လါမးရှး(၁၇)သီ,၂၀၂၅နံၣ်
VOAဒီးRFAပာ်ဃုာ် အမဲရကၤပဒိၣ်အစုတီၤဖီလာ် တၫ်ကစီၣ်၀ဲၤကျိၤတနီၤ အတၫ်ဖံးတၫ်မၤတဖၣ် ကမၤလီၤစှၤ၀ဲ အဂီၫ် ထရၢးအတၫ်နဲၣ်လီၤအဃိ လၢတၫ်ထုးထီၣ်ဘိးဘၣ်ရၤလီၤတၫ်ကစီၣ်အပူၤ တၫ်ကီတၫ်ခဲအိၣ်ထီၣ်၀ဲအဂ့ၫ် တၫ်သ့ၣ်ညါဘၣ်လီၤ.
အမဲရကၤ ကီၫ်ခိၣ်ထရၢးန့ၣ် အမဲရကၤ ဟီၣ်ခိၣ်ဒီဖျၢၣ်မံၣ်ဒံၣ်ယၣ်၀ဲၤကျိၤ(USAGM)ပာ်ဃုာ် အ့ၣ်ကၠ့ၣ်စံၣ်(၇)ခါ ကမၤလီၤစှၤဘၣ်တၫ်ဖံးတၫ်မၤတဖၣ်အဂီၫ် ဆဲးလီၤမံၤစဲပနီၣ်နဲၣ်လီၤ၀ဲအဃိ စးထီၣ်ဖဲလါမးရှး(၁၆)သီအနံၤန့ၣ် VOAဒီးRFAအတၫ်ဘိးဘၣ်ရၤလီၤLiveတနီၤ ပတုာ်ကွံာ်၀ဲအိၣ်န့ၣ်လီၤ.
အမဲရကၤကီၫ်ခိၣ်ထရၢးန့ၣ် အပူၤကွံာ် လါမးရှး(၁၄)သီအနံၤန့ၣ် နဲၣ်လီၤ၀ဲဒ်သိးအံၤ၀ံၤ ပဒိၣ်တၫ်ဖံးတၫ်မၤလၢ တလိၣ် တဖၣ် ကမၤစှၤလီၤ၀ဲအဂီၫ်ဒီးမ့ၫ်သ့န့ၣ် လၢတၫ်ဘျၢအဖီခိၣ် တၫ်ဖံးတၫ်မၤတဖၣ်အပူၤ တၫ်ကမၤစှၤလီၤဘၣ် ပှၤမၤတၫ် ဖိတဖၣ်အဂီၫ် နဲၣ်လီၤ၀ဲလီၤ.
အမဲရကၤကီၫ်ခိၣ်ထရၢးအတၫ်ကလုၫ်အသီအံၤ VOA,RFAပာ်ဃုာ် လၢပဒိၣ်အ့ၣ်ကၠ့ၣ်စံၣ်၀ဲၤကျိၤတနီၤအဖီခိၣ် တၫ်ဘၣ်ဒိဘၣ်ထံးအိၣ်၀ဲအဂ့ၫ် ပှၤဃုသ့ၣ်ညါတၫ်တဖၣ်တဲ၀ဲလီၤ.
စးထီၣ်ဖဲလါမးရှး(၁၆)သီအနံၤန့ၣ် တၫ်ကစီၣ်၀ဲၤကျိၤတနီၤ အအဲၣ်ဒံၣ်ထၢၣ်ဒီးပှၤဟံးန့ၫ်တၫ်ကစီၣ်ဖိတဖၣ် တလိၣ် ဟဲဆူတၫ်မၤလၢၤဘၣ်န့ၣ် ၀ဲၤကျိၤလၢဘၣ်ထွဲတဖၣ် ဟ့ၣ်ဒုးသ့ၣ်ညါ၀ဲလၢ E-mailအိၣ်အဂ့ၫ် တၫ်သ့ၣ်ညါဘၣ်လီၤ.
VOAပာ်ဃုာ် USAGM လၢပၢဆှၢရဲၣ်ကျဲၤ တၫ်ကစီၣ်တၫ်ဖံးတၫ်မၤခဲလၢာ်ပာ်ဖှိၣ်(၆)ခါအံၤ လၢဟီၣ်ခိၣ်ချၢ ထုးထီၣ်ဘိး ဘၣ်ရၤလီၤ၀ဲ ခီဖျိလၢတၫ်ကတိၤကျိာ်ခဲလၢာ်(၆၄)ကလုာ်န့ၣ်လီၤ.
USAGMလၢတီခိၣ်ရိၣ်မဲVOAဒီးRFAအံၤ ကမၤလီၤစှၤဘၣ်အတၫ်ဖံးတၫ်မၤတကးဘၣ် ဒီးတၫ်ကမၤစှၤလီၤတၫ်ဖံးတၫ် မၤဒီးပှၤမၤတၫ်ဖိတဖၣ်အဂီၫ် ကီၫ်ခိၣ်ထရၢးထုးထီၣ်တၫ်ကလုၫ်၀ံၤအလီၫ်ခံ ၀ဲၤကျိၤအဂၤတဖၣ်လၢအမ့ၫ် တၫ်မၤကစၫ် ဒီးပှၤမၤတၫ်ဖိ တၫ်ဂ့ၫ်လိာ်ဘှီလိာ်၀ဲၤကျိၤ လၢဘှါရှဲန့ၫ်တၫ်လၢအမ့ၫ် Federal Mediation and Conciliation Service, ပှၤဟံၣ်ဃီတအိၣ်အဂီၫ်၀ဲၤကျိၤ US Interagency Council on Homelessness,တၫ်ကွၫ်ကီလီၫ်ဒီးလံာ်ရိဒၢး ၀ဲၤကျိၤ တဖၣ်,ပှၤကူၣ်သ့ဒီးတၫ်ဃုထံၣ်သ့ၣ်ညါ၀ဲၤကျိၤဒီး Woodrow Wilson International Center ကီၫ်စၢဖှိၣ်ပဒိၣ်၀ဲၤကျိၤ တဖၣ် ပာ်ဃုာ်၀ဲအဂ့ၫ် တၫ်သ့ၣ်ညါဘၣ်လီၤ.
