လါမးရှး(၁၄)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ထီတထူၣ်ကီၢ်ဆၣ်အပူၤ ခီဖျိသုးကီၣ်ကးမၤကလံၤကျါတၢ်ဒုးအဃိ မ့ၣ်အူမ့ၣ်ပိၢ်ဘၣ်အီၤဒီး Free Burma Ranger (FBR)ကသံၣ်မူဒါခိၣ်လၢအမ့ၢ် နီၢ်စ့မူဖီ, သးနံၣ်အိၣ်(၂၅)နံၣ် ဘၣ်သံ၀ဲဖဲ လါမးရှး(၁၀)သီအနံၤအဂ့ၢ် FBRထုးထီၣ်ပၥ်ဖျါဃၥ်၀ဲန့ၣ်လီၤ.
ကသံၣ်မူဒါခိၣ်နီၢ်စ့မူဖီဒီးFBRကရၢဖိတဖၣ်လဲၤကူစါယါဘျါန့ၢ်ပှၤဘၣ်ဒိဘၣ်ထံးလၢသုးကီၣ်ကးအသုးမၤ၀ဲကလံၤကျါတၢ်ဒုးအပူၤအဆၢကတီၢ်ဖဲလါမးရှး(၈)သီအနံၤန့ၣ် ခီဖျိလၢသုးကီၣ်ကးဟဲတ့ၢ်လီၤကဒီးမ့ၣ်အူမ့ၣ်ပိၢ်တဖၣ်အဃိ ကသံၣ်မူဒါခိၣ်အံၤဘၣ်သံ၀ဲဒၣ်လၢအလီၢ်တဘျီဒီးအဂၤတဂၤစ့ၢ်ကီဒီး ဘၣ်ဒိ၀ဲအဂ့ၢ်တၢ်သ့ၣ်ညါဘၣ်န့ၣ်လီၤ.
ထီတထူၣ်ပှၤလီၢ်က၀ီၤဖိတဂၤလၢ အမ့ၢ်နီၢ်စ့မူဖီအံၤ ဖဲ၂၀၂၃နံၣ်န့ၣ် အဖျိထီၣ် Jungle School of Medicine Kawtholei (JSMK)တၢ်သိၣ်လိ၀ံၤအလီၢ်ခံ ကဲထီၣ်ကသံၣ်မူဒါခိၣ်တဂၤအသိးလၢ (Hu Mu Del Clinic)တၢ်ဆါဟံၣ်လၢအိၣ်ဖဲ ထီတထူၣ်ကီၢ်ဆၣ်အပူၤဒီး ဖီၣ်လိၥ်စုမၤသကိးတၢ်ဒီး FBR၀ံၤ ကူစါယါဘျါန့ၢ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)အပှၤသုးဖိလၢ အဘၣ်ဒိတဖၣ်လၢ ကီၢ်ရ့ၣ်တီအူဟီၣ်က၀ီၤအပူၤန့ၣ်လီၤ.
တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ် သုးကီၣ်ကးသမ့ၤစိးသုးကလၢၤလၢအိၣ်ဖဲ ဒီၣ်ဖးခိၣ်ဒီးထီတထူၣ်ကီၢ်ဆၣ်အဆၢဟီၣ်က၀ီၤပူၤ၀ံၤအလီၢ်ခံ သုးကီၣ်ကးတပၤ ဟဲဒုး၀ဲလၢကလံၤကျါတဖၣ်ဒ် ဟဲတ့ၢ်လီၤမ့ၣ်ပိၢ်ဒီးမ့ၣ်အူမ့ၣ်ပိၢ်တဖၣ်ဒီး ခးလီၤကျိစဲးတဖၣ်လၢ လါမးရှး(၆)သီတုၤ(၉)သီအနံၤန့ၣ်လီၤ.
ခီဖျိသုးကီၣ်ကးအသုး မၤကလံၤကျါတၢ်ဒုးအပူၤ ဘၣ်သံ၀ဲ ရွ့ၣ်ပၠံၣ်သၣ်မကၠံတီသ၀ီပူၤ ပိၥ်မုၣ်တဂၤ, ပိၥ်ခွါတဂၤ, ကၠီးကၠံပီးသ၀ီပူၤ ပိၥ်မုၣ်တဂၤ, ကွ့းကၠံသ၀ီပူၤ သူၣ်က့သးပှၢ်ပိၥ်မုၣ်တဂၤတဖၣ်အသိး တစှၤန့ၣ်ပှၤ(၇)ဂၤ ဘၣ်ဒိ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
