လါမးရှး(၁၃)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,ကီၢ်သူလ့ၤတၢ်ပၢဟီၣ်က၀ီၤအပူၤ၂၀၂၅နံၣ်,လါဖ့ၤဘြူၤအါရံၤတလါအတီၢ်ပူၤတၢ်ဒုးကဲထီၣ်တ့ၢ်လၢသုးဟံးန့ၢ်ဆူၣ်ထံကီၢ်တၢ်စိတၢ်ကမီၤသုးကီၣ်ကးအသုးဒီးKNLAအဘၢၣ်စၢၤ အိၣ်ထီၣ်၀ဲခဲလၢၥ်(၂၈၅)ဘျီအဂ့ၢ် တၢ်သ့ၣ်ညါဘၣ်န့ၣ်လီၤ.
တၢ်ဒုးတဖၣ်အပူၤ သုးကီၣ်ကးအသုး ဟဲခးလီၤတၢ်လၢကဘီယူၤ အိၣ်ထီၣ်၀ဲ(၅၆)ဘျီဆူအဖီခိၣ်န့ၣ်လီၤ. ဒ်န့ၣ်အသိး ဟဲတ့ၢ်လီၤဒြိမ့ၣ်ပိၢ်(၂၈)ဘျီဒီး ခးလီၤကျိဖးဒိၣ်တဖၣ်စ့ၢ်ကီး အိၣ်ထီၣ်၀ဲကိးမုၢ်နံၤဃၥ်ဃၥ်န့ၣ်လီၤ. ဖဲန့ၣ်အကျါ ခီဖျိသုးကီၣ်ကးအသုး ခးလီၤကျိဖးဒိၣ်အဃိ လီၢ်က၀ီၤကမျၢၢ်ဘၣ်သံ၀ဲ(၆)ဂၤ, ဘၣ်ဒိ၀ဲ(၃၂)ဂၤဒီး ဘၣ်ဟးဂီၤကွံၥ်ဟံၣ်(၉၀)ဖျၢၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး သုးကီၣ်ကးဒီးKNLAအဘၢၣ်စၢၤတၢ်ဒုးတဖၣ်အပူၤ သုးကီၣ်ကးအသုးဘၣ်သံ၀ဲ(၁၇၅)ဂၤ၀ံၤ ပှၤလၢဟဲဟ့ၣ်လီၤအသးအိၣ်ထီၣ်၀ဲ(၂၉)ဂၤအဂ့ၢ် R2Kတၢ်မၤနီၣ်စရီအဖီခိၣ် တၢ်သ့ၣ်ညါဘၣ်န့ၣ်လီၤ.
တကးဘၣ် တၢ်ဒုးကဲထီၣ်သးတအိၣ်ဘၣ်ဒီးခီဖျိသုးကီၣ်ကးအသုး ပညိၣ်ဒုးကမျၢၢ်တဖၣ်အဃိ ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤအပူၤ သီခါဖၠၣ် ဘၣ်ဟးဂီၤကွံၥ်၀ဲ(၇)ဖျၢၣ်, ဃိၣ်တဖျၢၣ်ဒီးတၢ်သိၣ်လိကၠိ(၄)ဖျၢၣ် ဘၣ်ဟးဂီၤကွံၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
လါဖ့ၤဘြူၤအါရံၤအတီၢ်ပူၤ KNLAဒီးသုးပၥ်ဖှိၣ်တဖၣ် ထီၣ်ဒုးမၤန့ၢ် သုးကီၣ်ကးမဲးပြ့ခံသုးကလၢၤလၢ အိၣ်ဖဲကီၢ်ရ့ၣ်ဒူသထူၣ်ဟီၣ်က၀ီၤပူၤဒီး တၢ်ဒုးမၤန့ၢ်အပူၤ သုးကီၣ်ကးအသုးသံ(၂၉)ဂၤ, ဘၣ်တၢ်ဖီၣ်န့ၢ်မူဒံး(၁၄)ဂၤဒီး KNLAတပၤစ့ၢ်ကီး ဘၣ်သံ၀ဲ(၃)ဂၤဒီး ဘၣ်ဒိ၀ဲ(၃၃)ဂၤအဂ့ၢ် တၢ်သ့ၣ်ညါဘၣ်န့ၣ်လီၤ.
တကတီၢ်ဃီ ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤအပူၤ KNLAဒီးသုးပၥ်ဖှိၣ်တဖၣ် ထီၣ်ဒုးမၤန့ၢ်၀ဲသုးကီၣ်ကးအသုးတၢ်သမံသမိးတြဲၤတဖၣ်ဒ်အမ့ၢ် နယွဲပ့ၣ်, တီၣ်၀ံး,ထ့ၣ်ပ့ၣ်ဒီးကၠိကိသ၀ီအကပၤ တီယၣ်ကၠီသီခါဖၠၣ်အကပၤ တၢ်သမံသမိးတြဲၤတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါ သုးကီၣ်ကးအသုးတဖၣ်အံၤ တၢ်ဒုးကဲထီၣ်သးအိၣ်မ့ၢ်ဂ့ၤ, တအိၣ်မ့ၢ်ဂ့ၤန့ၣ် ပညိၣ်ဒုးလီၢ်က၀ီၤကမျၢၢ်တဖၣ်လၢ မၤကလံၤကျါတၢ်ဒုးတဖၣ်, ဒြိတၢ်ဒုးတဖၣ်ဒီးခးလီၤကျိဖးဒိၣ်တဖၣ် အိၣ်ထီၣ်ကိးမုၢ်နံၤဃၥ်ဃၥ်လၢ ကီၢ်သူလ့ၤတၢ်ပၢဆှၢဟီၣ်က၀ီၤတဖၣ်အပူၤန့ၣ်လီၤ.
တၢ်ဂ့ၢ်တၢ်ကျိၤတဖၣ်လၢ တၢ်ပၥ်ဖျါတ့ၢ်လၢထးတဖၣ်အံၤ မ့ၢ်ဒၣ် R2Kတၢ်ထၢဖှိၣ်မၤနီၣ်စရီအဖီခိၣ် တၢ်ပၥ်ဖျါအီၤလီဒီး မ့မ့ၢ်လၢ ဟီၣ်ခိၣ်မဲၥ်ဖံးခိၣ်တခီ ကအါန့ၢ်ဒံးအလီၢ်သ့အဂ့ၢ်န့ၣ်လီၤ.
