လါမးရှး(၁၀)သီ,၂၀၂၅နံၣ်
ကၠီၣ်တဲၣ်-ပယီၤကီၫ်ဆၢလၢအမ့ၫ် ကညီကီၫ်စဲၣ်,လူၫ်ပျဲၫ်ကီၫ်ဆၣ်,ကျ့ၣ်ဖိကျိသ၀ီကပိာ်ကပၤတၫ်လီၫ်တဖၣ်အပူၤ တုၤ လၢလါမးရှး(၂)နွံတနွံအပူၤန့ၣ် KNLAသုးပာ်ဖှိၣ်ဒီးသုးကီၣ်ကးသုးအဘၢၣ်စၢၤ ခံကပၤတၫ်ဒုးကဲထီၣ်ကဒီးအဂ့ၫ် တၫ်သ့ၣ်ညါဘၣ်လၢ ကီၫ်ဆၢဂ့ၫ်ခီၣ်ထံးတၫ်ကစီၣ်အိၣ်န့ၣ်လီၤ.
စးထီၣ်ဖဲလါဖ့ၤဘြူၤအါရ့ၤအလၢာ်အပူၤန့ၣ် လၢကျ့ၣ်ဖိကျိသ၀ီ,သုးကီၣ်ကးအပူလူတူသုးကလၢၤန့ၣ် ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA)သုးက့နီၫ်ဂံၫ်(၇)တီခိၣ်ရိၣ်မဲ တၫ်ပၢၫ်ဆၢသုးပာ်ဖှိၣ်တဖၣ် စးထီၣ်ဒုး၀ဲ၀ံၤ တုၤလၢလါမး ရှး(၈)သီနံၤ ခံကပၤတၫ်ဒုးဆူၣ်၀ဲလီၤ.
KNLAတၫ်ပၢၫ်ဆၢသုးပာ်ဖှိၣ်တဖၣ်န့ၣ် ဒုးသုးကီၣ်ကးအသုးဒီးဒြိတဖၣ်အသိး သုးကီၣ်ကးတကပၤစ့ၫ်ကီး ဟဲခးလီၤတၫ်လၢကဘီယူၤအိၣ်၀ဲဒီးခံကပၤတၫ်ဒုးဆူၣ်အဃိ ကၠီၣ်တဲၣ်သုးန့ၣ် အိၣ်ခိးကွၫ်တၫ်ဒီးဆီလီၤဃာ် တၫ်ဘံၣ်တၫ်ဘၢ ဖဲကီၫ်ဆၢအဂ့ၫ်တဲ၀ဲလီၤ.
လူၫ်ပျဲၫ်ကီၫ်ဆၣ်,ကၠီၣ်တဲၣ်-ပယီၤကီၫ်ဆၢ ကျ့ၣ်ဖိကျိသ၀ီကပၤ တၫ်ဒုးဆူၣ်၀ဲအဃိ ကျ့ၣ်ဖိကျိသ၀ီပာ်ဃုာ် ဒူသ၀ီ တစှၤန့ၫ်(၃)ဖျၢၣ်,ကမျၢၫ်(၅၀၀)ဃၣ်ဃၣ် ဘၣ်လဲၤဃ့ၫ်အိၣ်ကဒုဆူ ကၠီၣ်တဲၣ်တကပၤ တးကီၫ်ရ့ၣ်,ထးစီၣ်ယါကီၫ်ဆၣ် ပူၤန့ၣ်လီၤ.
ပှၤလီၫ်အိၣ်ကမှံဖိ(၅၀၀)ဂၤဃၣ်ဃၣ်လၢလဲၤဃ့ၫ်အိၣ်ကဒုဆူကၠီၣ်တဲၣ်တကပၤတဖၣ် ကၠီၣ်တဲၣ်သုး ကွၫ်ထွဲဃာ်၀ဲ၀ံၤ ဟ့ၣ်၀ဲတၫ်မၤစၢၤတဖၣ်အဂ့ၫ် ကၠီၣ်တဲၣ်သုးဘၣ်မူဘၣ်ဒါတဂၤထုးထီၣ်တဲဖျါ၀ဲလီၤ.
သုးက့နီၫ်ဂံၫ်(၇)အပူၤ အပူၤကွံာ် ၂၀၂၄နံၣ် လါနိၣ်၀့ဘၢၣ်အပူၤလံၤလံၤ သုးကီၣ်ကးဒီး KNLA KNDOသုးပာ်ဖှိၣ်တဖၣ် အဘၢၣ်စၢၤ ခံကပၤသုးဂ့ၫ်၀ီတၫ်ဖ့ၣ်ဆၢအိၣ်ထီၣ်ဒီး လီၫ်ခၢၣ်သး၀ဲၤလီၫ်ခိၣ်သ့ၣ်(လီၫ်လံၤ)မၤနၢၤပျီ KNUထီၣ်ဒုးမၤန့ၫ် ကဒါက့ၤ၀ဲအသိး သုးကီၣ်ကးစ့ၫ်ကီး လၢသုးက့နီၫ်ဂံၫ်(၇)KNUလီၫ်ခၢၣ်သး၀ဲၤလီၫ်ခိၣ်သ့ၣ်အပူၤ လဲၤတ့ၫ်လီၤမ့ၣ်ပိၫ် လၢဒြိတဖၣ်အိၣ်၀ဲလီၤ.
KNUလီၫ်ခၢၣ်သး၀ဲၤလီၫ်ခိၣ်သ့ၣ်အပူၤ သုးကီၣ်ကးလဲၤတ့ၫ်လီၤမ့ၣ်ပိၫ်လၢဒြိတဖၣ်အဃိ ကမျၢၫ်တနီၤတၫ်ဘၣ်ဒိဘၣ် ထံးအိၣ်အသိး လၢတနံၣ်အံၤ ၂၀၂၅နံၣ်ထီၣ်သီအပူၤ သုးကီၣ်ကးအသုးကျိၤလၢဟဲနုာ်လီၤဆူ သုးက့နီၫ်ဂံၫ်(၇)အပူၤတဖၣ် တၫ်ပၢၫ်ဆၢသုးပာ်ဖှိၣ်တဖၣ် ဒုးအီၤလၢ တၫ်ဘၢၣ် စၢၤအဃိ သုးကီၣ်ကးသုးဘၣ်ဒိဆါ၀ဲန့ၣ်လီၤ.
လူၫ်ပျဲၫ်ကီၫ်ဆၣ်,ကၠီၣ်တဲၣ်ကီၫ်ဆၢအကပၤ လၢကတီၫ်အံၤ သုးဂ့ၫ်၀ီတၫ်အိၣ်သးတဖၣ်အဃိ လီၫ်က၀ီၤပှၤလီၫ်အိၣ်ကမှံ ဖိတဖၣ် က့ၤလၢတၫ်အိၣ်လီၫ်ကျဲတန့ၫ်ဒံးဘၣ်အသိး သုးကီၣ်ကးကလံၤကျါတၫ်ဟဲခးလီၤတၫ်တဖၣ်အဃိ လီၫ်က၀ီၤ ကမျၢၫ်တဖၣ် ပျံၤတၫ်ဖုးတၫ်ဒီးဘၣ်အိၣ်ခူသူၣ်လၢ တၫ်အိၣ်တဒၢမ့ၣ်ပိၫ်အလီၫ်တၫ်ပူၤတဖၣ်အပူၤအဂ့ၫ် တၫ်သ့ၣ်ညါ ဘၣ်လီၤ.
Ref: Hlaing Info
