လါမးရှး(၁၁)သီ,၂၀၂၅နံၣ်
ခ့ၣ်အဲၣ်ယူၣ်-လီၢ်ခၢၣ်သးတၢ်ကစီၣ် ပၥ်ဖျါဃၥ်၀ဲလၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤအပူၤ ခီဖျိသုးကီၣ်ကးအသုး ပညိၣ်ဒုးလီၢ်က၀ီၤကမျၢၢ်အိၣ်ဆိးဒူသ၀ီပူၤဒီး တၢ်ဖံးအီၣ်မၤအီၣ်လီၢ်ကျဲတဖၣ်အပူၤ လၢခးလီၤကျိဖးဒိၣ်, ဟဲတ့ၢ်လီၤမ့ၣ်ပိၢ်လၢဒြိတဖၣ်ဒီး ကဘီယူၤတဖၣ်ဟဲတ့ၢ်လီၤမ့ၣ်ပိၢ်အဃိ လီၢ်က၀ီၤကမျၢၢ်ဘၣ်ဒိ၀ဲ(၁)ဂၤဒီး ဘၣ်ဟးဂီၤကွံၥ်၀ဲဟံၣ်ဃီ(၁၀)ဖျၢၣ်အဂ့ၢ်န့ၣ်လီၤ.
လါမးရှး(၅)သီ, ၂၀၂၅နံၣ်အနံၤ ဂီၤ(၉း၄၀)နၣ်ရံၣ်အဆၢကတီၢ် သုးကီၣ်ကးသုးရ့ၣ်(ခလရ-၂၆၄) ခးလီၤ(၁၂၀-မမ)ကျိဖးဒိၣ်ခံဖျၢၣ်ဆူ ထီလူၢ်ခိၣ်သ၀ီလၢအိၣ်ဖဲ ခ့ၣ်အဲၣ်ယူၣ်-ဆီထံးကီၢ်ဆၣ်အပူၤအဃိ ဒူသ၀ီဖိလၢအမ့ၢ် နီၢ်အ့ၣ်ပရဲၣ်၀ါ, သးနံၣ်(၄၀)နံၣ်တဂၤ ဘၣ်ဒိ၀ဲအဂ့ၢ် ပၥ်ဖျါဃၥ်၀ဲန့ၣ်လီၤ.
တကးဘၣ် ဖဲလါမးရှး(၈)သီ, ၂၀၂၅နံၣ်အနံၤ ဂီၤ(၁၁း၅၅)နၣ်ရံၣ်အဆၢကတီၢ် သုးကီၣ်ကးအတီအူကလံၤသုး (Y-12)ကဘီယူၤ ဟဲတ့ၢ်လီၤမ့ၣ်ပိၢ်(၃)ဖျၢၣ်ဆူ ကၠီးကၠံပီးသ၀ီလၢအိၣ်ဖဲ ခ့ၣ်အဲၣ်ယူၣ်-မူကီၢ်ဆၣ်ပူၤအဃိ ဒူသ၀ီဖိအဟံၣ်ခဲလၢၥ်(၁၀)ဖျၢၣ် ဘၣ်ဟးဂီၤကွံၥ်၀ဲန့ၣ်လီၤ.
ဒ်န့ၣ်အသိး ဖဲလါးမးရှး(၉)သီ, ၂၀၂၅နံၣ်အနံၤ ဟါ(၈း၀၅)နၣ်ရံၣ်အဆၢကတီၢ် သုးကီၣ်ကးအသုးရ့ၣ်(ခလရ-၂၆၄)လၢအိၣ်ဖဲ ၀့ၢ်ပ့စလိး ခးလီၤ(၁၂၀-မမ)ကျိဖးဒိၣ် ခံဖျၢၣ်ဆူ တီၣ်ခ့ၣ်သ၀ီလၢအိၣ်ဖဲ ခ့ၣ်အဲၣ်ယူၣ်-လၢၢ်ဒိၣ်ကီၢ်ဆၣ်ပူၤအဃိ လဲၤလီၤတဲၥ်ပိၢ်ဖးထီၣ်၀ဲဒၣ်ဖဲ သီခါဖၠၣ်ကရၢၢ်ပူၤဒီး ဘၣ်ဟးဂီၤကွံၥ်၀ဲ တၢ်ပၥ်သမ့ၣ်ဒ့အလီၢ်(၁)ဖျၢၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
