လါမးရှး(၁၃)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဆှၢဟီၣ်က၀ီၤတဖၣ်အပူၤ လါဖ့ၤဘြူၤအါရံၤအတီၢ်ပူၤ ခီဖျိတၢ်ဒုးတဖၣ်ဒီးသုးကီၣ်ကးအသုးမၤ၀ဲကလံၤကျါတၢ်ဒုးတဖၣ်အဃိ ပှၤလီၢ်အိၣ်ကမှံဖိ ဟဲအါထီၣ်(၅)ကလးဘျဲၣ်၀ံၤ ကတီၢ်ခဲအံၤန့ၣ် ပှၤလီၢ်အိၣ်ကမှံဖိအိၣ်ထီၣ်တုၤခဲလၢၥ်ပၥ်ဖှိၣ်(၁၁)ကလီၢ်ဘျဲၣ်အဂ့ၢ် ကီၢ်ပူၤကညီပှၤလီၢ်အိၣ်ကမှံကမံးတံၥ်(CIDKP) ထုးထီၣ်ပၥ်ဖျါတၢ်ကစီၣ်န့ၣ်လီၤ.
လါဖ့ၤဘြူၤအါရံၤအတီၢ်ပူၤ ကီၢ်သူလ့ၤတၢ်ပၢဆှၢဟီၣ်က၀ီၤ, ကီၢ်ရ့ၣ်နွံဘ့ၣ်အပူၤ ပှၤလီၢ်အိၣ်ကမှံဖိဟဲအါထီၣ်၀ံၤ တၢ်ဒုးကဲထီၣ်သးအအါကတၢၢ်လၢကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤပှၤလီၢ်အိၣ်ကမှံဖိနီၣ်ဂံၢ်ဟဲအါထီၣ်တုၤ(၂)ကလးဃၥ်ဃၥ်ဒီး အအါကတၢၢ်လီၤအဂ့ၢ် (CIDKP)ပၥ်ဖျါဃၥ်၀ဲန့ၣ်လီၤ.
ဒ်န့ၣ်အသိး လါဖ့ၤဘြူၤအါရံၤအတီၢ်ပူၤ သုးကီၣ်ကးဒီးတၢ်ပၢၢ်ဆၢဂံၢ်ဘါကရူၢ်တဖၣ်အဘၢၣ်စၢၤ တၢ်ဒုးတဖၣ်ဒီးသုးကီၣ်ကးကလံၤကျါတၢ်ဒုးတဖၣ်အဃိ ကီၢ်ရ့ၣ်ဒူသထူၣ်ဟီၣ်က၀ီၤအပူၤ ပှၤလီၢ်အိၣ်ကမှံဖိ(၆၂၂၄)ဂၤ,ကီၢ်ရ့ၣ်တီအူဟီၣ်က၀ီၤပူၤ(၁၀,၁၆၉)ဂၤ, ကီၢ်ရ့ၣ်ဘျံး-ဒ၀ဲၢ်ဟီၣ်က၀ီၤပူၤ (၂,၈၇၃)ဂၤ, ကီၢ်ရ့ၣ်မုၢ်တြီၢ်ဟီၣ်က၀ီၤပူၤ(၃,၅၂၅)ဂၤ, ကီၢ်ရ့ၣ်ဒူပျၥ်ယၥ်ဟီၣ်က၀ီၤပူၤ(၁,၈၉၉)ဂၤ, ကီၢ်ရ့ၣ်ဖၣ်အၣ်ဟီၣ်က၀ီၤအပူၤ(၆,၇၉၇)ဂၤအသိး ကီၢ်ရ့ၣ်တဘ့ၣ်စုၥ်စုၥ်အပူၤ ပှၤလီၢ်အိၣ်ကမှံဖိ ဟဲအါထီၣ်၀ဲအဂ့ၢ် (CIDKP)စံး၀ဲန့ၣ်လီၤ.
ဖဲအပူၤကွံၥ်လါဖ့ၤဘြူၤအါရံၤအတီၢ်ပူၤကီၢ်သူလ့ၤတၢ်ပၢဆှၢဟီၣ်က၀ီၤတဖၣ်အပူၤခီဖျိတၢ်ဒုးတဖၣ်ဒီးသုးကီၣ်ကးအသုးကလံၤကျါတၢ်ဒုးတဖၣ်,ခးလီၤကျိဖးဒိၣ်တဖၣ်အဃိပှၤလၢဘၣ်ပၥ်တ့ၢ်ဟံၣ်ဃီဘၣ်ဃ့ၢ်ပူၤဖျဲးသးနီၣ်ဂံၢ်အိၣ်ဒၣ်ထဲ(၁၀)ကလီၢ်ဘျဲၣ်(၁,၀၇၁,၀၅၇ဂၤ)ဘၣ်ဆၣ်လၢလါဖ့ၤဘြူၤအါရံၤအတီၢ်ပူၤတခီဟဲအါထီၣ်တုၤ(၁၁)ကလီၢ်ဘျဲၣ် (၁,၁၂၂,၆၁၂)ဂၤ န့ၣ်လီၤ.
ဒ်န့ၣ်အသိးကတီၢ်ခဲအံၤန့ၣ်သုးက့(၂)ဟီၣ်က၀ီၤ,ဒီၣ်ဖးခိၣ်ဒီးထီတထူၣ်ကီၢ်ဆၣ်အဆၢတၢ်လီၢ်တနီၤဒီးသုးက့(၁)ဟီၣ် က၀ီၤ ဘံလ့ကီၢ်ဆၣ်တဖၣ်အပူၤ တၢ်ဒုးတဖၣ်ဆူၣ်ထီၣ်အသိး သုးက့(၄)ဟီၣ်က၀ီၤ မီတီၣ်ကျဲမုၢ်, သုးက့(၅), ဖၣ်ပူၣ်ဟီၣ်က၀ီၤ, ကတၢတံးသုးကလၢၤအကပၤဒီး သုးက့(၆)ဟီၣ်က၀ီၤ, ကီးတရံးကီၢ်ဆၣ်, အ့ရှၢကျဲမုၢ်အဖီခိၣ် တၢ်ဒုးတဖၣ်ဆူၣ်ထီၣ်လၢ သုးကီၣ်ကးအသုးဒီးတၢ်ပၢၢ်ဆၢဂံၢ်ဘါကရူၢ်တဖၣ်အဘၢၣ်စၢၤန့ၣ်လီၤ.
ကီၢ်ပူၤကညီပှၤလီၢ်အိၣ်ကမှံကမံးတံၥ်(CIDKP)အံၤ ကီၢ်သူလ့ၤတၢ်ပၢဆှၢဟီၣ်က၀ီၤတဖၣ်အပူၤ မၤစၢၤ၀ဲပှၤလီၢ်အိၣ်ကမှံဖိတဖၣ် ဒ်တၢ်အီၣ်တၢ်အီတဖၣ်ပၣ်ဃုၥ် ဂံၢ်ခီၣ်ထံးတၢ်လၢလိၣ်ဘၣ်တဖၣ်အသိးဒီး ကညီတၢ်မၤစၢၤဒီးတၢ်ဂုၤထီၣ်ပသီထီၣ်၀ဲၤဒၢး(KORD), ကညီပိၥ်မုၣ်ကရၢ(KWO), ကညီတၢ်ဆီၣ်ထွဲတၢ်မုၥ်တၢ်ခုၣ်ကရူၢ်(KPSN)ဒီး တၢ်ကရၢကရိအဂုၤအဂၤတဖၣ်စ့ၢ်ကီး မၤစၢၤ၀ဲန့ၣ်လီၤ.
