လါမးရှး(၁၄)သီ,၂၀၂၅နံၣ်
ကတၢၣ်ပီၣ်တဲသကိး ယူၣ်ကရ့တၢ်ပတုၥ်တၢ်ခးအဂီၢ် အမဲရကၤကရၢတဖၣ် လဲၤဆူရၢးရှၣ်လံအဂ့ၢ် အမဲရကၤကီၢ်ခိၣ် ဒီၣ်နၢၤထရဲး စံး၀ဲန့ၣ်လီၤ.
ယူၣ်ကရ့ဒီးအမဲရကၤပှၤဘၣ်မူဘၣ်ဒါတဖၣ် ထံၣ်လိၥ်တဲသကိးသးဖဲဆီၣ်ဒံၣ်အၣ်ရ့ဘံယါ၀ံၤအလီၢ်ခံ ယူၣ်ကရ့ၣ်အၢၣ်လီၤ၀ဲလၢ ကမၤတၢ်ပတုၥ်တၢ်ခးလၢ အသီ(၃၀)အတီၢ်ပူၤန့ၣ်လီၤ.
အမဲရကၤထံဂုၤကီၢ်ဂၤကိတိၥ် မၣ်ကိၣ်ရူၣ်ဘံၣ်အိၣ်စံး၀ဲလၢ ကတီၢ်ခဲအံၤန့ၣ် တၢ်ဆၢကတီၢ်ဟဲတုၤဃီလၢ ရၢရှၣ်ကဘၣ်ပၥ်လီၤတၢ်ဆၢတဲၥ်လီၤအဂ့ၢ်န့ၣ်လီၤ.ယူၣ်ကရ့တၢ်ဒုးကကတၢၢ်ကွံၥ်အဂီၢ် ကျိၤကျဲအိၣ်ဒၣ်ထဲတဘိလၢကဘၣ်မၤတၢ်မုၥ်တၢ်ခုၣ်တၢ်ထံၣ်လိၥ်တဲသကိးအဂ့ၢ် အမဲရကၤနၥ်၀ဲဒ်န့ၣ်န့ၣ်လီၤ.
အမဲရကၤကရၢတဖၣ် လဲၤတုၤဆူကီၢ်ရၢးရှၣ်အဆၢကတီၢ် ကီၢ်ခိၣ်ပူၣ်တ့ၣ် လဲၤဟးအိၣ်ကသုၣ်ဆူ ခးလီၢ်က၀ီၤအဂ့ၢ် ရၢးရှၣ်ဘိးဘၣ်ရၤလီၤဃၥ်၀ဲန့ၣ်လီၤ.
ယူၣ်ကရ့ဒီးအမဲရကၤ ထံၣ်လိၥ်သးလၢ ကၠဲးဒၣ်၀ံၤအလီၢ်ခံ စလၣ်စကံစံး၀ဲလၢ ရၢးရှၣ်ကအၢၣ်လီၤတၢ်ပတုၥ်တၢ်ခးအံၤအဂီၢ် အမဲရကၤကဘၣ်မၤအီၤလီၤအဂ့ၢ်န့ၣ်လီၤ.
ရၢရှၣ်ပဒိၣ်ကရၢစ့ၢ်ကီး ဒ်သိးကအၢၣ်လီၤပၥ်သး တၢ်ပတုၥ်တၢ်ခးအံၤအဂီၢ် သမံသမိး၀ဲ၀ံၤ ထရၢးဒီးပူၣ်တ့ၣ်အဘၢၣ်စၢၤ တၢ်တဲသကိးလၢလီတဲစိအပူၤတဖၣ်စ့ၢ်ကီးအိၣ်၀ဲအဂ့ၢ် စံး၀ဲန့ၣ်လီၤ.
ဖဲထရၢးထံၣ်လိၥ်သးဒီးအဲၣ်ယၣ်လၣ်ကိတိၥ်ခိၣ်ကျၢၢ်အဆၢကတီၢ် ထရၢးစံး၀ဲလၢ ဘၣ်ထွဲယူၣ်ကရ့-ရၢးရှၣ်တၢ်ပတုၥ်တၢ်ခးအဂီၢ် တၢ်ဒိးန့ၢ်ဃၥ်တၢ်ကစီၣ်လၢအဂ့ၤတဖၣ်အဂ့ၢ်န့ၣ်လီၤ.
ဖဲအပူၤကွံၥ် လါအီကၢးအပူၤ ယူၣ်ကရ့မၤဒုးယၤရဲၣ်ကျဲၤ၀ံၤ ပူၣ်တ့ၣ်လဲၤဟးအိၣ်ကသုၣ်ဆူ ခးလီၢ်က၀ီၤအံၤန့ၣ် မ့ၢ်အဆိကတၢၢ်တဘျီန့ၣ်လီၤ. ပူၣ်တ့ၣ်စံး ရၢရှၣ်သုးမုၢ်ဒိၣ်တဖၣ်လၢ တၢ်ကဘၣ်နီၤဟးထီၣ်ကွံၥ် ယူၣ်ကရ့တဖၣ်လၢ ခးလီၢ်က၀ီၤပူၤအံၤအဂ့ၢ် ရၢးရှၣ်ပဒိၣ်ပၥ်ဖျါဃၥ်၀ဲန့ၣ်လီၤ.
ဖဲပူၣ်တ့ၣ်တဲလီၤတၢ် တၢ်ကလုၢ်အကျါ ပၣ်ဃုၥ်၀ဲစ့ၢ်ကီးလၢ ယူၣ်ကရ့ခဲလၢၥ် တၢ်တဘၣ်အိၣ်လၢလီၢ်က၀ီၤအံၤအပူၤအဂ့ၢ် ရၢးရှၣ်မံၣ်ဒံၣ်ယၣ်တဖၣ် ပၥ်ဖျါဃၥ်၀ဲန့ၣ်လီၤ.
ယူၣ်ကရ့သုးရိၣ်မဲခိၣ်ကျၢၢ်စ့ၢ်ကီး နဲၣ်လီၤဃၥ် အပှၤသုးဖိတဖၣ်လၢ တၢ်ကဘၣ်ဂုၤက့ၤအခံလၢ ခးလီၢ်က၀ီၤပူၤအံၤအဂ့ၢ်န့ၣ်လီၤ.
Source : Reuters
