လါမးရှး(၁၄)သီ,၂၀၂၄နံၣ်
ခ့ၣ်အဲၣ်ယူၣ်ကညီဒီကလုာ်စၢဖှိၣ်ကရၢ,သုးက့နီၫ်ဂံၫ်(၃)ဟီၣ်က၀ီၤ,ကီၢ်ရ့ၣ်ချၢၣ်လွံၢ်ထူၣ် မူကီၫ်ဆၣ်ဒီးလၢၫ်ဒိၣ်ကီၫ်ဆၣ်တဖၣ်အပူၤ ဒူသ၀ီတဖၣ်န့ၣ် သုးကီၣ်ကးဒုး၀ဲလၢဟီၣ်ခိၣ်လိၤဒီးကလံၤကျါတဖၣ်အဃိ လီၫ်က၀ီၤကမျၢၫ် ၁ကလးဂၤဘျဲၣ် ဘၣ်ဃ့ၫ်ပူၤဖျဲးသးအဂ့ၫ် ပှၤလၢမၤစၢၤပှၤလီၫ်အိၣ်ကမှံဖိတဖၣ်တဲ၀ဲလီၤ.
မူကီၫ်ဆၣ်ဒီးလၢၫ်ဒိၣ်ကီၫ်ဆၣ်ပူၤ ဒူသ၀ီတဖၣ် သုးကီၣ်ကးအသုးရ့ၣ် ခမရ-၅၉၉ လၢအိၣ်ဆီလီၤအသးဖဲအိတီ ဟီၣ် က၀ီၤဒီး ခမရ-၅၉၀ လၢအိၣ်ဆီလီၤအသးဖဲ ၀့ၫ်မူတဖၣ် ခးစိဃီၤ၀ဲလၢကျိဖးဒိၣ် တကးဘၣ်,တ့ၫ်လီၤမ့ၣ်ပိၫ်ဒီးဒြိတဖၣ်န့ၣ်လီၤ.
တကးဘၣ် သုးကီၣ်ကးအသုးဖိလၢအိၣ်ဆီလီၤအသးဖဲ မုၫ်ဃါပျီ,ယ့ၣ်ကွ့ကိဒီးအိပ့ၣ်စူးတဖၣ်စ့ၫ်ကီး ခးစိဃီၤတၫ်လၢ ကျိဖးဒိၣ်ကိးမုၫ်နံၤဃၣ်ဃၣ်လီၤ.ဖဲလါမးရှး(၉)သီနံၤ သုးကီၣ်ကးခးလီၤကျိဖးဒိၣ်အဃိ ယ့တဲးကိသ၀ီ မိၫ်ဒၢ လၢလဲၤစံၣ်သုးဖဲငထွ့ၣ်စိး၀ီ ဘၣ်သံ ဖဲအလီၫ်တဘျီဃီ၀ံၤ အ၀ၤန့ၣ်ဘၣ်ဒိ၀ဲအစုန့ၣ်လီၤ.
ပှၤမၤစၢၤ ပှၤလီၫ်အိၣ်ကမှံဖိတဂၤတဲ၀ဲလၢ”ဘၣ်လဲၤသုးသးလၢကစၢၫ်ခိၣ်, ကစၢၫ်ခီၣ်ထံးအဆၢအကပၤလီၤ. ပှၤစံၣ် သုးအနီၫ်ဂံၫ်ကအိၣ်(၁၀,၀၀၀)ဂၤဘျဲၣ်လီၤ.လၢအံၤတကပၤ ပှၤစံၣ်သုးတဖၣ် ဘၣ်အိၣ်လၢတၫ်ပျံၤတၫ်ဖုးအပူၤလီၤ. ဘၣ်မနုၤအဃိ လဲၣ်န့ၣ် ကျိဖးဒိၣ်တဖၣ် တၫ်ခးလီၤ၀ဲတီတီဆူဒူသ၀ီတဖၣ်အပူၤအဃိ ပှၤလၢဘၣ်အတက့ၫ်န့ၣ် မ့ၫ်ပှၤလီၫ်အိၣ်ကမှံဖိ တဖၣ်အဂ့ၫ်”တဲ၀ဲလီၤ.
သုးကီၣ်ကးန့ၣ် လၢဟီၣ်ခိၣ်လိၤဒီးကလံၤကျါ တ့ၫ်လီၤမ့ၣ်ပိၫ်ဒုးတၫ်အဃိ မူကီၫ်ဆၣ်ပူၤ,အိတီ,ငဖဲၣ်ဆိး,ကၠိတီ, ပီလီဆဲၣ်,တးကိ,ယွၣ်ဟီသ၀ီ(၁၀)ဖျၢၣ်ဒီးလၢၫ်ဒိၣ်ကီၫ်ဆၣ်ပူၤ မုၫ်ဃါပျီကရူၫ်,အိရှံးကိ,ယ့ၣ်တွကိ ဒူသ၀ီကမျၢၣ် (၁)ကလးဂၤဘျဲၣ် ဘၣ်ဃ့ၫ်ပူၤဖျဲးသးန့ၣ်လီၤ.
သုးကီၣ်ကးန့ၣ် ဟဲဒုးတၫ်လၢဟီၣ်ခိၣ်လိၤတန့ၫ်ဘၣ်အဃိ ကိးမုၫ်နံၤဃၣ်ဃၣ် ခးစိဃီၤတၫ်လၢကျိဖးဒိၣ်တဖၣ်အဂ့ၫ် လီၫ်က၀ီၤဖိတဖၣ်တဲ၀ဲလီၤ.
လီၫ်က၀ီၤကမျၢၫ်တဂၤတဲ၀ဲလၢ”ခးလီၤကျိဖးဒိၣ်ကိးမုၫ်နံၤလီၤ.ခးလီၤ၀ဲတၫ်လီၫ်တတီၤဂ့ၤတတီၤဂ့ၤလီၤ.အပူၤကွံာ်စှၤသီန့ၣ် ပှၤဆါတဖၣ် တၫ်ဘၣ်သုးကွံာ်၀ဲအလီၫ်အိၣ်န့ၣ်လီၤ.အ၀ဲသ့ၣ် ဟဲဒုးဃီၤတၫ်လၢဟီၣ်ခိၣ်လိၤတန့ၫ်လၢၤဘၣ်. တၫ် န့ၣ်အဃိ အ၀ဲသ့ၣ်ကမၤ၀ဲအဂီၫ် အိၣ်ဒၣ်တၫ်၀ဲန့ၣ်လီၤ.မ့ၫ်ဒ်သိးတသ့ၣ်ညါဒုၣ်ဒါအတၫ်ပနီၣ် လီၫ်ဘၣ်ဒီးခး၀ဲအသိးန့ၣ် လီၤ.တၫ်ဒုးမ့ၫ်ကဲထီၣ်ဆံးဆံးဖိဒၣ်လဲၣ် ဟဲလၢကဘီယူၤလီၤ.တၫ်ဒုးတအိၣ်နာ်သက့ မ့ၫ်အဲၣ်ဒိးတ့ၫ်လီၤ၀ဲန့ၣ်ဟဲ၀ဲအဂ့ၫ်” န့ၣ်လီၤ.
ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤ,၂၀၂၅နံၣ်အပူၤ သုးကီၣ်ကဟဲဒုး၀ဲလၢကလံၤကျါ(၃)ဘျီ,ခးလီၤကျိဖးဒိၣ်(၁၀၀)ဘျီဘျဲၣ်, ဒုးတ့ၫ်လီၤမ့ၣ်ပိၫ်လၢဒြိ(၁၉)ဘျီ၀ံၤကမျၢၫ်ဘၣ်သံ(၄)ဂၤဒီးဘၣ်ဒိဘၣ်ထံး(၂၀)ဂၤဘျဲၣ်,ဟံၣ်ဃီ(၃၅)ဖျၢၣ်,တၫ်ဘူၣ်တၫ်ဘါတၫ်သူၣ်ထီၣ်(၂)ဖျၢၣ်,ကၠိ(၃)ဖျၢၣ်ဘၣ်ဟးဂီၤတကးဘၣ်,က့ၤဖီၣ်ပှၤ(၁)ဂၤလၢတအိၣ်ဒီးတၫ်ဂ့ၫ်တၫ်ကျိၤအဂ့ၫ် ဖဲလါမးရှး(၅)သီအနံၤန့ၣ် ကညီဂ့ၫ်ဂီၫ်အူတၫ်မၤစၢၤကရၢဘိးဘၣ်ရၤလီၤ၀ဲလီၤ.
