လါမးရှး(၁၁)သီ,၂၀၂၅နံၣ်
ဘၣ်ထွဲဒီးအံၣ်ရၣ်နူကလံယါတၫ်ဂ့ၫ်န့ၣ် တၫ်ကမၤတၫ်ထံၣ်လိာ်တၢၣ်ပီၣ်တဲသကိးဧါ(မ့တမ့ၫ်)ကကွၫ်ဆၢၣ်မဲာ်ဘၣ် လၢသုးဂ့ၫ်၀ီတကပၤ တၫ်ဟံးန့ၫ်ဂ့ၫ်၀ီတဖၣ်အဂ့ၢ် အမဲရကၤကီၫ်ခိၣ်ဒီနၢၣ်ထရၢး ဟ့ၣ်ပလီၫ်၀ဲလီၤ.
ဘၣ်ထွဲဒီးအံၣ်ရၣ်နူကလံယါတၫ်ရဲၣ်တၫ်ကျဲၤန့ၣ် ဆှၢဟ့ၣ်အံၣ်ရၣ် လံာ်တဘ့ၣ်အဂ့ၫ် ဒီနၢၣ်ထရၢးန့ၣ် ဖဲထံၣ်လိာ်သးဒီး FOX တၫ်ကစီၣ်၀ဲၤကျိၤ တၫ်သံကွၫ်စံးဆၢတၫ်ရဲၣ်တၫ်ကျဲၤအကတီၫ် တဲဟ့ၣ်ပလီၫ်၀ဲ၀ံၤ ထံကီၫ်ခံဘ့ၣ်အဘၢၣ်စၢၤ တၫ်ဖ့ၣ်ဆၢကဆူၣ်ထီၣ်သ့၀ဲလီၤ.
အံၣ်ရၣ်တကပၤ မ့ၫ်ကွၫ်ဆၢၣ်မဲာ်၀ဲလၢ သုးဂ့ၫ်၀ီအဖီခိၣ်န့ၣ် တၫ်လီၤပျံၤလီၤဖုးလၢကပိာ်ထွဲထီၣ်အခံတဖၣ် ကကဲထီၣ်ဒီး အမဲရကၤန့ၣ် တမ့ၫ်ကဟ့ၣ်တၫ်ပျဲလၢ အံၣ်ရၣ်ကန့ၫ်ပၢဘၣ်နူကလံယါလၢၤဘၣ်အဂ့ၫ် ကီၫ်ခိၣ် ဒီနၢၣ်ထရၢး တဲ၀ဲ လီၤ.
၂၀၁၅နံၣ် အံၣ်ရၣ်နူကလံယါတၫ်အၢၣ်လီၤန့ၣ် လၢတၫ်ကတီၤပၢၤဃာ် အံၣ်ရၣ် နူကလံယါတၫ်ရဲၣ်တၫ်ရဲၤအဂီၫ် ထံဂုၤ ကီၫ်ဂၤတၫ်ကးတံာ်ဟံးန့ၫ်ဂ့ၫ်၀ီတဖၣ် တၫ်မၤကဆှၣ်လီၤန့ၫ်၀ဲလီၤ.ဘၣ်ဆၣ်သနာ်က့ လၢအပူၤကွံာ် အဆိကတၢၫ်တဘျီ ထရၢးကဲကီၫ်ခိၣ်အဆၢကတီၫ် အမဲရကၤဟးထီၣ်ကွံာ်လၢ လံာ်တၫ်အၢၣ်လီၤ၀ဲအံၤန့ၣ်လီၤ.
သနာ်က့ အံၣ်ရၣ်န့ၣ် အမဲရကၤဟးထီၣ်ကွံာ်ဘၣ်ဆၣ် ဒ်လံာ်တၫ်အၢၣ်လီၤတၫ်ဘျၢတဖၣ်အသိး လူၤပိာ်မၤထွဲ၀ဲ(၁)နံၣ် အဂ့ၫ် တဲ၀ဲလီၤ.အလီၫ်ခံ နူကလံယါတၫ်ရဲၣ်တၫ်ကျဲၤတဖၣ်န့ၣ် က့ၤစးထီၣ်မၤက့ၤ၀ဲဒီးအမဲရကၤစ့ၫ်ကီး မၤကဒါက့ၤ တၫ်ကးတံာ်ဟံးန့ၫ်ဂ့ၫ်၀ီတဖၣ်န့ၣ်လီၤ.
အံၣ်ရၣ်န့ၣ် ဂဲၤလိာ်၀ဲလၢကန့ၫ်ပၢဘၣ်နူကလံယါတၫ်စုက၀ဲၤအဂ့ၫ် အမဲရကၤစံးအၢစံးသီဃာ်၀ဲ၀ံၤ လၢအံၣ်ရၣ်အဖီခိၣ် တၫ်ကးတံာ်ဟံးန့ၫ်ဂ့ၫ်၀ီ ဟ့ၣ်တၫ်ဆီၣ်သနံး တၫ်ဘျၢန့ၣ် ဖဲလါယနူၤအါရံၤအပူၤ ဒီနၢၣ်ထရၢးလၢကဲထီၣ်ကဒါက့ၤ ကီၫ် ခိၣ်အံၤ ပာ်လီၤက့ၤ၀ဲန့ၣ်လီၤ.
အံၣ်ရၣ်တခီတၫ်စံးအၢစံးသီတဖၣ် ဂ့ၫ်လိာ်ဃာ်၀ဲ၀ံၤ တၫ်အၢၣ်လီၤအသးသမူကအိၣ်ကဒါက့ၤအဂီၫ် သးအိၣ်၀ဲအဂ့ၫ် တဲဃာ်၀ဲတလီၫ်လီၫ်န့ၣ်လီၤ.
အံၣ်ရၣ်န့ၣ် မၤကဆှီဃာ်၀ဲန့ၫ်(၆၀)မျးကယၤ၀ံၤ န့ၫ်ပၢဃာ်၀ဲ ယူၣ်ရ့ၣ်နံၣ်ယၣ်တဖၣ် လၢတၫ်သူ၀ဲဒ်တၫ်စုက၀ဲၤသ့အသိး ဒီးတၫ်အံၤမ့ၫ်တၫ်မၤဟးဂီၤ ထံကီၫ်လၢအဂံၫ်ဆူၣ်တဖၣ် ဆဲးလီၤတ့ၫ် ၂၀၁၅နံၣ် နူကလံယါတၫ်အၢၣ်လီၤအဂ့ၫ် ထံဂုၤကီၫ်ဂၤ နူကလံယါအ့ၣ်ကၠ့ၣ်စံၣ် ပှၤဘၣ်မူဘၣ်ဒါစ့ၫ်ကီး ဟ့ၣ်ပလီၫ်ဃာ်၀ဲန့ၣ်လီၤ.
Ref: VOM
