လါမးရှး(၁၂)သီ,၂၀၂၅နံၣ်
ကၠီၣ်တဲၣ်-ပယီၤကီၢ်ဆၢအကပၤ ခီဖျိတၢ်ဒုးတဖၣ်ကဲထီၣ်လၢ သုးကီၣ်ကးဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤအဃိ လီၢ်က၀ီၤကမျၢၢ်တဖၣ် ကအိၣ်လၢတၢ်ပလီၢ်ပဒီဒီးတၢ်သုတလဲၤဆူ ကီၢ်ဆၢလီၢ်က၀ီၤတပၤတဂ့ၤအဂီၢ် မဲၢ်ဟီၣ်စီၣ်ကီၢ်ရ့ၣ်ခိၣ် Yutthana Jaoduri ဟ့ၣ်ပလီၢ်၀ဲန့ၣ်လီၤ.
(၁၂၀-မမ)ကျိဖးဒိၣ်လၢကီၢ်ပယီၤတပၤခးလီၤအံၤ လဲၤလီၤတဲၥ်၀ဲဒၣ်ဖဲ ကီၢ်ကၠီၣ်တဲၣ် မဲၣ်ဟီၣ်စီၣ်ကီၢ်ရ့ၣ်, တဘၣ်ဘိၣ်ခိၣ်တၢ်သူၣ်တၢ်ဖျးအလီၢ်တလီၢ်အပူၤဒီး ဖဲလါမးရှး(၁၁)သီအနံၤန့ၣ် လီၢ်က၀ီၤဖိတဖၣ် ဃုထံၣ်န့ၢ်အီၤ၀ံၤအလီၢ်ခံ ကီၢ်ရ့ၣ်ခိၣ်ဟ့ၣ်ပလီၢ်အီၤအဂ့ၢ် ကၠီၣ်တဲၣ်တၢ်ကစီၣ်လၢအမ့ၢ် Khaosod English ပၥ်ဖျါဃၥ်၀ဲန့ၣ်လီၤ.
မဲၢ်ဟီၣ်စီၣ်ကီၢ်ရ့ၣ်ပှၤဘၣ်မူဘၣ်ဒါ Yutthana Jaoduriဒီးကၠီၣ်တဲၣ်ပဒိၣ်ပှၤဘၣ်မူဘၣ်ဒါတဖၣ် လဲၤသမံသမိး၀ဲ ကျိဖးဒိၣ်အချံလၢတၢ်ထံၣ်န့ၢ်အီၤအံၤန့ၣ်လီၤ. ကျိဖးဒိၣ်လၢဟဲလီၤတဲၥ်အံၤ ကရၢဖဲလဲၣ်တဖု ခး၀ဲအဂ့ၢ်တခီ တပၥ်ဖျါဃၥ်၀ဲလၢ တၢ်ကစီၣ်အပူၤဘၣ်.
ကီၢ်ပယီၤတပၤ တၢ်ဒုးဆူၣ်၀ံၤ ကျိပိၢ်အကလုၥ်တဖၣ် တၢ်နၣ်ဟူဘၣ်အီၤလၢ Ban Huay Makua Som ဒီး Ban Na Pa Paekသ၀ီလၢအိၣ်ဖဲ ကၠီၣ်တဲၣ်တပၤအဂ့ၢ် စံး၀ဲန့ၣ်လီၤ.
ကတီၢ်ခဲအံၤန့ၣ် သုးကီၣ်ကးအသုးဒီး ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်တဖၣ်အဘၢၣ်စၢၤ တၢ်ဒုးတဖၣ်အိၣ်ထီၣ်ကိးမုၢ်နံၤဃၥ်ဃၥ် ဖဲကညီကီၢ်စဲၣ်ဒီးတနီသရံးကီၢ်ခီလၢအစဲဘူးလိၥ်သးဒီးကီၢ်ကၠီၣ်တဲၣ်န့ၣ်လီၤ.
တၢ်ဒုးတဖၣ်အပူၤ သုးကီၣ်ကးတပၤ မၤ၀ဲကလံၤကျါတၢ်ဒုး, ခးလီၤကျိဖးဒိၣ်ဒီးမၤ၀ဲဒြိတၢ်ဒုးတဖၣ် အိၣ်ထီၣ်၀ဲကိးမုၢ်နံၤဃၥ်ဃၥ်အသိး ဟးနုၥ်လီၤသုးကျိၤတဖၣ်အဃိ လီၢ်က၀ီၤကမျၢၢ်တဖၣ် ဘၣ်ဃ့ၢ်ပူၤဖျဲးသးန့ၣ်လီၤ.
Ref: RFA
