လါမးရှး(၁၀)သီ,၂၀၂၅နံၣ်
ကညီကီၢ်စဲၣ်, ဖၣ်အၣ်သုးကီၣ်ကးကီၢ်စဲၣ်ကရၢ မၤ၀ဲတၢ်အိးထီၣ်ကၠဲတိၤသီမူးတၢ်ရဲၣ်တၢ်ကျဲၤအဆၢကတီၢ် ဘၣ်တၢ်ဒုးအီၤလၢဒြိအဃိ တၢ်ဘၣ်ဒိဘၣ်ထံးတဖၣ်အိၣ်ထီၣ်၀ဲအဂ့ၢ် တၢ်သ့ၣ်ညါဘၣ်လၢ တၢ်ပၢၢ်ဆၢကရၢတဖၣ်အအိၣ်န့ၣ်လီၤ.
ပှၤလၢကဟဲအိးထီၣ်ကၠဲတိၤသီအမူးတၢ်ရဲၣ်တၢ်ကျဲၤတဖၣ် ဟဲတုၤ၀ဲဒၣ်ဖဲမဟါအနံၤဂီၤ(၆)နၣ်ရံၣ်အဆၢကတီၢ်၀ံၤ စှၤမံးနံးအဆၢကတီၢ်န့ၣ် တၢ်ပၢၢ်ဆၢကရၢတပၤ ဟဲတ့ၢ်လီၤဒြိမ့ၣ်ပိၢ်တဖျၢၣ်တီတီဆူ ပှၤအါဂၤအိၣ်အချၢၣ်သးဒီးပိၢ်ဖးထီၣ်၀ဲအဃိ ပှၤလၢတၢ်ဘၣ်ဒိဘၣ်ထံးတဖၣ် တၢ်က့ၤတီၣ်အီၤလၢသိလ့ၣ်တဖၣ်အဂ့ၢ် ဂ့ၢ်ခီၣ်ထံးတၢ်ပၢၢ်ဆၢကရၢစံး၀ဲန့ၣ်လီၤ. တၢ်လဲၤဒုးအီၤအပူၤ သုးကီၣ်ကးတပၤသံဒီးဘၣ်ဒိအိၣ်သ့အဂ့ၢ် စံး၀ဲန့ၣ်လီၤ.
သုးကီၣ်ကးကီၢ်စဲၣ်ကရၢတဖၣ်န့ၣ် အိးထီၣ်တိၤသီမူးတၢ်ရဲၣ်တၢ်ကျဲၤအဂီၢ် မၤတဲၥ်ကွံၥ်ပျံၤပျ့၀ံၤ ယဲၢ်မံးနံးအတီၢ်ပူၤ ဘၣ်က့ၤဃ့ၢ်ပဒ့ၣ်ကွံၥ်အဂ့ၢ် စံး၀ဲန့ၣ်လီၤ.
သုးကီၢ်ကးအသုး, ပၢၤကီၢ်ကရၢတဖၣ်, BGFကရၢတဖၣ်ဒီး တၢ်ဘံၣ်တၢ်ဘၢကရၢတဖၣ်လၢအိၣ်ဖဲ တိၤသီအဖီခိၣ်တဖၣ်စ့ၢ်ကီး က့ၤဟးထီၣ်ဆူ ကၠိၣ်ဒိတပၤ၀ံၤအလီၢ်ခံ ဟ့ၣ်တၢ်ပျဲလၢတၢ်ကလ့ၤလိၤဟးထီၣ်လၢ တိၤအံၤအဖီခိၣ်အဂ့ၢ် စံး၀ဲန့ၣ်လီၤ.
တၢ်သ့ၣ်ညါဆိပၥ် တၢ်အိးထီၣ်တိၤသီအမူးတၢ်ရဲၣ်တၢ်ကျဲၤအဃိ ဖဲဂီၤ(၆)နၣ်ရံၣ်အဆၢကတီၢ်န့ၣ် တၢ်ပၢၢ်ဆၢကရၢဖိတဖၣ် လဲၤဆီလီၤဒြိခံခိၣ်ဒီး လဲၤတ့ၢ်လီၤမ့ၣ်ပိၢ်တဖၣ် ဆူတိၤလီၢ်လံၤတၢ်လီၢ်တပၤအဂ့ၢ် စံး၀ဲန့ၣ်လီၤ.
သုးကီၣ်ကးတပၤ သုးအါထီၣ်၀ဲကၠၣ်ပၣ်တဖၣ်ဒီးခီဖျိကၠၣ်ပၣ်အဃိ မ့ၣ်ပိၢ်တၢတဖျၢၣ်န့ၣ် လဲၤလီၤတဲၥ်၀ဲဒၣ်ဖဲ တိၤအကပၤတီၤဖုၣ်ကၠိအပူၤ၀ံၤ လီၢ်ခံတဖျၢၣ်န့ၣ် လဲၤလီၤတဲၥ်၀ဲဒၣ် ဖဲကၠဲသ၀ီ ကျဲနီၣ်ဂံၢ်(၁)ဒီး(၂)အဘၢၣ်စၢၤအဃိ ကမျၢၢ်(၆)ဂၤဘၣ်ဒိ၀ဲ၀ံၤ အဂၤခံဂၤစ့ၢ်ကီး ဘၣ်ဒိ၀ဲတဆံးတက့ၢ်အဂ့ၢ်စံး၀ဲန့ၣ်လီၤ.
ဖဲမဟါအနံၤ လၢဖၣ်အၣ်သုးကီၣ်ကးကီၢ်စဲၣ်ကရၢ အိးထီၣ်တိၤသီအံၤန့ၣ် တၢ်သူၣ်ထီၣ်ဃၥ်အီၤလၢ အပူၤကွံၥ် NLDပဒိၣ်အစိၤ၀ံၤ သုးကီၣ်ကးတပၤ ဘၣ်ဟံးန့ၢ်တၢ်ဆၢကတီၢ်သၢလါဒီး ဘၣ်ဘှီက့ၤ၀ဲအဂ့ၢ် စံး၀ဲန့ၣ်လီၤ.
Ref: Salween Press
