃိ ဖီၣ်န့ၫ်၀ဲအဂ့ၫ် သုးကီၣ်ကးတၫ်ဘိး ဘၣ်ရၤလီၤအပူၤ ပာ်ဖျါ၀ဲလီၤ.
သုးကီၣ်ကးတကပၤ တၫ်သမံသမိးတြဲၤတဖၣ်န့ၣ် သမံသမိး၀ဲဃံးထီၣ်၀ံၤ ပနံာ်လၢတၫ်ဟဲက့ၤပှ့ၤတဖၣ် တၫ်ဒုးနဲၣ် လံာ်တၫ်အုၣ်ကီၤမ့ၫ်တန့ၫ်ဘၣ်န့ၣ် ဖီၣ်၀ဲအဂ့ၫ် ပှၤနီသိလ့ၣ်လၢတီၣ်ထီၣ်တီၣ်လီၤပနံာ်ဖဲ မါတလ့ဆူ တီၣ်ကၠံတဂၤတဲ၀ဲလီၤ.
“သမံသမိးတၫ်အၢဒိၣ်မးလီၤ.တၫ်ဒုးနဲၣ်လီၤလံာ်တၫ်အုၣ်ကီၤမ့ၫ်တန့ၫ်ဘၣ်န့ၣ် ဟံးန့ၫ်ကွံာ်တၫ်ဖိတၫ်လံၤတဖၣ်လီၤ. ဖီၣ်ဃုာ်သိလ့ၣ်လၢဟဲက့ၤတီၣ်တၫ်လီၤ.သိလ့ၣ်ဘၣ်အိၣ်ခိးတၫ်ယံာ်န့ၣ် မ့ၫ်လၢတၫ်ဂ့ၫ်အံၤလီၤ. သမံသမိး၀ဲလီၤတံၫ်လီၤ ဆဲးအဂ့ၫ်”တဲ၀ဲလီၤ.
သုးကီၣ်ကးန့ၣ် တၫ်ဒုးလီၤပှီၫ်ကွံာ် ပနံာ်လၢအဖိးသဲစးတဖၣ်အဂီၫ် လၢတနံၣ်အံၤအပူၤ မၤဆူၣ်ထီၣ်၀ဲ၀ံၤ ပှၤလၢဟ့ၣ် တၫ်ကစီၣ်တဖၣ်ဒၣ်လဲၣ် ပနံာ်လၢဖီၣ်န့ၫ်၀ဲ အလုၫ်အပှ့ၤ ၂၀မျးကယၤန့ၣ် ဟ့ၣ်၀ဲဒ်တၫ်ဟ့ၣ်ကနၢၤအသိးအဂ့ၫ် ဘိးဘၣ်ရၤလီၤ၀ဲလၢတၫ်ကစီၣ်ပူၤတလီၫ်လီၫ်လီၤ.
အပူၤကွံာ် လါဖ့ၤဘြူၤအါရံၤအပူၤစ့ၫ်ကီး လၢထံကီၫ်ဒီတဘ့ၣ်အပူၤ တၫ်တီၣ်ဆှၢ၀ဲပနံာ်လၢတဖိးသဲစး တၫ်မူးတၫ်ရၤ (၉၆)ခါ လိၣ်ဘၢလိၣ်ကွီၫ်၀ဲန့ၫ်၀ံၤ ပနံာ်အလုၫ်အပှ့ၤ ကၠး ၅၄၉၃.၂၂၄ကကွဲၫ် ဖီၣ်န့ၫ်၀ဲအဂ့ၫ် သုးကီၣ်ကးဘိးဘၣ်ရၤလီၤ ၀ဲလီၤ.
Ref: RFA
